Bul ataýly kún alǵash ret 2014 jyly 27 aqpanda Fınlıandııanyń Helsınkı qalasynda halyqaralyq deńgeıde atalyp ótken. Ol týraly Lıtvadaǵy Baltyq teńizi aımaǵynyń IX úkimettik emes uıymdar (ÚEU) forýmynyń 8-shi sammıtinde jarııalanǵan edi. Shara ÚEU men memlekettik organdar arasynda áriptestik ornatý, jas jáne kásibı UEU-lardy qoldaý, ózara tájirıbe almasý maqsatynda uıymdastyrylǵan.
Erkin formattaǵy sharada quttyqtaý sóz alǵan Qoǵamdyq damý vıse-mınıstri Sergeı Konovalov: «ÚEU qazir belsendi, olardyń únin kez kelgen jerde estýge bolady. Qazir qoǵamdaǵy eshbir jumys ÚEU-rsyz jáne olardyń qoldaýynsyz ótpeıdi. Osydan-aq mundaı uıymdardyń yqpalyn bilýge bolady», dedi. Ol aýtıst balalardy emdeıtin, ınklıýzıvti bilim beretin, múmkindigi shekteýli jandarǵa járdemdesetin, jalpy áleýmettik jobalarmen aınalysatyn ÚEU-lardy qoldaýǵa memlekettiń árdaıym daıyn ekenin tilge tıek etti.
Búginde elimizde 29398 ÚEU bar. Olardyń quqyǵyn qorǵaıtyn tikeleı memlekettik organ – Qoǵamdyq damý mınıstrligi. Áńgimeni osydan bastaǵan Azamattyq bastamalardy qoldaý ortalyǵynyń tóraıymy Batıma Mýkına bizge bergen suqbatynda: «ÚEU-lardyń qoǵamdaǵy róli óte zor. О́ıtkeni úkimette búkil halyqtyń qajettiligin óteýge múmkindik bola bermeıdi. Sondaıda ÚEU-lar barlyq salada belsendilik tanytýǵa tıis. Jastar jyly aıasynda atalǵan uıymdardyń áleýmettik jobalaryna arnap memleketten bıyl jyldaǵydan bólek taǵy 25 grant bólindi. Qazir 100-den asa ÚEU konkýrsqa qatysyp jatyr. Búgingi shara ÚEU-lardy memlekettiń múmkindikterinen qalys qalmaýǵa, qoǵamdyq jumystarǵa atsalysýǵa, volonterlikke qyzyǵýshylyq tanytýǵa shaqyrady», dedi.
«Bolashaq» qaýymdastyǵynyń atqarýshy dırektory Laýra Demesin: «Bolashaq» baǵdarlamasy túlekteriniń bastamasymen qurylǵan bizdiń qaýymdastyq ta – 2000-ǵa jýyq múshesi bar úkimettik emes uıym. Búgingi sharada uıymdastyrýshy retinde atsalysyp otyrmyz. 150-ge tarta otandyq jáne sheteldik uıymdar qatysýda. Osy arqyly qazaqstandyq ÚEU-ń sheteldik, halyqaralyq uıymdarmen seriktestikte jumys isteýin qoldaǵymyz keledi», dedi. Aıta keteıik, atalǵan qaýymdastyq áleýmettik jobalardy júzege asyryp júr. Byltyr «Nur Otan» partııasynyń qoldaýymen Qazaqstandaǵy 5000-nan astam aýyl oqýshylaryna tegin, eki aılyq aǵylshyn kýrsyn uıymdastyrǵan.
Budan bólek, shara aıasynda ár salada túrli, paıdaly jáne qyzyqty sheberlik sabaqtar júrgizildi. Onda mamandar men qatysýshylar ózara tájirıbe almasyp, ÚEU-lardy damytýdyń, ondaǵy jumystardy júıeli júrgizýdiń joldaryn qarastyrdy.
Aıdana ShOTBAIQYZY,
«Egemen Qazaqstan»