«Dala folklorynyń antologııasy» jaryqqa shyqty

Baspasóz máslıhatyna Aqparat jáne qoǵamdyq damý mınıstri Dáýren Abaev, Mádenıet jáne sport mınıstrligi Mádenıet jáne óner isteri departamentiniń dırektory Ábil Jolamanov , «Qazaq radıolary» JShS bas dırektory Qurmanbek Jumaǵalı, Qazaqstannyń eńbek sińirgen qaı­rat­keri, fılologııa ǵylymynyń doktory Amanjol Áltaev qatysty. 

7 bólimnen turatyn jınaqqa Qazaq radıosynyń «Altyn qorynda» saqtalǵan ultymyzdyń halyq aýyz ádebıeti men mýzykalyq folklorynyń mol qory, san ǵasyrlyq tarıhqa toly shyǵarmalary – ertegiler, batyrlar jyry, aıtys óneri, sheshendik sózder, jyr-dastandar, kúı-termeler endi. Búginde «Altyn qorda» 1948 jyldan beri jınaqtalǵan 100 000-nan astam fonogramma bar. Jınaqtaǵy halyq jáne halyq kompozıtorlarynyń jaýharlary alǵash jetkizýshi-oryn­daý­shylarynyń oryndaýynda ǵana berilgen. Baspasóz máslıhatynyń qatysýshylary jınaqtyń maqsaty men mazmunyna toqtalyp, oǵan engen «Altyn qordaǵy» qazaqtyń qundy jádigerleri jóninde keńirek baıandady.

«100 jylǵa jýyq tarıhy bar «Qazaq» radıosynyń «Altyn qoryn­da» saqtalǵan rýhanı mura­la­rymyzdy jaryqqa shyǵarý óte mańyzdy ári eleýli oqıǵa. Tuńǵysh Prezıdentimiz N.Nazarbaevtyń «Uly dalanyń jeti qyry» dep atalatyn maqalasy osy eki tomdyq jınaqty shyǵarýǵa túrtki boldy. Eń aldymen, bul joba arqyly balalarymyzdyń sanasyna babalarymyzdyń baı murasyn sińiremiz», – dedi D.Abaev. Mınıstrdiń aıtýynsha, jınaqtyń basty ereksheligi ánshilerdiń óz daýysymen oryndaǵan túpnusqa shyǵarmalardy tyńdaýǵa bolady. Jınaqta HIH ǵasyrdaǵy halyq kompozıtorlarynan án úırenip, olardyń bizdiń zamanymyzǵa deıin úzilmeı jetýine úles qosqan barlyq ónerpaz qamtylǵan. Atap aıtqanda, Ámire Qashaýbaevtyń oryndaýyndaǵy «Balqadısha», «Dýdaraı», «Jalǵyz arsha», «Besqarager» ánderi bar. Kenen Ázirbaevtyń «Kók sholaq», «Boztorǵaı», «Bulbul», «Dombyra» ánderin tyńdaýǵa bolady. Manarbek Erjanov, Qalı Baıjanov, Baıǵabyl Jylqybaev syndy daýylpaz jyrshy­lar­dyń áni de osy jınaqqa engizilgen. Kúı­ge kelsek, Dına Nurpeıisova, Jappas Qalambaev, Ábiken Hasenov pen Maǵaýııa Hamzınniń oryndaýyndaǵy qundy shyǵarmalar toptastyrylǵan.

Elbasy Nursultan Nazarbaev «Uly dalanyń jeti qyry» maqalasynda folklorlyq dástúrdiń ortaq tarıhı negizderin izdeý úshin Qazaqstannyń túrli óńirleri men ózge elderge birneshe izdeý-zertteý ekspedısııalaryn uıymdastyrý qajet ekendigin aıtqan bolatyn. Bul rette Mádenıet jáne óner isteri departamentiniń dırektory Ábil Jolamanov zertteý maqsatyndaǵy jumystardyń jalǵasatynyn, osy baǵytta elimizdiń túkpir-túkpirine arnaıy ekspedısııa sharalary uıymdastyrylatynyn habarlady. 

«Taralymy 1 myń dana aýdıojınaq ulttyq jáne respýblıkalyq kitap­ha­nalar men joǵary oqý oryndaryna, óner mektepterine taratylady», – «Qazaq radiolary» JShS dırektory Qurmanbek Jumaǵalı.

Qazaq radıosynyń «Altyn qoryn­da» 1959 jyldan beri «Ertegi» aıdarymen 350 habar daıyndalǵan, sonyń ishindegi 70 qazaq ertegisi «Ertegi» aıdarymen jınaqqa endi. Al batyrlar jyrynyń 50 nusqasy 2015 jyly termeshi Aqan Ábdýáliniń uıymdastyrýymen elimizdiń belgili jyrshylarynyń oryndaýynda qaıta úntaspaǵa jazyldy. Sonymen qatar qazaq aýyz ádebıetiniń ozyq úlgileri toptastyrylǵan jınaqtyń kópshilikke qoljetimdiligin arttyrý maqsatynda onyń arnaıy saıty men mobıldi qosymshasyn ázirleý de qolǵa alynbaq.