SQO-da «Reseı-Qazaqstan – máńgi­lik dostyqtyń qos qanaty» atty fes­tıva­l ótti

Búginde atalmysh okrýgte jarty mıllıonǵa jýyq halyq tursa, úshten biri nenes, hanty, selkýp sekildi jergilikti turǵyndar. Olar negizinen buǵy jáne balyq sharýashylyǵymen aınalysady. Sanynyń azdyǵyna qaramastan salt-dástúrlerin, ádet-ǵuryp­taryn berik ustanatynyn shara anyq baıqatty. Onyń aıasynda Sibirdiń usaq ulttary jaıly de­re­kti fılmder kórsetilip, das­­­tar­­qanǵa ulttyq taǵamdar qo­ıyldy.

Delegasııa jetekshisi, okrýg úkimeti basshysynyń orynbasary Elena Rýdkovskaıanyń aıtýynsha, Soltústik Qazaqstan men Iаmal-Nenes avtonomııasy arasyndaǵy turaqty baılanys 2011 jyldan beri jalǵasyp keledi. Osy aralyqta eki tarap arasynda kóptegen dostyq, mádenı jobalar júzege asyrylǵan. Delegasııa músheleriniń biri Konstantın Iаmzınniń áke-sheshesi sanaly ǵumy­rynda kóshpeli ómir saltyn usta­nyp, keıin balalaryna amanat­taǵan. Ol buǵy ósirý kásibi­men shuǵyldanyp qana qoı­maı, eski­likti qundylyqtardy da ja­ny­na serik etken. Baqsy-shaman­dar­dan qalǵan mýzykalyq aspapty jaqsy meńgergen. Reseı­diń qııan túkpirinde tursa da, ozyq jetis­tik­terden habary mol. Sibir­di sýyq, susty deseńizder qate­le­se­siz­der. Ár jerdiń qaıtalanbaıtyn tabı­ǵaty, ózine tán tylsym syrlary bolady. Iаmal-Nenes – sondaı aımaq deıdi ol jyly jymıyp.

Jurtshylyq nazaryna buǵy terisinen tigilgen neshe túrli buıym­­dar da usynyldy. Qaı-qaı­sy­­sy bolsyn kózdiń jaýyn alady.

Dastarqan mázirine qaqtalǵan buǵy eti, shujyǵy, balyqtyń alýan túrleri men ýyldyryqtar qoıy­lyp, kópshilik dám tatty.

Reseıdiń alys túkpirinde orna­las­qanyna qaramastan okrýg­tiń órkenıet kóshine ilesip kele jatqany súısintedi. Ortalyǵy Salehard munaıly qala sanalady. Basqa da paıdaly qazbalar óndiriletindikten, ónimderine degen suranys joǵary kórinedi.

Halyqaralyq baıqaý aıasynda uıymdastyrylǵan fotokór­melerdiń, kartınalardyń, ádebı týyndylardyń da taǵylymy mol boldy. 

О́mir ESQALI, «Egemen Qazaqstan»

Soltústik Qazaqstan oblysy