«Nurly jol» temir jol vokzalyn salý barysynda 50 mln teńge negizsiz jumsalǵany anyqtalyp otyr. Bólingen qarajatqa joǵary deńgeıde atqarylýy tıis jumystar sapasyz oryndalyp, qajetti qural-jabdyqtar ornatylmaǵan. Bul týraly Esep komıtetiniń múshesi Konstantın Plotnıkov aıtty.
EKSPO-2017 kórmesiniń ashylýyna oraı qyzmet kórsete bastaýy tıis bolǵan Astanadaǵy jańa temir jol vokzalynyń bastapqy quny 210,3 mlrd teńge bolatyn. Qurylys barysynda bul 243,6 mlrd teńgege deıin artty. Paıdalanýǵa qurylys-montajdaý jumysynyń, qural-jabdyqtar men qural-saımannyń tek 36,3 paıyzy ǵana berilgen. Buǵan qosa, 50,7 mln teńgeniń jumystary sapasyz oryndalyp, qural-jabdyqtar ornatylmaǵan», dedi K.Plotnıkov. Sonymen qatar temir jol vokzalynyń múgedekterge arnalǵan aqparattyq-dabyl qurylǵysyna 11,1 mln teńge bólingenimen, ol qurylǵylar jumys istemeıtin bolyp shyqty. Qysqy zal qurylysyna arnalǵan 22,1 mln teńgeniń de tıimsiz paıdalanylǵany anyqtalyp otyr. «Suıytylǵan aýa jáne azot óndirisin ornatý jónindegi jobany júzege asyrýǵa qarajat bólingen. Biraq bul soma paıdalanylmaǵan. 2015 jyldan beri bıýdjetke qaıtarylmaıtyn bolǵandyqtan, 18 mlrd teńgeden astam qarajat baqylaý esep shotynda jatyr», dedi K.Plotnıkov.
Aıta keterligi, Esep komıteti Ulttyq ekonomıka mınıstrliginiń 2014-2018 jyldarǵa arnalǵan strategııalyq jospary men kórsetiletin qyzmetter salasyn damytý jónindegi 2020 jylǵa deıingi baǵdarlamasyna bólingen qarajatqa aýdıt júrgizdi. Tekseris nátıjesinde birqatar zań buzýshylyqtar anyqtaldy: qyzmetter kórsetý salasyndaǵy zertteýlerdiń sapaly oryndalmaýy jáne qurylys qyzmeti týraly zańnamanyń saqtalmaýy boıynsha 963,5 mln teńgeni quraıtyn qarjylyq zań buzýshylyqtar anyqtalyp otyr. Sonymen qatar somasy 208 551 mln teńge bıýdjet qarajatyn tıimsiz paıdalaný, sondaı-aq somasy 6 162 mln teńgege bıýdjettik ótinimderdi sapasyz jasaý faktileri anyqtalǵan. Esep komıteti júrgizgen tekseris kezinde iri tórt jobadan shıkilik shyqqandyǵy belgili boldy. Olar – «Nurly jol» vokzaly, Jezqazǵan – Beıneý temir jol jelisi, Quryq portyndaǵy parom kesheni jáne Atyraý oblysyndaǵy «Ulttyq ındýstrııalyq munaı-hımııa tehnoparki».
Erkejan AITQAZY,
«Egemen Qazaqstan»