El ishinde Atymtaı jomart jigitter az emes. Olar eshqandaı saýyn aıtýdy kútpeı-aq qolynan kelgen járdemin beredi. Jalaǵash aýdanynyń turǵyny, «Qurmanbaı ata» sharýa qojalyǵynyń basshysy Erkin Bekjanov óziniń kindik qany tamǵan, bala kezinde shybyqty at qylyp shapqan aýyly – T.Júrgenov eldi mekenine 13 myń túp alma aǵashyn syılady.
О́ziniń jınap-tergen qarjysynan 20 mln teńgeni aýyl qajeti úshin bergen kásipker, «endi ózderiń is qylyńdar» degen joq, aýyl turǵyndarymen birge kóshetterdi otyrǵyzý jumystarynyń basy-qasynda boldy.
Aýylda eki qolyna bir kúrek tappaı júrgen azamattar kóp. 5 gektar jerge egilgen 13 myń túp alma kóshetin egýden bólek, kútip-baptaý jumystary bar. Aýyldastaryna jumys taýyp bergen azamat týǵan jeriniń ertegidegideı Iran baqqa aınalǵanyn qalaıdy.
Kóshetter egiler aldynda toqsannan asqan Áshen ata batasyn berdi. Alma aǵashynyń birin ózi ekken qarııanyń aıtary kóp. Kezinde osy aýylda alma baǵy bolypty. Balapan basymen, turymtaı tusymen ketken ýaqytta kútimsiz qalǵan sol baqtyń aǵashtary otyn bolyp ketken. Áshen aqsaqal ýaqytynda sol alma baǵynyń baǵbany bolǵan eken. Biraq menshik ıesi bolmaǵandyqtan, saqtap qalýǵa esh múmkindigi bolmaǵan. Keńes ókimetin shaýyp alardaı ekpindegen jurt tis shuqyr aǵash qaldyrmaı otap ketken.
Búginde zaman jaqsyǵa aınaldy. El toǵaıdy. Jasalyp jatqan ıgilikterdiń ózderi úshin ekenin biledi. Sondyqtan da jańadan tigilgen baý úshin bári qýanyshty.
Osy aýyldan túlep ushyp, talaı asýlardy baǵyndyrǵan Erkin perzenttik paryzyn osylaısha oryndady.
Baqtııar TAIJAN,
«Egemen Qazaqstan»
Qyzylorda oblysy