Táýelsizdik qurdastary

Erkin eldiń erteńi

TARIHTAǴY MAŃYZDY KÚN

Osydan 20 jyl buryn elimiz azattyǵynyń tańy araılap at­qanda dúnıe esigin ashqandardyń biri As­tanadaǵy S.Seıfýllın atyn­daǵy Qa­zaq agrotehnıkalyq ýnı­ver­­sıtetiniń II kýrs stýdenti Aıjan DÚISEN­BAE­VA edi. Jaqynda stýdent qyzdy Táýel­sizdiktiń qurdasy bolýdyń qandaı ekenin suras­ty­ryp, áńgimege tartqan edik. – 1991 jyly elimiz Táýelsizdik alǵanda biz Shýche qala­syn­da turǵanbyz. Men sol jerde týdym. Ákemniń aty  – Sár­senbaı, sheshemniń esimi – Rızash. Ekeýi de dáriger. Dári­gerler otbasynan shyqqan soń, men de kishkentaı kezimde ata-anam sııaqty bolýdy armandap óstim. Biraq, mektep bitirgende dárigerden góri aýyl sharýashylyǵy mamany bolýdy tańdadym. Qazir dúnıe júzinde azyq-túlik problemasy ózekti máselelerdiń biri bolyp otyr ǵoı. Bolashaqta elimizde mal sharýashylyǵy, azyq-túlik másele­simen aınalysqym keledi. – Táýelsizdik kúni, basqa da kezderi qandaı qy­zyqty oqıǵalar esińde qaldy? – Endi sol kúni meniń týǵan kúnim ǵoı. Ártúrli syı­lyq­tar alamyn. Týysqandarym, dostarymnyń bári qut­tyqtap jatady. Ol, árıne, kóńilimdi ósirip tastaıdy. Táýel­sizdiktiń 10 jyldyǵyn da eshqashan umytpaımyn. Sol kúni biz Býrabaıdaǵy «Juldyz» lagerinde 10 kún jaqsy demaldyq. Bul biz sııaqty oıyn balalaryna Táýelsizdiktiń 10 jyldyǵy kezinde jasalǵan bir syı boldy. – Mektepte óziń sııaqty 16 jeltoqsan kúni týǵan balalar kóp boldy ma? – Shýchede bir qyz boldy. Sosyn Kókshetaýda bir ul balamen oqydym. – Bos ýaqytyńdy qalaı ótkizesiń? – Ártúrli ǵoı endi. Mýzyka tyńdaımyn, qurby-qurdas­tarymmen demalyp, kóńil kótergendi unatamyn. Kitap oqı­myn. Inim Aslanbı men sińlim Aıǵanymǵa qaraılasyp, ýaqy­tymdy ótkizemin. Anama úı sharýashylyǵynda kómektesemin.

Áńgimelesken Dastan KENJALIN.

ASTANA.

JAÝAPKERShILIK JÚKTEIDI

Men Táýelsizdik tańymen birge tú­legen urpaqpyn. 1991 jyly 16 jel­toqsanda Panfılov aýdany Sa­rybel aýylynda dúnıe esigin ashyp­pyn. Qazirgi kezde ákem Erkin Ospanbekov Taldyqorǵan qalasyn­daǵy №3 ká­siptik mektepte óndiristik oqytý sheberi, anam Gúlbaq Alıbekova kitaphanashy bolyp eńbek etýde. Otbasy jaǵdaıymen 1999 jyly Taldyqorǵan qalasyna qonys aýdaryp, Maǵjan Jumabaev atyndaǵy №9 mektep-gımnazııada oqýymdy jalǵastyryp, ony úzdik bitirdim. Araıly azattyq tańymen talasa týǵanymnan bolar, mektep qabyrǵasynda óte jaqsy oqý úlgerimimen qatar, qoǵam­dyq jumystarǵa da belsene aralasyp, qurby-dostaryma úlgi boldym. Pándik olımpıadalardan, baıqaý­lardan, sony­men qatar sporttyq sharalardan (boks) júldeli oryndarǵa ıe bolyp, alǵy shepte bolýǵa talpyndym. Ulttyq biryńǵaı testileý qorytyndysynda 103 ball jınaqtap, Ilııas Jansúgirov atyndaǵy Jetisý memlekettik ýnıversıtetine memlekettik grant negizinde oqýǵa tústim. Aǵymdaǵy jyly Shveısarııanyń Sıýrıh ýnıversıtetinen kelgen stýdenttermen birge etnografııalyq ekspe­dısııaǵa qatysý qur­metine ıe boldym. Osylaısha bilim shyńyna qulash sermeýdemin. Iá, qos mereke meniń ómirimniń aıtýly sáti. Soǵan laıyq tartý ázirleý – basty maqsatym. Mıras Abdrahım, I.Jansúgirov atyndaǵy Jetisý memlekettik ýnıversıtetiniń stýdenti. Almaty oblysy.

 

QÝANYShTY KÚN «QARLYǴAShY» Mereıli mereke qarsańynda Ilııas Jansúgirov atyndaǵy Jetisý memlekettik ýnıversıtetiniń matematıka já­ne jaratylystaný fa­kýltetiniń III kýrs stýdenti, Tá­ýelsizdik qurdasy  Gúl­naz Mo­lot­janqyzymen kezdesip, pikirle­sýdiń sáti túsken edi. – Gúlnaz, elimiz úshin qasterli kúni ómir esigin ashyp­syń. Demek, otbasyńda qos qýanysh bolypty. Osy jaıly tolyǵyraq aıtsań. – Men ómirge kelgen 1991 jyldyń 16 jeltoqsany ata-anam úshin erekshe bolǵanyn es bilgennen beri estip júr­min. Maǵan deıin otbasymyzda Mahıram, Málik tárizdi tátem men aǵaıym bar edi. 16 jeltoqsan kúni saǵat onnyń shamasynda «ińgálap» men dúnıe esigin ashyppyn. Súıinshi, Aqbaıan, ómirge ádemi qyz ákeldiń. Beıbitshilik bo­lady, qutty bolsyn, degen dáriger anamnyń qýa­nyshyna ortaq­tasyp, meni alaqanyna salypty. Aǵaıyn-týǵan, uıǵyr, qazaq bári de meniń ómirge kelýimdi erekshe qýanyshpen qarsy alǵan eken. – Táýelsizdik mereıiniń «qarlyǵashy» ekensiń. Osy kúni ómirge kelgenińdi maqtan tutasyń ba? Bunyń seniń minezińe, qalyptasýyńa áseri bar ma? – Týǵan kúnime maqtanamyn. Onyń minezime, qalyp­tasýyma áseri bar ma dep suradyńyz. Shynymdy aıtsam, bar. О́ıtkeni, «Meniń Qazaq­stanym» Ánurany men pa­trıottyq ánder shyr­qalǵanda tebirene­min, tipti kózime jas keledi. Elim, jerim gúl­dense, Qazaq­stannyń mártebesi ósse dep tileımin. Prezıdentimiz Nursultan Nazarbaevty teledıdardan kórgende eń jaqynymdaı bolady maǵan. Ár sózin sanamda saqtaýǵa tyrysamyn. Kúsh-jigerin, bilimin, ýaqy­tyn, bar ǵumyryn eli úshin aıamaǵan Kóshbasshynyń densaý­lyǵynyń myqty bolýyn tileımin. – Búgingi jastardyń ómirge degen kózqarasy, el men jerge degen sezimi, ynta-yqylasy jaıly ne aıtar ediń?

