Tuńǵysh Prezıdent – Elbasy Qory janyndaǵy Álemdik ekonomıka jáne saıasat ınstıtýtynda Jastar jyly aıasynda dóńgelek ústel ótti. Onda sarapshylar ár taraptan kelgen qatysýshylarmen birge qazaqstandyq jastardyń áleýmettik ahýaly, qundylyqtary men ómirlik ustanymdaryn talqylady.
Shara moderatory, ınstıtýt sarapshysy Serik Beısembaev bıyl jastar úshin mańyzdy jyl ekenin eske salyp, osy otyrysta aıtýly jylda ǵana emes, osyǵan deıin de jastarǵa memlekettiń laıyqty kóńil bólip kele jatqanyn jetkizdi. «Resmı derekterge súıensek, 2018 jyly elimizde jastar saıasatyn qoldaýǵa 7 mlrd teńge bólingen. Bıyl shyǵyn budan da kóp bolady. Mundaı qomaqty qarjy jastardyń shynaıy, mańyzdy máselelerin sheshýge baǵyttalýy kerek», dedi ol.
Jıynda alǵashqylardyń biri bolyp sóz alǵan spıker, ınstıtýt sarapshysy Kamıla Kovıazına jastar saıasatynyń tıimdiligine toqtaldy. Onyń aıtýynsha, jastar saıasatynyń ıdeologııasy men tetikterin jańartý kerek. Bul áleýmettik lıft jasaýǵa yqpal etip, sýısıd pen jastardyń kóshi-qon jaǵdaıyn sheshýge áser etýi tıis. Sarapshy budan bólek jastar arasyndaǵy otbasylyq máseleni de nazardan tys qaldyrmady. «Qazaqstandyq jastardyń basym bóligi áli otbasyn qurmaǵan. Tek 45 paıyz jastar otbasyly, al 35 paıyzy ajyrasqan», dedi K.Kovıazına.
Aqparattyq qoǵamdaǵy jastardyń ómir súrý salty da, ondaǵy qundylyqtar da burynǵymen salystyrǵanda edáýir ózgeriske ushyrǵan. Osy turǵyda «Kazkontent» aksıonerlik qoǵamynyń Basqarma tóraǵasy Dýman Qojahmetov óz baıandamasynda medıa salasynyń jas býynǵa arnalǵan jobalaryn túbegeıli jańǵyrtý qajettigine mán berdi. Ol: «Qazir ınternet qoldanýshylardyń 35 paıyzy kúnine keminde 1 ret «You Tube» arnasyna kiredi eken. Sondyqtan biz de «You Tube»-tegi tanymdyq jobalarǵa basymdyq berip kelemiz. Sonyń biri – «History.kz» portalyndaǵy «Tarıh aǵaı» vıdeo-jobasy», dep, onyń bir sanyn qatysýshylarǵa usyndy. Ol bul jobada jastardyń kóp bóligi áli oqýshylar men stýdentter ekenin eskerilip, UBT-da, sondaı-aq ýnıversıtettiń alǵashqy kýrstaryndaǵy emtıhandarda kezdesetin suraqtar aıasynda ázirlengenin aıtty.
«Jas Otan» Jastar qanatynyń tóraǵasy Danııar Súndetbaev áke retinde jas otbasyndaǵy qundylyqtar men jas ata-analar arasyndaǵy problemalarǵa toqtaldy. Onyń oıynsha, qazirgi jas ata-analarda balalarynyń til tazalyǵyna alańdaýshylyq bar. О́ıtkeni balalarǵa arnalǵan qazaq tildi kontent az nemese sapasy syn kótermeıdi. Onyń ústine balalar da shet tilindegi mýltfılmderge qumar, sondyqtan jas analar men ákeler urpaǵynyń memlekettik tildi bilip ósýine mán berýi qajet.
Dóńgelek ústel sońynda qatysýshylar men spıkerler arasynda erkin pikirtalas boldy, olar joǵaryda kóterilgen máselelerdiń sheshý joldaryn qarastyryp, oılaryn ortaǵa saldy.
Aıdana ShOTBAIQYZY,
«Egemen Qazaqstan»