Al, bıyl bul maqsatqa 1 498,5 mıllıon teńge kóleminde qarjy bólingen. Sonymen qatar, ótken jylǵy «Ekologııa jyly» aıasynda oblys ákimdigi óńirdegi «Qorshaǵan ortany qorǵaý salasyndaǵy yntymaqtastyq týraly» 15 iri kásiporynmen memorandým jasasty. Olardyń qatarynda Eýroazıattyq energetıkalyq korporasııasy, «Qazaqstan alıýmınııi» AQ, Pavlodar munaı-hımııa zaýyty, «Neftehım LTD», «Kaýstık» AQ, «KSP Steel» JShS, «Maıkýben-Vest» JShS bar.
Memorandým aıasynda óndiristik kásiporyndar atmosferalyq aýaǵa monıtorıng júrgizý úshin avtomattandyrylǵan stansalardy ornata bastady. Mysaly, «Qazaqstan alıýmınııi» AQ sanıtarlyq qorǵaý aımaǵynyń shekarasynda optıkalyq monıtorıng júıesin qurdy.
Qazirgi tańda stansa synaq rejıminde jumys isteýde. Kásiporyndarda mundaı jumystar 2020 jyldan bastap kezeń-kezeńimen júzege asyrylady. Sanıtarlyq-qorǵaý aımaqtarynyń shekarasyn arnaıy belgilep, ekologııalyq jasyl beldeý qurylady.
Bıyl kásiporyndar aýmaǵynda 30 myń kóshet otyrǵyzylady dep josparlanýda. Al, óńirimizde jyl saıyn 650 myń tonna turmystyq qatty qaldyqtar shyǵarylady. Jınalǵan qaldyqtar kólemi 5,8 mıllıon tonnany quraıdy.
Qaıta óńdeýdiń (suryptaýdy qosa alǵanda) úlesi jalpy qaldyqtardyń 2,7 paıyzyn quraıdy. О́ńirdegi qaldyqtardy qaıta óńdeý saıasaty elimizdiń «Jasyl» ekonomıkaǵa kóshý tujyrymdamasyna sáıkes júzege asyrylýda. Qazir óńirimizde qoqysty suryptap jınaý júıesi qoldanylýda.
PAVLODAR