– Jastarǵa Elbasy joǵary senim artyp otyr. Buǵan ata-ananyń, ustazdardyń úmitin qosyńyz. Sonda bizge júktelgen mindet pen paryzdyń salmaǵy qanshalyqty ekenin zaman­dastarym jaqsy sezinedi dep bilemin. Sondyqtan da oqýda ozat, qoǵamdyq ómirde jaı otyndaı jarqyldap júr. Kýrsta koreı qyzy Olıa Magaı, orys Maksım Rýsınov, qazaq qyzy Ajar Baıjumanova, taǵy basqalary jaqsy maman bolý úshin erekshe yntamen bilim alýda. Olıa menen qazaq tilin úırenip júr. Maksım de «qara jaıaý» emes. Bári de ultyna qaramastan, memlekettik tildi bilýge yntaly. Qazaqstan degende júrekteri lúpildep soǵady.

Áńgimelesken Kúmisjan BAIJAN.

Almaty oblysy.

ERTEGIDEI ELIM BAR

Bıyl elimiz ǵana emes, 1991 jyly ja­ryq dúnıege kelgen qurdastarymyzdyń barlyǵy da 20 jasqa kelgenderin atap ótýde. Esim kirgeli beri táýelsizdik qur­dasy ekenimdi bilip, ony tereń sezinip óstim. О́ıtkeni ata-anam 5-6 jasymda Alma­tydaǵy Táýelsizdik alańyna aparǵa­ny jadymda. Sonda bul kún bizdiń ulttyq merekemiz ekenin túsindirýge tyrysqany da esimde. Men týǵanda ákem de, sheshem de stýdent bolypty. Alma­tydaǵy QazMÝ qalashyǵynda, stýdentter jataqhanasynda dú­nıe­ge kelippin. Olar bul kezde ózderiniń jas bolǵanyn, kóppen kórgen uly toı dep, kóp qıynshylyqty elemegenin aıtady. Bolashaq zańgerler turatyn jataqhanada menen basqa da birneshe sábı bolǵan kórinedi. «Seni jataqhananyń barlyq stýdenti baqqan, sessııa kezinde dostarymyzǵa tastap ketetinbiz», dep aıtyp otyrady áke-sheshem. Qazir ákem – zańger, sheshem – jýrnalıst. Ákeme osydan 10 jyl buryn Aýǵan soǵysyna qatysqan ınternasıonalıst-jaýyn­ger retinde páter berildi. Quralaı atty sińilim, Erkebulan esimdi inim ósip keledi. О́zim Qazaq bas sáýlet-qurylys akademııasynyń 3-kýrs stýdentimin. Dızaın fakýltetinde oqımyn. Sabaqtan qalǵan emespin. Bizdiń akademııa tereń bilim beretindigimen joǵary oqý oryndary arasynda bedeli bar. Dıplom alǵannan keıin óz elimizdiń kórkeıip, ádemilene túsýine úlesimdi qosamyn dep oılaımyn. Álemge sulýlyq syılaǵym keledi. Ǵazıza ShYŃǴYSQYZY, Qazaq bas sáýlet-qurylys akademııasynyń stýdenti. ALMATY.

QAIDA JÚRSEM DE UMYTPAIMYN

Maǵan anam árýaqytta sen erekshe balasyń dep aıtatuǵyn. Kishkentaı kezimde tipti meniń oıynshyqtarym da bolmapty. Stýdent anam biz turatyn jataqhananyń edenin jýatyn edi. Ondaǵy dálizde bir ǵana velosıped bolatyn. Sheshem sol velo­sıped­tiń ıesimen kelisip, eden jýyp jatqanda tebe turýǵa surap alatyn. О́zimniń neshe túrli oıynshyqtarym bolsa eken dep armandaıtynmyn. Anam úıge aqsha alyp kelgen saıyn, sol kúni alyp beretin shyǵar dep kútetin edim. Biraq, olaı bolmaıtyn. Bizge kómektesetin de eshkim bolǵan joq. Keıin anam dıplom alǵan soń, birden jumys taba almaǵandyqtan, keshki aýysymmen dúńgirshekte satýshy boldy. Men anammen birge sonda jıi qonyp qalatynmyn. Bertin kele  sheshem Qazaq sırkine jumysqa turdy. Osy­laısha biz úshin ǵajap álem ashylǵandaı boldy. Jaǵdaıymyz da jaqsara bastady. Páter satyp aldyq. Keıin anam bala kezdegi armanyn iske asyryp, sıqyr áleminiń qupııasyn meńgerip, shetelderge kelisim-shartpen shyǵa bastady. Osylaısha biz Shveısarııa, Italııa, Grekııa, Túrkııa elderinde jumys istedik. Nátıje­sinde men nemis, túrik tilderin erkin meńgerip aldym. Meniń bala bolsam da túsingenim, shetelderde júrgende ár adamnyń óz eli bolady eken. Anam Altynaı Baıtoqanova qazir elge tanylǵan óner adamy. Qazaq sahnasyna ıllıýzııalyq shoý janryn alyp kelip, damytty. Sonymen qatar 31-telearnada «О́mir-ózen» baǵdarlamasyn júrgizedi. Men búginde Beıjiń qalasyndaǵy Ortalyq ekonomıka jáne qarjy ýnıversıtetindegi memlekettik basqarý fakýltetiniń stýdentimin. Qytaı tilin meńgerdim. Qaı elde júrsem de qazaq balasy ekenimdi umytqan emespin. Baqytjan BAÝYRJANULY, Beıjińdegi Ortalyq ekonomıka jáne qarjy ýnıversıtetiniń stýdenti. ALMATY.

