Baıqaý daryndy oqýshylardy anyqtaý, mýzykalyq sheberlikti arttyrý jáne jas mýzykanttardyń shyǵarmashylyq áleýetin damyta otyryp, ulttyq ónerimizdi ulyqtaýdy maqsat etedi. Baıqaýǵa elimizdiń túkpir-túkpirinen 12 jastan 16 jasqa deıingi 35 jas ónerpaz qatysty. Jıynda sóz alǵan «Jas Otan» jastar qanatynyń tóraǵasy Dáýlet Káribek qoǵamdy ulttyq mádenıet pen qaıta jańǵyrtý ıdeıasynyń tóńireginde odan ári toptastyrý maqsatynda ótkizilip otyrǵan jıynnyń jas urpaq úshin mańyzdy ekenine toqtaldy. Qazaq ulttyq óner ýnıversıtetiniń shyǵarmashyl tobynan quralǵan ádilqazylar sheshimimen «Úzdik kúıshi» atalymy boıynsha Bekasyl Sabyrov (Atyraý oblysy) 1-oryn, Baqdáýlet Janatbek (Jambyl oblysy) 2-oryn, Syrsuńqar Bazarbaıuly (Qyzylorda oblysy) 3-orynǵa ıe boldy. Al «Úzdik termeshi» atalymyna Nurasyl Azat (Nur-Sultan qalasy) 1-orynǵa, Jansaıa Faızýllaqyzy (Qyzylorda oblysy) 2-orynǵa, Aıjuldyz Qulymjan (Atyraý oblysy) 3-orynǵa laıyq dep tanyldy. «Dástúrli ánshi» atalymy boıynsha Bekbolat Baqtııaruly (Jambyl oblysy) birinshi júldeni jeńip alsa, Janarys Tabyldyǵa (Atyraý oblysy) júldeli ekinshi oryn, Shuǵyla Nurbaıǵa (Nur-Sultan qalasy) júldeli úshinshi oryn buıyrdy. Konkýrsqa qatysqan ózge órenderge sertıfıkattar men aqshalaı, baǵaly syılyqtar úlestirildi.
Respýblıkalyq, halyqaralyq baıqaýlardyń júldegeri atanyp júrgen atyraýlyq Bekasyl Sabyrov osy joly da «Úzdik kúıshi» atalymy boıynsha top jardy. Saltanatty keshte Qurmanǵazynyń «Kógala at» kúıin naqyshyna keltire sheber oryndaǵan ol bolashaǵyn kúıshilik ónerimen baılanystyrady.
«Alǵash dombyrany segiz jasymda qolǵa ustadym. Dombyrany úıretip, ónerge baýlyǵan Samal Múteıova esimdi ustazyma alǵys bildiremin. 2-synyp oqyp júrgenimde anam «senen kúıshi shyqpaıdy» dep dombyra úıirmesine qatysýyma qarsy bolǵan edi. Biraq ózim aıtqanymnan qaıtpaı qatysam dep sheshken edim. Búgingi bolǵan jarys bizdi jańa dostarmen tanystyrdy. Baıqaý aldaǵy ýaqytta jalǵassa deımin. Bolashaqta ataqty kúıshi bolýdy armandaımyn», deıdi Atyraý balalar saz mektebiniń oqýshysy Bekasyl Sabyrov.