Baspasóz málimetinde habarlanǵandaı, Qazaqstan Halyq Assambleıasy Mańǵystaý oblystyq fılıalynda «Bıler keńesin» qurý jáne olardyń múshelerin saılaý jóninde keńes otyrysy ótti. Otyrysta qoǵamdyq birlestik retinde qurylatyn «Bıler keńesiniń» tóraǵasy bolyp biraýyzdan hımııa ǵylymdarynyń kandıdaty, qalalyq máslıhat depýtaty Marat Moldaǵulov, hatshysy bolyp otstavkadaǵy sýdıa Gúljahan Imanǵalıeva saılandy.
Sondaı-aq, «Bıler keńesiniń» 9 múshesi men 3 adamnan turatyn jumys toby belgili bolyp, 2019 jylǵa arnalǵan jumys jospary bekitildi.
О́ńirde alǵash paıda bolǵan «Bıler keńesiniń» quramyna qoǵam qaıratkerleri, otstavkadaǵy sýdıalar men oblystyń qurmetti azamattary engizildi. Atalǵan quram qoǵamda oryn alǵan daýlardy bitimgerlikpen sheshý joldaryn qarastyratyn bolady. Keńes tóraǵasy aldaǵy jumys baǵyttarymen, keńes músheleriniń mindetteri men quqyqtaryn túsindirdi. «Bıler keńesiniń» aýdan, qalalarda turatyn músheleri óz turǵylyqty jeri boıynsha taraptardy qabyldaýǵa quqyly. Osydan soń, oblys sotynyń, Mańǵystaý oblysy Qazaqstan Halyq Assambleıasynyń birigip uıymdastyrǵan Dostyq Úıinde «Bıler keńesiniń» jumys baǵyty» taqyrybynda dóńgelek ústel ótkizildi.
Is-sharaǵa Mańǵystaý oblysy ákiminiń orynbasary R.Sákeev, Mańǵystaý oblystyq sotynyń tóraǵasy E.Daýlıev jáne alqa tóraǵalary, sýdıalar, «Bıler keńesiniń» tóraǵasy M.Moldaǵulov pen onyń músheleri, Sh.Esenov atyndaǵy ýnıversıtet oqytýshylar quramy men medıatorlar, óńirdiń qarııalary men otstavkadaǵy sýdıalar qatysty.
Dóńgelek ústelde sóz alǵan E. Daýlıev qoǵamda túrli áleýmettik, azamattyq, ekonomıkalyq daýlardyń qatary kóbeıip, árbir úshinshi adam sot áýresinde júrgenin aıtyp, daýlardy azaıtýdyń bir tetigi – tatýlastyrý rásimderin qoldaný aıasyn keńeıtý ekendigine nazar aýdardy.
R.Sákeev daýlardy sotqa deıin sheshý tetikterin iske qosý, bıler keńesiniń jumysyn uıymdastyrý, medıatorlardyń qyzmet kórsetý sapasyn arttyrý maqsatynda respýblıka boıynsha 200-ge tarta «Bıler keńesi» qurylǵandyǵyn atap ótti. Sondaı-aq, ol óńirde «Bıler keńesiniń» atqaratyn jumysy men qoǵamdaǵy róli týraly baıandady.
Jıyn barysynda oblystyq sottyń tóraǵasy óńirde medıasııa kabınetterinen bólek, Mańǵystaý oblysy Qazaqstan Halyq Assambleıasynyń janyńda, ýnıversıtette jáne Kásipodaqtar úıinde tatýlastyrý ortalyqtary, «Atameken» UKP oblystyq fılıalynda tatýlastyrý sektory qyzmet kórsetetinin, alaıda, osy jumystardyń barlyǵy áli de qoǵamda daýdy azaıta almaı otyrǵanyn aıtyp, daýlardy azaıtýǵa «Bıler keńesi» úlken úles qosatyndyǵyna senim bildirdi.
Is-shara barysynda «Bıler keńesiniń» jumysy týraly arnaıy daıyndalǵan rolık kórsetilip, keńes múshelerin jańa qyzmetterimen quttyqtap, olarǵa estelik retinde kıeli Mańǵystaý óńiri men ańyzdary týraly kitaptar syıǵa tartyldy.