BIZ ERKIN  EL JASTARYMYZ

Úıimizde qashanda qonaq kóp bola­tyn. Sondaı bir sátterde bir atanyń «Deni saý qoǵamdy deni saý adamdar qurady» degen sózin estip edim. Osy sóz qulaǵymnan ketpeıdi. «Deni saý degeni» aýrý-syrqaýdan saý kisiler ekenin uq­tym. Biraq, aýyrmaıtyn adam da bolmaıdy. Solar múm­kin­diginshe syrqattanbasa, týysqandary renjimese dep óstim. Dáriger bolý – basty armanym. Oǵan anam Raıhannyń medısına qyzmetkeri ekendigi de áser etse kerek. Toǵyzynshy synyptan keıin Kókshetaý memlekettik ýnıversıteti janyndaǵy lıseıge tústim. Ony da oıdaǵydaı bitirip, qazir qalamyzdaǵy medısına kolledjiniń 3-kýrsynda oqyp júrmin. Grant ıegerimin, top jetekshisimin. Al týǵan kúnime kelsek, Qazaqstan Táýelsizdigi jarııalanǵan 1991 jyl­dyń tap 16 jeltoqsanynda dúnıege kelý árkimniń taǵdyryna jazyla bermegen baqyt qoı. Oǵan sheksiz qýanamyn. Maqtan etemin, biraq onyń eshqandaı artyqshylyq bermeıtinin bilemin. Ony aqtaý kerek. Men kolledjge túsken jyly «Egemen Qazaqstan» gazetiniń oblysymyzdaǵy ókili oqý ornyma, úıimizge kelip suhbat al­ǵan. Oǵan tanıtyndardyń bári rıza boldy. Ásirese, ákem Baqyt­jannyń: «Endi seniń tórt alýǵa haqyń joq», degenin umytpaımyn. Inim Aıdyn da tyrysyp júr. «Prezıdenttik zııatkerlik mektebinde» oqıdy. Astanalyq oblystyń adam­darynyń bári osyndaı dep oılaımyn. О́ıtkeni, biz eńseli eldiń azamattarymyz. Aıdana MAJIMOVA, Kókshetaý medısına kolledjiniń 3-kýrs stýdenti. Aqmola oblysy.

MAQSATYMYZ  – ALDA  BOLÝ

 Kókshetaýda irgeli ister kóp. Qala ádemi, bizdiń kóńilimiz sııaqty. №21 orta mektebiniń 9-shy synybynan keıin, Kók­shetaý memlekettik ýnıversıteti janyn­daǵy «Mereı» lıseıinde oqydym. Osy jyldary meniń týǵan kúnimniń ereksheligin ańǵara bastadym. Oǵan áke-sheshemniń Táýelsizdiktiń alǵashqy jyldarynda bazar jaǵalap, qazirgi kezde jeke kásipkerlikti dóńgelentip otyrǵany qozǵaý salǵandaı. Táýelsizdikti nyǵaıtý ońaılyqpen kelmegen eken. Ony biz damytýymyz kerek, moı­nymyzdaǵy paryzymyzdy adal atqaryp, aldyńǵy qatardan kórinýimiz qajettigin osy kúnderi aıqyn uǵyna bastadym. Lıseıden keıin kóp oılanbastan Kókshetaý memlekettik ýnıversıtetine grantpen túsip, «Júk qozǵalysyn uıymdastyrý jáne kólikti paıdalaný» mamandyǵy boıynsha bilim alýdamyn. Bul Arqa tósindegi astyqty oblysymyz úshin asa qajet kásip. О́lkemiz jyl saıyn mıllıondaǵan qyzyl dán jınaıdy. Bıylǵy merekeli jyly da dıqandar mereıi ústem boldy. Alda barymyzdy bazarlaı bilýimiz, astyqtyń naryqtyq aınalymyn saýatty uıymdastyrý birinshi kezekte tur. Men osy istiń ortasynda bolsam, órkendep jatqan Qazaqstannyń baılyǵyn molaıtsam, elimiz aýqatty bolsa degen tilektiń jetegindemin. Zamandastarymnyń oı-nıeti de osy.

Erkebulan ShAÝTYBAEV, stýdent.

Aqmola oblysy.  

JARQYRAI TÚS, JULDYZ!

Jylyoı aýdanynda ómirge kelgen  Táýelsizdik qurdasy Juldyz Dúısen­ǵalıeva ata-anasynyń tuńǵyshy eken. Qazir Almaty ekonomıka jáne statıstıka ýnıversıtetiniń Aqtóbedegi fı­lıa­lynda oqıtyn ol bolashaqta ba­ǵalaýshy maman­dyǵyn alyp shyqpaq. Juldyzben biz telefon arqyly sóıle­sip, oǵan bir-eki saýal qoıyp úlgerdik.  – Juldyz, seni táýelsizdik qurdasy retinde merekelik sharalarǵa shaqy­ryp turatyn shyǵar. Qaı shara esińde qaldy? – Kóp shaqyrady dep aıta almaımyn. Táýelsizdiktiń 10 jyl­dyǵy qarsańynda Atyraýǵa jumys saparymen kelgen Elbasy Nursultan Nazarbaevpen júzdesý áli kúnge deıin esimnen ketpeıdi. Ol kezde 10 jastamyn ǵoı. Nursultan Ábishuly táýel­sizdik qurdastaryna – árqaısymyzǵa óz qolymen tilek-hatyn tapsyrdy. Arnaıy syı tartý etti. Sol tilek-hat  eń qymbat syılyǵymnyń biri retinde saqtaýly tur. – Tilek-hatta ne dep jazylǵan edi.  Aıtyp bere alasyń ba? – Árıne. Onda «Jas dos! Elińniń uly bolsań, elińe janyń ashysa, azamattyq namysyń bolsa, qazaqtyń ulttyq jalǵyz memleketiniń nyǵaıyp-kórkeıýi jolynda jan terińdi syǵyp júrip eńbek et. Jerdiń de, eldiń de ıesi óziń ekenińdi umytpa! Nursultan Nazarbaev. 30 qazan 2001 jyl» dep jazylǵan. Elbasynyń osy tilek-hatyn jattap alǵanmyn. – Endi sanaýly kúnderden keıin el táýelsizdigine 20 jyl tolady. О́ziń de 20 jasqa tolǵaly otyrsyń. Osy merekeni qalaı, qaıda qarsy almaqsyń?

