Úlgili otbasy bolý – baqyt

Ár jyldyń basynda jarııalanyp, Otba­sy kúnine oraı qorytyndylanatyn baıqaý otbasy ınstıtýtyn, adamgershilikti, rýhanılyqty nyǵaıtý, erli-zaıyptylyqtyń mańyzyn taný, ata-analardyń bala tárbıe­leýdegi jaýapkershiligin arttyrý, otba­sylyq qundylyqtardy, kámeletke tolǵan balalarynyń eńbekke qabiletsiz jáne egde jastaǵy ata-analaryna qamqor bolýyn dáripteý jáne keńinen nasıhattaý, sondaı-aq qazaqstandyq otbasynyń jaǵymdy ımıdjin nasıhattaý maqsatynda uıymdastyrylady.

Mańǵystaý oblysynda atalǵan baıqaý zor uıymshyldyqpen ótkiziledi - áke taǵylymy, ana tárbıesi, urpaqtar ulaǵaty sarapqa salynyp, ózgelerge úlgi retinde usynylar, ózderiniń mereıin arttyrar sharaǵa qatysýǵa ynta bildirýshiler sany az emes. Belgili ustaz-mýzykant, Mańǵystaý mádenıetiniń tanymal ókili, 77 jasynda stýdent atanǵan, búginde 80-niń seńgirine shyqqan Oryn Qulsarıevtiń otbasy 2015 jyly oblystyq kezeńniń jeńimpazy atanyp qana qoımaı, respýblıkalyq baıqaýdyń Gran prı júldesin jeńip alǵan bolatyn. 12 bala, 46 nemere, 41 shóbere tárbıelep otyrǵan Qulsarıevter otbasyna Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraıymy Gúlshara Ábdiqalyqova arnaıy estelik músin, «Mereıli otbasy» ulttyq baıqaýy jeńimpazynyń dıplomy men Qazaqstanda shyǵarylǵan IVECO shaǵyn avtobýsynyń kiltin tabystaǵan edi.

Bıylǵy óńirlik baıqaýǵa oblystyń aýdandary men qalalarynan munaı-gaz, energetıka, bilim, densaýlyq saqtaý, aýyl sharýashylyǵy, óner, kásipkerlik salalarynan quralǵan 67 otbasy ótinim berdi. Baıqaýǵa kóp balaly otbasylar men jas otbasylar belsendi qatysýda.

Sarapshylardyń talqy-tarazysy nátıje­sinde «Mereıli otbasy – 2019» ulttyq baı­qaýynyń bas júlde ıegeri bolyp Jańaózen qalasynan Júgenbaevtar otbasy tanyldy. Otaǵasy, Salamadın Júgenbaev 1943 jyly Mańǵystaý oblysy Syǵyndy aýylynda dúnıege kelgen. Atyraý qalasyndaǵy aýylsharýashylyq tehnıkýmyn «Zootehnık» maman­dyǵy boıynsha bitirgen. Kóp jyldar Eralıev atyndaǵy keńsharda zootehnık bolyp eńbek etken Salamadın aýyl sharýashylyǵyna qosqan úlesi úshin Lenınniń týǵanyna 100 jyl, Mańǵystaý oblysynyń qurylǵanyna 35 jyl, 50 jyl, Qaraqııa aýdanynyń qurylǵanyna 45 jyl tósbelgilerimen jáne birneshe alǵys hattarmen marapattalǵan. Jubaıy Aǵııa Balyqbaeva – aýyl sharýashylyǵy salasynan zeınetke shyqqan kóp balaly ana. Otaý qurǵandaryna 57 jyl tolǵan aýyl sharýashylyǵy salasynyń áýleti. Salamadın aǵa men «Altyn alqa» ıegeri Aǵııa apa otbasy 8 bala ósirip, olardan 29 nemere, 9 shóbere súıip otyr.

Baıqaý qorytyndysy boıynsha birinshi oryn Mańǵystaý aýdanynyń úlgili otbasy Nursebepovter otbasyna, ekinshi oryn qaraqııalyq Torlanovtar otbasyna, úshinshi oryn Beıneý aýdanynan qatysqan Qıdasovtar otbasyna berildi. 

El arasynda «ulyn uıaǵa, qyzyn qııaǵa qondyryp, nemere-shóberesin álpeshteı ósirip, shańyraǵynan shattyq lebi esken ónegeli ot­basylardyń kóptigi rızalyq sezimine bóleıdi.

Mańǵystaý oblysy