Senat depýtattary Joǵarǵy Sottyń sýdıalary Ǵalııa Aqqýova, Ádil Quryqbaev, Amangeldi Sársenbaev, Morıak Shegenovty ornynan túsýine baılanysty, Elis Ábdiqadyrovty basqa qyzmetke taǵaıyndalýyna oraı qyzmetinen bosatty.
Otyrysta Qazaqstan men Reseı úkimetteri arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisim ratıfıkasııalandy.
Kelisim boıynsha fılıalda «matematıka», «qoldanbaly matematıka jáne aqparattaný», «fılologııa», «ekologııa jáne tabıǵatty paıdalaný», «ekonomıka» baǵyttaryndaǵy daıarlyqta Qazaqstan tarıhy men qazaq tili mindetti túrde oqytylady; fılıaldaǵy oqý kúndizgi jáne kúndizgi-syrttaı oqytý nysandary boıynsha júzege asady jáne orys tilinde júrgiziledi; Qazaqstan Respýblıkasynyń memlekettik bilim berý tapsyrysynyń negizinde fılıalda oqýdy támamdaǵan Máskeý ýnıversıtetiniń túlekteri Qazaqstan Respýblıkasynyń zańnamasyna sáıkes jumys istep óteýi mindetti; fılıaldyń bilim berý jáne qarjylyq-sharýashylyq qyzmetine Kelisimniń maqsattary men mindetterin iske asyrý jáne Qazaqstan tarapyna bekitilip berilgen múlikti fılıaldyń paıdalanýy turǵysynan birlesken tekserýdi júzege asyrý úshin mekemearalyq komıssııa qurylady; fılıaldyń qyzmetin qarjylandyrý Qazaqstan Respýblıkasynyń respýblıkalyq bıýdjetinen memlekettik bilim berý tapsyrysy aıasynda joǵary jáne joǵary oqý ornynan keıingi bilimi bar mamandar daıarlaýǵa bólingen qarajat esebinen, sondaı-aq Qazaqstan Respýblıkasynyń zańnamasynda tyıym salynbaǵan ózge de kózder esebinen júzege asady.
Senat Avtorlyq jáne sabaqtas quqyqtardy ujymdyq negizde basqarý tártibi týraly kelisimdi ratıfıkasııalady.
Kelisim avtorlardyń, oryndaýshylardyń, fonogramma daıyndaýshylardyń (jasaýshylardyń), avtorlyq jáne sabaqtas quqyqtardy ózge de ıelenýshilerdiń avtorlyq jáne sabaqtas quqyqtardy is júzinde jeke túrde júzege asyrý qıyn bolǵanda nemese múshe memleketterdiń zańnamalarynda osy quqyqtardyń obektilerin quqyq ıelenýshilerdiń kelisiminsiz, biraq syıaqy tóleı otyryp paıdalanýǵa jol beriletin jaǵdaılarda, EAEO-ǵa múshe memleketterdiń aýmaqtarynda avtorlyq jáne sabaqtas quqyqtardy ujymdyq negizde basqarý tártibin belgileıdi.
Múshe memleketterdiń zańnamasynda aıqyndalatyn avtorlyq jáne sabaqtas quqyqtardy ujymdyq basqarý salalarynda quqyqtardy ujymdyq basqarý jónindegi uıymdardy qurý múmkindigi kózdeledi.
Palata Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisimdi ratıfıkasııalady.
Qujat 2018 jylǵy 17 mamyrda Astana qalasynda jasalǵan kelisimdi ratıfıkasııalaýǵa arnalǵan.
Kelisimde Eýrazııalyq ekonomıkalyq odaqqa múshe memleketter men Iran Islam Respýblıkasy arasynda birqatar bekitilgen taýarlarǵa qatysty 3 jyl merzimge preferensııalyq saýda rejımin belgileý jáne ózara saýdadaǵy ımporttyq keden bajdaryn azaıtý kózdelgen.
Otyrys barysynda senator Sársenbaı Eńsegenovtyń Atyraý-Oral-Samara temirjol baǵytynyń qurylysyn qarjylandyrý týraly; Tóleýbek Muqashevtyń Belarýs Respýblıkasymen birlese otyryp «ushqyshsyz ushaq» óndirisin uıymdastyrý máseleleri boıynsha; Dýlat Qusdáýletovtyń qorshaǵan ortany qorǵaý jóninde sharalar qabyldaý qajettigi týraly depýtattyq saýaldary tyńdaldy.
Otyrys sońynda Senat basshysy depýtattardy Ekologııalyq kodeksti ázirleýge belsendi qatysýǵa shaqyryp, bul saladaǵy problemalardy sheshý qoǵam úshin erekshe mańyzdy ekenin atap ótti.