– Ázirge naqty bir sheshim qabyldaǵan joqpyn. Oılas­tyrylyp qoıǵan jospar da joq.  О́ıtkeni, sabaqtan qalǵym kelmeıdi. Basty maqsatym – ýnıversıtetti jaqsy bitirý. Bir jaǵynan áke-sheshemniń aqylyn tyńdap óskendikten, olardyń aıtqanyn jerge tastap kórgen emespin. Otbasymda ózimnen keıin eki sińilim, bir inim bar. Ata-anamyz olardyń tyńdap ósýi úshin olarǵa úlgi-ónege kórsetýim kerek. Demek, ata-anam aýylǵa kel dese, Qulsaryǵa baramyn.

Áńgimelesken Joldasbek ShО́PEǴUL.

Atyraý oblysy.

 

MENIŃ DE PERZENTTIK PARYZYM

 Men qalyń qazaq qonystanǵan tarıhı óńir Yrǵyzda dúnıege keldim. Táýelsizdik tańymen talasa dúnıe esigin ashqan­dyqtan, bul kún men úshin erekshe ystyq. О́zim mektepte qazaqsha oqydym, qazaq dostarymmen taı-qulyndaı tebisip, teń óstim. Ákem Dmıtrıı men anam Lıza úsh bala tárbıelep ósirip otyr. Menen keıin inilerim Mustafa men Ramazan ósip keledi. О́zim Aqtóbe qurylys-sáýlet kolledjin bitirgen soń týǵan jerim Yrǵyzǵa oraldym. Qazir aýdandyq jer qatynastary bóliminde eńbek jolymdy bastaýdamyn. О́zim oblystyq, aýdandyq deńgeıdegi jarystarǵa úzbeı qatysamyn. Ázirge óte bıik belesterdi baǵyndyra qoımaǵanym­men, sportty janyma serik etýden jalyqqan emespin. Alda da osy baǵytymnan taımaımyn. Jastar sportpen ónerdi serik etse ǵana aýyldyń sáni keledi. Biz elimizdiń osy táýelsizdik jyldarynda qol jetkizgen tabystaryna súısinemiz. Árıne, aǵa urpaq bastaǵan tarıhı joldy jalǵastyratyn da búgingi jastar ekenin túsinemiz. Tarıh úshin azǵantaı ýaqytta, ıakı 20 jylda elimiz ótken joldyń ótkelekti bolǵany da ras. Alaıda, Elbasy Nursultan Nazarbaev osy bir kúrdeli kezeńde eldiń eńsesin tikteıtindeı aýqymdy jumystarǵa uıytqy boldy. Egemen elimizdi álem moıyndaıtyn­daı aıbyndy memleketke aınaldyrdy. Iá, Táýelsizdiktiń ıgiligin halqymyz kórýde. Eldegi birlik pen yntymaqty, dostyq pen turaqtylyqtyń kepili – Elbasymyz desem, artyq aıtqandyq bolmas. Mamyrajaı tirligimiz ben baqýatty turmysymyzǵa syrt kózdiń ózi qyzyqqandaı. Munyń ózi bolashaǵymyzdyń budan da jarqyn bolatynyna sendire túsedi. Balańdaý kezimizde táýelsizdiktiń mánin jete uǵyna almaǵan bolarmyz bálkim. Qazir eseıe kele barlyq ıgilikterdiń táýelsizdikten bastalatynyna kózimiz jetip keledi. Táýel­sizdiktiń 20 jyldyǵy merekesiniń tabaldyryǵynda turyp, osyndaı birligi myqty elde týǵanymyzǵa qýanamyz. Egemen elimiz­diń erteńine qyzmet etýdi maqtanysh tutamyz. Týǵan jerdiń órkendeýine úles qosýdy perzenttik paryzym dep esepteımin.  Vladımır BANDÝRIN, Yrǵyz aýdandyq jer qatynastary bóliminiń qyzmetkeri.

Aqtóbe oblysy.

 

ARMAN JOLY ADASTYRMAIDY

 Táýelsizdiktiń tól qurdasy bolý pesheneme jazylǵanyna maqtanamyn. Ata-anam da egemendiktiń eleń-alańynda dú­nıege kelgen tuńǵyshta­ry­nyń qýany­shy el táýelsizdigimen tuspa-tus kelgenin jaqsylyqqa joryǵandaryn únemi aıtyp otyrady. Sondyqtan da meniń tárbıeme aıryqsha qarapty. Alǵashqyda orys tiliniń artyq­shylyǵyn sezingen ata-anam meni Shalqardaǵy orys mektebine berdi. Keıin qazaqy salt-dástúrden qol úzbesin, ana tilin bilsin degen bolýy kerek, qazaq mektebine aýystyrdy. Táýelsizdiktiń tańynda dúnıege kelgen perzent retinde men onyń maǵynasy men mańyzyn túsinýge tyrysamyn. Táýelsizdikti ata-babalarymyz qanshama ǵasyrlar boıy armandap, ańsap ótkenin, osy jolda qanshama alash azamattary basyn báıgege tikkeni sanamyzda saırap turýy kerek dep oılaımyn. Búginde táýelsizdiktiń 20 belesine kóterilip otyrǵan Qazaq­stannyń álem aldyndaǵy bıik bedeli men abyroıy Elbasy Nursultan Nazarbaev esimimen tyǵyz baılanysty ekeni sózsiz. Sondyqtan biz táýelsizdik qurdastary el erteńi úshin, Qazaqstan táýelsizdiginiń tuǵyry berik bolýy jolynda qaıtarymdy eńbek etýge daıyn maman bolyp shyǵýǵa talaptanýymyz kerek. Bul jalań sóz, bos uran emes. Bul búgin ómir jolyn bastaǵan ár jastyń kókeıinde júrer asyl armany, adal mahabbaty bolýy kerek. Boıymyzǵa Otanǵa degen súıispenshilik pen patrıottyq sezimdi sińire otyryp, táýelsizdiktiń mártebesin kóteretin tyń isterge atsalysý ǵana bizdiń ómirimizdiń máni bolýy qajet. Egemendiktiń jasampaz kórinisteri qoǵamdyq ómirimizdiń qaı salasynda da ózindik aıshyǵymen aıqyn ańǵarylýda. Mine, osy jasampazdyq joldy jalǵastyrýǵa bizder daıynbyz ba degen saýal árbir jasty tolǵandyrýy tıis. Aıdana SEITPEShOVA, Aqtóbe memlekettik pedagogıkalyq ınstıtýtynyń 3-kýrs stýdenti. Aqtóbe.

