21-22 aqpan kúnderi Parlament Senaty Halyqaralyq qatynastar, qorǵanys jáne qaýipsizdik komıtetiniń hatshysy Tóleýbek Muqashev, Konstıtýsııalyq zańnama, sot júıesi jáne quqyq qorǵaý organdary komıtetiniń hatshysy Dýlat Qusdáýletov jáne Ekonomıkalyq saıasat, ınnovasııalar jáne kásipkerlik komıtetiniń múshesi Mıhaıl Bortnık quramyna engen Parlament Senatynyń delegasııasy Vena qalasynda ótken EQYU Parlamentti Assambleıasynyń qysqy sessııasyna qatysty. Bul týraly Qazaqstan Respýblıkasy Parlamenti Senatynyń baspasóz qyzmeti habarlady.
Depýtattar Turaqty komıtettiń, Saıası máseleler jáne qaýipsizdik, Ekonomıkalyq máseleler, ǵylym, tehnologııalar jáne qorshaǵan orta, Demokratııa, adam quqyqtary jáne gýmanıtarlyq máseleler jónindegi jalpy komıtetterdiń otyrystaryna, sondaı-aq úsh jalpy komıtettiń birlesken otyrystaryna qatysty.
T.Muqashev saıası máseleler jáne qaýipsizdik komıtetiniń otyrysynda sóz sóılep, Elbasy N.Á.Nazarbaevtyń jahandyq turǵydaǵy alyp elder – AQSh, Reseı, QHR jáne EO arasyndaǵy kezdesýdi uıymdastyrý jónindegi bastamasynyń mańyzdylyǵyn atap ótti. Senator sondaı-aq 2020 jyly qaýipsizdiktiń ózekti máseleleri boıynsha EQYU-nyń konferensııasyn, EQYU, AО́SShK jáne ASEAN aımaqtyq forýmy hatshylyqtarynyń kezdesýin ótkizý bastamalary týraly habardar etti.
M.Bortnık ekonomıkalyq máseleler, ǵylym, tehnologııalar jáne qorshaǵan orta jónindegi jalpy komıtetke qatysýshylardy Úshinshi jańǵyrý baǵdarlamasy aıasynda elimizde ótkizilip otyrǵan reformalardy tanystyryp, BUU ornyqty damý maqsattaryn iske asyrýdaǵy Qazaqstannyń jetistikterin atap ótti.