Ortalyq kommýnıkasııalar qyzmetinde Syrtqy ister mınıstrliginiń uıymdastyrýymen BUU Bas hatshysynyń saıası máseleler jónindegi kómekshisi Mıroslav Enchamen onlaın konferensııa ótti.
Nıý-Iorkten tikeleı efırde uıymdastyrylǵan jıynǵa elimizdiń buqaralyq aqparat quraldary ókilderi jınaldy. Onlaın konferensııa Qazaqstannyń BUU Qaýipsizdik Keńesine tóraǵalyq etýine baılanysty uıymdastyryldy. Vebınarda sóz sóılegen M.Encha Qazaqstannyń Keńestegi jumysynyń mańyzdylyǵyna toqtaldy.
«Qańtarda Qazaqstan Qaýipsizdik Keńesi tóraǵasy qyzmetine kirisip ketti. Munyń mańyzy joǵary. Qazaqstan kún tártibin uıymdastyryp, uıym atynan sóz sóılep, onyń otyrysyn shaqyrady. Kelesi aptada mańyzdy birqatar is-shara ótpek. Sonyń biri – Prezıdent Nursultan Nazarbaevtyń tóraǵalyǵymen ótetin «Jappaı qyryp-joıatyn qarýlardy taratpaý: senim sharalary» atty jıyn. Budan bólek, Ortalyq Azııa men Aýǵanstan máselelerine arnalǵan jaryssóz uıymdastyrylady», dedi spıker.
M.Encha Sırııadaǵy daý-janjaldy sheshýde Qazaqstannyń mańyzdy qadamdarǵa baryp, Astanada kelissózder uıymdastyrǵanyn atap ótti. Onyń pikirinshe, ondaǵy ahýaldy jaqsartýda Astana prosesiniń mańyzy zor.
«Astana kelissózderi Sırııa máselesin sheshýge aıtarlyqtaı úles qosty. Sonyń arqasynda shıelenisti azaıtý, deeskalasııa aımaǵyn qurý sekildi mámilelerge qol jetkizildi. Sonymen qatar BUU Bas hatshysynyń arnaıy ókili Steffan de Mıstýranyń basshylyǵymen ótetin Jeneva kelissózderine qoldaý kórsetti», dedi M.Encha.
Bat hatshy kómekshisiniń aıtýynsha, Qazaqstan Ortalyq Azııadaǵy beıbitshilik pen turaqtylyqty nyǵaıtý maqsatynda aıanbaı ter tógip keledi.
«Qazaqstan álemde, Ortalyq Azııada qaýipsizdik pen beıbitshilikti nyǵaıtýǵa eleýli úles qosyp, óz múmkindigin tıimdi paıdalanyp otyr. Mysal retinde ıadrolyq qarýsyzdanýǵa úndeýin, Semeıdegi synaq alańynyń jabylýyn, Ortalyq Azııada ıadrolyq qarýsyz álem qurý bastamalaryn atap ótýge bolady. Qazaqstan bastamasymen Halyqaralyq ıadrolyq synaqtarǵa qarsy is-qımyl kúni belgilendi. Elderińiz óz qyzmetin odan ári tıimdi jalǵastyra beretinine senimdimin», dedi Bas hatshynyń kómekshisi.
Elimiz Ortalyq Azııa men Aýǵanstandaǵy beıbitshilik pen turaqtylyqty nyǵaıtý maqsatynda damý men qaýipsizdik máselelerin birge talqylaıdy. Spıkerdiń pikirinshe, bul aımaqtaǵy ahýaldy jaqsartýǵa úles qosady.
«Aýǵanstandaǵy jaǵdaıdy áskerı jolmen sheshý múmkin emes. Kerisinshe, óńirlik áriptestikti nyǵaıtyp, ınfraqurylymdyq jobalardy qoldaýdyń mańyzy zor. BUU-da Aýǵanstan máselesin sheshýdegi Qazaqstan tarapy atqaryp jatqan jumystarymen jaqsy tanys. Máselen, Almatyda aýǵan jastary bilim alyp jatyr. Menińshe, mundaı qoldaý óńirdegi turaqtylyq pen damýdy nyǵaıtady. Álemde beıbitshilikti qamtamasyz etýdegi Qazaqstannyń rólin atap ótkim keledi», dedi M.Encha.
Budan keıin elimizdiń BUU Qaýipsizdik Keńesi quramynda basymdyq beretin baǵyttaryna toqtaldy. Spıkerdiń aıtýynsha, Qazaqstan tarapy kóterip otyrǵan máseleler jer-jahanda beıbitshilik pen qaýipsizdikti nyǵaıtý úshin óte qajet.
Kelesi aptada ótetin ıadrolyq qarýdy taratpaý jónindegi is-sharanyń osy taqyrypty keńinen tarqatýǵa qosar úlesi zor. Qazaqstan óz erkimen ıadrolyq qarýdan bas tartqan memleket retinde álemniń birqatar eline úlgi bolady. Osy oraıda jappaı qyryp-joıý qarýlaryn taratpaý máselesinde Qazaqstan halyqaralyq qoǵamdastyq aldynda bedelge ıe. Ásirese ıadrolyq qarýdy qoldaný yqtımaldyǵy joǵary qazirgi jaǵdaıda eldiń róli erekshe.
BUU Bas hatshysynyń keńesshisi qazirgi tańda halyqaralyq qoǵamdastyq Qazaqstannan Qaýipsizdik Keńesi tóraǵalyǵy merziminde úlken úmit kútip otyrǵanyn málimdedi. Onyń paıymdaýynsha, elimizdiń BUU Qaýipsizdik Keńesi aıasynda ótkizetin jıyndary álemde beıbitshilik pen qaýipsizdikti qamtamasyz etýge ólsheýsiz úles qospaq. Budan keıin, M.Encha qazaqstandyq dıplomattardyń eńbegine oń baǵa berdi.
«Qazaqstandyq dıplomattar kásibıliktiń joǵarǵy deńgeıin kórsetti. Qaýipsizdik Keńesine múshe memleketter de, BUU quramyndaǵy elder de qazaqstandyq dıplomattardyń eńbegin baǵalaıdy. Sizderdiń elderińiz QK jáne BUU arasyndaǵy ózara is-qımyldy syndarly túrde júrgizip otyr. Osy oraıda Qazaqstan men onyń BUU-daǵy Turaqty ókildigine aldaǵy jumysta tek sáttilik tileımin», dep sózin túıindedi spıker.
Jıyn sońynda elimizdiń buqaralyq aqparat quraldary ókilderine BUU saıty tanystyrylyp, onymen jumys isteý tásilderi kórsetildi. Spıkerlerdiń aıtýynsha, Uıymnyń zamanaýı saıty adamǵa BUU-nyń shtab-páterinde ótetin kez kelgen jıyndardy tikeleı efırde tamashalaýǵa múmkindik beredi. Budan keıin BAQ ókilderine saıttyń basqa da artyqshylyqtary tanystyryldy. Onlaın konferensııa sońynda spıkerler jýrnalıster qoıǵan suraqtarǵa jaýap berdi.
Abaı ASANKELDIULY,
«Egemen Qazaqstan»