 

BÁRI DE JASTARDYŃ О́Z QOLYNDA

Táýelsizdiktiń alǵashqy jyldarynda oryn alǵan ótpeli kezeńniń qıynshy­lyqtary kóz aldymda. Bul kezde keıbir qurdastarym jaǵdaıy bolmaǵandyqtan mektepke segiz jasqa tolǵanda baryp jatty. Dápter, qalam jetispeıtin. Dúken sórele­riniń bos turǵany meniń bala kóńilimde umytylmastaı qalyp qoıypty. Sol jyldardan bergi eldiń ál-aýqaty jaqsaryp, ekono­mıkamyzdyń kúrt damyǵany kóz aldymda. Mektepte oqyp júrgende «HHI ǵasyr kóshbasshysy» zııatkerlik saıysyna qatysyp baǵymdy synadym. «Úmit» gımnazııasyndaǵy muǵalim­der bólek edi. Búkil mekteptegi balalar bir-birimizdi tanımyz. Ol jerde eń birinshi tártipke kóńil bólinedi. Mektep dırek­torynyń ózi, pán muǵalimderiniń barlyǵy ata-analar jınaly­syna qatysyp ár balanyń kóńil-kúıinen bastap, oqý úlgerimi, tártibine deıin talqylaıtyn. Meniń eń qyzyqty kezderim sol mektep qabyr­ǵasynda qaldy. Bizdiń tolyqqandy bilim alyp, barlyq jaǵdaı jasalǵan bilim oshaǵynda oqýymyz da Táýelsizdigimizdiń arqasy. Men óz qatarlastarymdy, táýelsizdik qurdastaryn ylǵı da maqtan tutamyn. Olardyń bári de aldaryna úlken maqsat qoıyp, jan-jaqty izdenisterge boı uryp júr. Egemen elimizde bolyp jatqan kún saıynǵy ózgerister men jetistikterge ár kez qýanamyn. Qoǵamdyq jumystar sheńberine saı arnaıy issaparmen Astana, Almaty, О́skemen, Taraz qala­laryna baryp qaıttym. Elimizdiń ár túkpirinen ózime pikirles, armany bıik, maqsaty aıqyn kóptegen dostar tabýym da –Táýelsizdigimiz syılaǵan baqyt. Nurlybek TÁJKENOV, stýdent. Batys Qazaqstan oblysy.

 

ELIMMEN BIRGE ESEIDIM

Táýelsizdik qurdasy Janna Qanat­qalıeva búginde El­basy Joldaýynda qoıylǵan jastar praktıkasyna saı Oral qalasy ákimdiginde qoǵamdyq qyz­mettik ortaǵa aralasyp júr. Biz oǵan jolyǵyp birneshe suraqtar qoıǵan edik. – Janna, Táýelsizdik uǵymyn qalaı túsinesiń? Qazaq eli egemendikke qol jetkizgen jyly dúnıege kelgeniń nendeı oılarǵa jeteleıdi? – Adam balasynyń dúnıege kelýi nemese ómirden ótýi onyń erkinen tys tabıǵı qubylys. Áıtse de men dál 1991 jyly dúnıege kelgenimdi taǵdyrdyń erekshe syıy dep túsinemin. Táýel­sizdiktiń qurdasy ekenim maǵan tereń jaýapkershilik júkteıdi. Elmen birge eseıý – ekiniń biriniń mańdaıyna buıyra bermeıtin baqyt. Saıası turǵydan alǵanda Táýelsizdik bizge eń aldymen Elbasyn, ózimiz tańdap saılaý quqyǵyn berdi. Táýel­sizdiktiń basty nyshandarynyń biri memlekettik derbes týy men Eltańbasy jáne ánurany bolýy. Bizdiń boıymyzda memlekettik rámizderge degen qurmet pen oǵan uqyptylyqpen qaraý, aıaq asty etpeý sekildi qasıetter ornyqty dep sanaımyn. – Jastar praktıkasy merzimin ótep júr ekensiń. Bul tirkestiń máni men mańyzyn qalaı túsinesiń? – Ony qoǵamdyq ómirge kiriktirýge bastamashy bolǵan Elba­symyz Nursultan Nazarbaevqa rızashylyǵymyz sheksiz. Osy merzim aralyǵynda belgili bir ujym qataryna kirip, adamdar ara­syndaǵy qarym-qatynastardy tereń túısinýge den qoıamyz. Máselen, ózim Oral qalasy ákiminiń orynbasary Azamat Safı­malıevtiń qabyldaý bólmesinde kóp jaılarǵa qanyǵý ústindemin. Áleýmettik máseleler jónindegi orynbasardyń qabyldaýyna keletinder de az emes. Olarmen til qatysý, kelgen máselesiniń astaryna úńilý – biz úshin úlken mektep. – Aldaǵy maqsatyń qandaı?

– Mamandyǵymdy odan ári jetildirý, joǵary bilim alý, osy oıymdy iske asyrý úshin qazir Qazaq ınnovasııalyq telekom­mýnıkasııalar ýnıversıtetinde syrttaı oqyp júrmin.

Áńgimelesken Temir QUSAIYN.

ORAL.

 

16 JELTOQSANNYŃ ABYROIYNA DAQ TÚSIRMEIMIN

Men 1991 jyly 16 jeltoqsanda Qy­zylorda oblysynyń Aral aýdanyn­daǵy Qamystybas eldi mekeninde dúnıe esigin ashqanmyn. Búginde Taraz memlekettik pedagogıkalyq ınstıtý­tynyń 3-kýrsynda oqyp júrmin. Eldegi saıası turaqtylyqtyń, ekono­mı­kalyq órleýdiń jáne Qazaqstan halyqtary arasyndaǵy aýyzbirlik pen dostyqtyń arqasynda bizdiń zaman­das­tarymyz ózderi ańsaǵan armandaryna qol jetkizýde. Ol úshin Otanymda barlyq múmkindikter jasalǵan. Men mektep qabyrǵasynda júrip oqý ozaty atandym. Aýdandyq pánaralyq olımpıadalyq jarystarda birneshe ret júldeli oryndarǵa ıe boldym. Al ınstıtýttyń 2-kýrsynda tarıh páninen ǵylymı joba qorǵap, 3-oryn aldym. Oblys­tyq pikirsaıys týrnırlerine qatysyp, «Eń úzdik spıker» jáne «Eń úzdik tóreshi» dıplomdarymen marapattaldym. Bos ýaqytymdy tekke ótkizbeımin. Qoǵamdyq jumystarǵa belsene aralasamyn. Fakýltettegi jastar isi jónindegi komı­tetiniń tóraǵasy jáne «Nur Otan» partııasy oblystyq fılıaly «Jas Otan» jastar qanatynyń múshesimin. Men úshin keleshegi kemel, bolashaǵy jarqyn, keregesi keń, órkenıetti eldermen terezesi teń, 20 jastaǵy táýelsiz Qazaq­stannyń qurdasy bolý úlken baqyt. Tarıhy tuǵyrly, keleshegi ǵumyrly osynaý jarqyn eldiń qushaǵynda ómir súrip jatqan bizde ne arman bar. Bizdiń aldaǵy basty maqsatymyz – oqýymyzdy jaqsy degen baǵamen aıaqtap, elimizdiń órkendeýine óz úlesimizdi qosý. Zamandastaryma aıtarym: jasampaz eldiń damýyna bir kisideı atsalysaıyq! О́z basym 16 jeltoqsan degen qasıetti kúnniń atyna daq túsirmeımin! Azamat QABAQOV, Taraz memlekettik pedagogıkalyq ınstıtýtynyń 3-kýrs stýdenti. Taraz.

