M.Qozybaev atyndaǵy Soltústik Qazaqstan memlekettik ýnıversıteti sheteldik kompanııalarmen tıimdi áriptestik qarym-qatynasty nyǵaıtyp keledi.
Eńseli bilim oshaǵynda Polshadaǵy “AGROS SP.zo.o.” kompanııasy kadr departamentiniń dırektory Anastasııa Belova bolyp, agrotehnologııalyq fakýltettiń oqytýshylarymen kezdesti. Onda ýnıversıtet rektory Serik О́mirbaev sheteldik meımanǵa oqý ordasy jaıly aıtyp berdi. Budan keıin Anastasııa Sergeevna ózi jumys isteıtin kásiporyn týraly baıandady. Onyń aıtýynsha, “G’s Fresh” atty iri halyqaralyq agroholdıngtiń fılıaly bolyp tabylatyn “AGROS SP.zo.o.” kompanııasy ekologııalyq taza kókónister óndirýmen aınalysady.
«Agroholdıngtiń Ispanııa, AQSh, Anglııa jáne Chehııa elderinde fılıaldary bar. Bizdiń kompanııa óz ónimderin Eýropa elderine eksporttaıdy. Fırmadaǵy joǵary tehnologııalyq mashınalar ónimdi jınaý, tazalaý, oraý jáne muzdatý jumystaryn bir mezgilde atqarady», dedi A. Belova.
О́zara kelisim nátıjesinde ýnıversıtettiń “Agronomııa” jáne “Mal sharýashylyǵy ónimderin óndirý tehnologııasy” mamandyqtarynda oqıtyn stýdentter Polshadaǵy kompanııada óndiristik tájirıbeden ótý múmkindigine ıe boldy. Bıyl 40 stýdent shetelge attanady.
Mundaı áriptestik baılanystardyń jastar úshin paıdasy mol. Shetel kompanııasy soltústikqazaqstandyq stýdentterdi jatyn orynmen qamtamasyz etip, tegin tamaqtandyrady. Sondaı-aq, tájirıbe kezinde stýdentterge eńbekaqy tóleý jaıy da qarastyrylǵan. Sonymen qatar kompanııa mamandary tálimgerler úshin dýaldy oqytý jáne teorııalyq sabaqtar júrgizetin bolady. Agrotehnologııalyq fakýltettiń oqytýshylaryna da kompanııa qabyrǵasynda biliktilikterin arttyrý múmkindikteriberiledi.
Atalmysh kompanııa Qazaqstannyń joǵary oqý oryndarynyń arasynda alǵash bolyp jergilikti bilim oshaǵymen áriptestik ornatyp otyr.
О́mir ESQALI,
«Egemen Qazaqstan»
Soltústik Qazaqstan oblysy