 

BOLAShAQ – BIZDIKI!

– Gúljaınar, týǵan kúniń qashan? – Men elimiz óz táýelsizdigin jarııa­laǵan 16 jeltoqsan kúni dúnıege kelippin. Sodan beri mine, elimizdegi ashyq aspan astynda baqytty balalyq shaǵymdy alań­syz ótkizip, qurdastarymmen birge arma­nyma qaraı qol sozyp kelemin. 11-synypta oqyp júrgenimde AQSh-ta ótken halyq­aralyq olımpıadaǵa Qazaq­stan atynan qatysyp, júldeli oryndy ıelendim. – Táýelsizdikpen túıdeı qurdas bolý adamdy qandaı sezimge bóleıdi? – Táýelsiz memlekettiń týǵan kúninde dúnıege kelý baqyt dep bilemin. Búginde elimizde úlken ister júzege asyrylyp jatyr. Egemen eldiń bolashaǵy jarqyn, qadamy nyq. Jastardyń jan-jaqty qalyptasýyna jaǵdaı jasalyp, óz talabyn ári qaraı ushtaı túsýge múmkindik berilgen. Qalaǵan mamandyǵyn alyp, erkin eńbek etýge de quqyly. Egemen elmen birge boıjetkenge ne jetsin! Jastarǵa únemi qoldaý kórsetip kele jatqan Elbasyǵa degen alǵysym zor. Áke-sheshem men baýyrlarym meniń táýelsiz Qazaqstannyń túıdeı qurdasy bolǵanymdy maqtan tutady. Men búginde M.H.Dýlatı atyndaǵy Taraz memlekettik ýnıversıtetinde oqyp júrmin. Mamandyǵym boıynsha bolashaqta bilikti ustazdardyń qataryn tolyqtyrsam deımin. Maǵan barsha qazaqstandyq jastarǵa elimizdiń táýelsizdigin kózdiń qarashy­ǵyndaı saqtaý amanaty júktelgendeı seziledi. О́ıtkeni, eldiń sarqylmas qazynasy – úlkender, al, halyqtyń tynysh­tyǵyn, egemendigin, erkindigin saqtaý, ony ári qaraı jalǵastyrý – jastar isi dep bilemin. Táýelsizdik tuǵyry berik bolsyn! Egemen elimizdiń erteńi nurly, keleshegi kemeldene bersin!

Áńgimelesken Kósemáli SÁTTIBAIULY.

Jambyl oblysy.

 

QAMQORLYQ AIаSYNDA

Aqtaýdaǵy Sh.Esenov atyndaǵy Kaspıı memlekettik jáne ınjınırıng ýnıversıtetiniń 3-kýrs stýdenti Rys­bek Besimbaevpen áńgime. – Rysbek, ózińniń Táýelsizdiktiń qurdasy ekendigiń eske túskende oıyńa ne oralady? – Shynymdy aıtsam, kishkentaı kezimde kóp mán bermeppin. Ata-babamyz ar­man­daǵan azattyqtyń aq tańy atyp, Tá­ýel­sizdikke qol jet­ken tusta ómirge kelgen bizder erekshe baqytty jandarmyz dep oılaımyn. О́ıtkeni Táýelsizdiktiń arqasynda tilimiz, dilimiz, baıyrǵy óne­rimiz órkendep, qazaq elin álem tanı bastady. Aýylymyz da, qala­myz da jaınap, jasaryp keledi. Sondaı ǵajaıyp ózgeristerdi kórý – baqyt. – О́mirde kezdesip, este qalǵan umytylmas sátter týraly ne aıtasyń? – Men jáne meniń zamandastarym, ýnıversıtetimizdiń stýdentteri úshin osydan eki jyl buryn Elbasy Nursultan Nazarbaevtyń Mańǵys­taýǵa sapary kezinde oqý ornymyzǵa kelip, Prezıdentti jaqynnan kórip, áńgimesin tyńdaǵanymyz máńgi este qalady. О́ıtkeni ýnıversıtetimizdi jańasha quryp, qıyn kezder kezinde záýlim jańa oqý korpýsyn, 500 oryndyq stýdentter jataqhanasyn jáne júzý basseıni bar sport keshenin salýǵa qamqorlyq jasaǵan Elbasy ekenin jaqsy bilemiz. Sondyqtan da alǵys aıtamyz. – Táýelsizdiktiń 20 jyldyǵy jaqyndap keledi. Merekege qandaı tartý-taralǵymen barǵaly otyrsyńdar?

– Men bul saýalǵa ýnıversıtetimizdegi jaqsy jańalyqtar jaýap beredi ǵoı dep oılaımyn. Oqý ordamyz qazir Reseı, Qytaı, Polsha, Germanııa sııaqty órkenıetti elderdiń joǵary oqý oryndarymen tyǵyz baılanys jasaıdy. Sol jerlerden bilim alǵandar qaıta kelip eńbek etýde. Aty álemge áıgili ǵalymdar jıi-jıi bolyp leksııa oqýda. Qysqasy, ýnıversıtet basshylyǵy bizderdiń sanaly tárbıe, sapaly bilim alýymyzǵa barlyq jaǵdaıdy jasaýda.

Áńgimelesken Jolaman BOShALAQ.

AQTAÝ.

TÁÝELSIZDIK – TEŃDESI JOQ BAQYT!

 Men ómirge táýelsizdiktiń aq tańymen birge kelgenimdi maqtanysh etip, soǵan saı azamatsha bolýdy armandap júrgen jaspyn. О́mirge 1991 jyly 16 jeltoq­sanda kelgenimdi, esimdi bilip, árip tany­ǵanda tereńirek uǵyndym. Qýany­shymda shek bolmady. Jyl saıyn qos mereke – Táýel­sizdik merekesi men týǵan kúndi toılaý adam­ǵa erekshe qýanysh syılaıdy eken. Sonymen birge, úlken jaýapkershilik júk­teıtindigi jáne bar. Ázirge sol synalar sátterden oıdaǵydaı ótip kele jatqan sııaq­tymyn. Tórt jyl boıy ozat stýdentter qatarynan kórinip júrmin. Túrli qoǵamdyq ju­mystarǵa da belsendi qatysýǵa týra keledi. Bul bir. Ekinshiden bizder Túgelbaevtar áýleti atajurtqa Túrkimenstannan Táýelsizdiktiń arqasynda keldik. Alty bala­nyń kishisi men kolledje oqımyn. Bolashaqta programmıst-tehnık bolýdy qaladym. Oǵan oblysta barlyq jaǵdaı bar. Olaı deıtinim, óndiris órkendep, jańa jumys oryndary kóptep ashy­lýda. Al meniń aǵa-apalarym Marat – zańger, Altynbek – kásipker, Nurshat – muǵalim, Gúlshat – akýsher bolyp jumys jasaıdy. Úı-jaılarymyz bar. Ata-anam bizderdiń jetistikterimizge dán rıza bolyp, kóńildi ǵumyr keshýde. О́zim turatyn ásem Aqtaýdaǵy alyp qurylystar, aýyl-eldegi sony jańalyqtar, balabaqshalar men oqý oryn­daryndaǵy oń ózgerister bolashaq ıeleri, jas mamandar bizderdiń keleshekke degen senimimizdi arttyra túsedi. Osyndaı jasampaz ómir, shat turmys úshin bizder táýelsiz Qazaq eliniń Tuńǵysh Prezıdenti Nursultan Nazarbaevqa perzenttik alǵys bildiremiz. Fatıma MURATBEKOVA, Aqtaý polıtehnıkalyq kolledjiniń 4-kýrs stýdenti. Mańǵystaý oblysy.

 

ARMANYM – AIBYNDY ELIME QORǴAN BOLÝ

Ishki ister mınıstrligi ishki ásker­ler áskerı ınstıtýtynda Táýelsiz­dikpen birge eseıip, erjetip kele jat­qan kýrsanttardyń biri – Shákirjan Nııazov. Ol jańa Qazaqstannyń tól qurdasy ekenin maqtan tutady, taǵ­dyrdyń syıyndaı kóredi. Jigitimiz osy jónindegi oı-tolǵamdaryn bizben bólisken edi.  – Shákirjan, mazasyz tirligi kóp áskerı ómirdi qalaǵanyńa ókinbeısiń be? – Meniń Otan qorǵaýshy mamandyǵyn tańdaýym kezdeısoq emes. Týǵan jerim – Almaty oblysyndaǵy О́tegen batyr aýyly. Ol óńirden talaı jaýjúrek oǵlandar shyqqan. Mektepti Astanada bitirdim. Jaqsy oqyp, sportpen aına­lystym. Álemniń maqtaýly qalalarymen ıyq tirestiretin elor­dadaǵy kúnderimdi umytý múmkin emes. 16 jasymda Pıra­mıdanyń ashylý saltanatyna qatysý qurmetine ıe bolyp, Táýel­sizdiktiń tól qurdastarymen Elbasymyzdy qarsy alǵanym jadymda máńgilik jattalyp qaldy. Kámelet jasqa tolǵanda Astana qalasynyń ákimi Imanǵalı Tasmaǵambetov teledıdar syılady. Munyń bári maǵan emes, halqymyz ǵasyrlar boıy zaryǵa kútken Teńdikke, Erkindikke kórsetilgen qurmet dep túsinemin.  – Demek, Táýelsizdik atty qasterli de qasıetti uǵymnyń seniń ómirińde alatyn orny erekshe demeksiń ǵoı? – Árıne. Mektepti aıaqtaǵannan keıin elimizdiń kez kelgen joǵary oqý ornyna túsý múmkindigim bolǵan. Oılana-tolǵana kele Qyzyljar óńirin ádeıi tańdadym. Bul aımaq ta – keń-baıtaq Otanymyzdyń ajyraǵysyz bir bólshegi. Qojabergen jyraý, Segiz Seri, Birjan sal, Úkili Ybyraı, Aqan seri sekildi aıtýly tulǵalar shyqqan ólke ǵoı. Qazir ekinshi kýrsta oqyp júrmin. Bolashaqta komandalyq-taktıkalyq basshylyq mamandyǵyn alyp shyǵamyn. Áskerı topografııa, ishki áskerler taktıkasy pánderin tez-aq meńgerip kettim. Menińshe, yqylas, nıet qoısa, kez kelgen qıyndyqty jeńýge bolady. Ofıser atanatyn kezimdi elestetsem, keýdemdi erekshe qýanysh terbeıdi. Eńseli eldiń erteńgi Otan qorǵaıtyn sarbazdary men sardarlary bolýdyń jaýapkershiligin tereń sezinemin. Al, Táýelsizdiktiń tól qurdasy bolý basqa qatarlas­taryńa qaraǵanda úlken mindetter júkteıtini anyq.

Áńgimelesken О́mir ESQALI.

 Soltústik Qazaqstan oblysy.

 

«TOMIRISTIŃ» BIShI GALINASY

Galına Antıýshkınanyń ákesi Leonıd oblys ortalyǵyndaǵy «Kastıng» seriktestiginde, al anasy Taısııa №5 emhanada jumys jasaıdy. Galınanyń ózinen úlken eki aǵasy Vadım  men Sergeı de qalada ákeleriniń jolyn qýyp, óndiris oryn­darynda eńbek etýde. Biz Galıany  oblys ortalyǵyndaǵy «Shańyraq» mádenı-saýyq ortalyǵynyń Altynaı Júnisova basqaratyn «Tomırıs»  bı tobyndaǵy  qazaq qyzdarynyń arasynan kórip júre­tinbiz. Endi, mine, oǵan jolyǵyp otyrmyz. – Qazaqstan bizdiń Otanymyz, sondyqtan bizder de osy jerde eńbek etip, stýdent atanyp, bilim alyp júrmiz. Men ózim oblys ortalyǵyndaǵy  Innovasııalyq Eýrazııalyq ýnıversıtettiń  hımııa-bıologııa  bóliminde 2-kýrsta oqımyn. Mektepte júrgende jaqsy oqydym. Bala kezimde  ata-anam maǵan sen bizdiń elimiz úshin  erekshe kúni týǵan qyzsyń dep ylǵı aıtyp otyratyn. Keıinnen bul kúnniń nege erekshe kún ekenin  bilip, túsingende árıne,  ózim de erekshe tolqyp, qýanyshta júrdim. Bizge basqa­larǵa qaraǵanda, jurtshylyq táýelsizdik kúnimen birge týǵandar dep qurmetpen qaraıtynyna ózimdi  baqytty sezinemin, – dep bastady áńgimesin Galına. – «Tomırıs» bı tobyna qalaı keldiń? Tomırıstiń kim bolǵanyn bilesiń be? – Árıne. Ol el bılegen patshaıym. Men ózimniń elimizdiń táýelsizdigin alǵan kúni týǵanymdy, «Tomırıs» bı tobyna kelgenimdi, shyǵys bılerine qyzyǵýshylyq tanytqanymnyń bárinen bir baılanys izdeımin. Qazaq tilin úırenip júrmin. Bı tobyna kelgenge deıin gımnastıkamen  shuǵyldandym. Jaraqat alǵan soń, bı bıleýdi uıǵardym. Alda armandarym kóp. Sonyń bári júzege asatynyna senimdimin. Al el úmitin aqtaýdyń jaýapkershiligin alyp júrýge árqashan da daıynmyn.

Farıda BYQAI.

Pavlodar.

BAÝYRMALDYQ AIаSYNDA О́STIM

 Men oqıtyn bilim uıasy Abaı aýda­nynda ornalasqan. Aımaqqa tanymal aýyl sharýa­shylyǵy mamandarynyń bira­zy osynda bilim alǵan. Bala kezimnen ákem sııaqty tehnıka jaǵyna úıir edim. Endi bir jyldan soń avtokólik qyzmeti boıynsha eńbek jolymdy bastaǵaly otyrmyn. Aýdandaǵy jyldan-jylǵa jańarýlar men ózgerister soǵan umtyldyryp, bel ortasynan tabylýǵa qyzyqtyrady. Elimiz táýelsizdik alǵan jyly ómirge kelgen men ózimdeı jas memlekettiń órkendeýine óz úlesimdi qosýǵa yntyqpyn. Bul bir jaǵynan erteńimizge jarqyn jol ashyp otyrǵan memlekettik qamqorlyqqa degen rızalyq ynta bolsa, sondaı-aq taǵdyrlary Qazaqstanda toǵysyp, baqyt­ty turmysqa bólengen ata-anamnyń otandaryna aınalǵan elge adal bolýdy júrekke uıalatqan aqyl-keńesiniń yqpaly der edim. Ákem Igor Ahmetjanovıch Keńes Odaǵy ydyraýdan bury­nyraq Tájikstannan Qaraǵandyǵa qonys aýdarypty. Osynda sheshem Olga Egorovnamen tanysypty. Búginde ata-anam sol qıyn shaqta ulttary bólek demeı baýyrǵa basqan turǵylyqty halyqqa rızalyqtaryn udaıy aıtyp otyrady. Men de sondaı jaqyn tartý, baýyrmaldyq aıasynda ósip kelemin. Súıikti Prezıdentimiz Nursultan Ábishuly Nazarbaev el bolashaǵy jastar qolynda ekenin árdaıym eske salyp otyrady. Aǵa býyn bizderge táýelsiz, keleshegi kemel memleket syılady. Otanymyzdyń abyroı-bedeli arta berýine biz de laıyqty úlesimizdi qosýǵa daıynbyz. Muny birge oqyp júrgen zamandas­tyrymnyń yqylas-nıetterin biletindikten aıtyp otyrmyn. Tımýr MOLLABAEV, Mıchýrın agrotehnıkalyq kolledjiniń oqýshysy. Qaraǵandy oblysy.

KО́RIKTI MEKENGE KО́RKEM ǴIMARATTAR SALSAM DEIMIN

Ol dúnıe esigin ashqanda Qazaqstan táýeldilikten tolyq aryla qoıǵan joq bolatyn. Arada 12 saǵat ýaqyt ótkende Táýelsizdiktiń tańy atty. Úlkender sharananyń osy kúni ómir esigin ash­qanyn jaqsylyqqa balady. Táýel­sizdiktiń qurdasy Arý Kóshekbaeva búginde boıjetip, Qorqyt Ata atyn­daǵy Qyzylorda memlekettik ýnıver­sıtetiniń polıtehnıkalyq fakýltetinde bilim alyp júr. – Qazaq úshin erekshe kúnde dúnıege keldiń. Bala kúnińnen saǵan degen kózqaras erekshe bolǵan shyǵar? – 16 jeltoqsan qazaq halqy úshin qadirli, qasterli kúnniń biri bolyp sanalady ǵoı. Bala kúnimde ata-ájem týǵan kúnimniń ereksheligin aıtyp otyratyn. Biraq balalyqpen asa mán bermeıtin edik. Mektep tabaldyryǵyn attaǵannan bastap ózimniń aıtýly kúni ómirge kelgenimdi sezindim. – Táýelsizdiktiń tól qurdasy aldyna qandaı maqsat-mindet pen armandar qoıyp otyr? – Bolashaqtan bilimimdi shetelde jalǵastyryp, el órken­deýine eleýli úles qosatyn mamandardyń qatarynan bolǵym keledi. Jáne sol maqsatqa jetý úshin barymdy salamyn. Jalpy, bizdiń halqymyz qasıetti atamekenin erekshe ardaqtaıdy ǵoı. Bul tanym bizdiń janymyzǵa atanyń qanymen taraǵan, ana sútimen daryǵan. Aıtaıyn degenim, týǵan óńirimde kórkem ǵımarattardyń qurylysyn salýdy armandaımyn. Elimizdiń ósip-órkendeýine tıtteı de bolsa úles qossam deımin. – Táýelsizdikti tuǵyrly etý úshin ne isteýimiz kerek dep oılaısyń? – Táýelsizdik – bizdiń eń basty ıgiligimiz, baǵa jetpes qundylyǵymyz. Jas memleket tarıhyndaǵy jańa dáýir dál osy Táýelsizdikten bastaý alady.

Áleýetimizdiń asýy da, dáýletimizdiń tasýy da óz qolymyzda. О́ıtkeni Elbasy bastaǵan el aǵalary Táýelsizdiktiń alǵyshart­taryn jasap, memleketti tolyq qurdy. Bolashaqta jastar aǵalar salǵan dańǵyl joldy jalǵaı alsa, Táýelsizdigimiz de tuǵyrly bola bermek.

Áńgimelesken Erjan BAITILES.