Kásibı oryndaýshylyq deńgeıi men akterlik sheberligi jarasym tapqan Ádilxan Makın – qazylar alqasy men alty myńnan astam kórermenniń, onyń syrtynda tikeleı efırdi tamashalaǵan mıllıondaǵan festıval tyńdarmanyn án tabıǵatyn túsinetin syrshyldyǵymen tánti etti.
«Bizdiń tusymyzda Keńes Odaǵynyń atynan shyǵatyn ártisterge múlde basqa talaptar qoıylatyn. Bizder halyqaralyq konkýrstardyń jeńimpazy bolýymyz tıis edi. Búgingi jastarǵa qarap otyryp, sol sátter esime qaıta oraldy. Mundaı júkti jastar ǵana qaıyspaı kótere alady. Qazylyq etý de ońaı emes eken, bir jaqty tańdaý qıynǵa tústi. Al Ádilhan áý degende ozyp shyqty. Talantty ánshi vokalymen, sheber ártistik qabiletimen daralanyp tur. Ol – daýsyz jeńimpaz», deıdi Reseı men Grýzııanyń halyq ártisi, qazylar alqasynyń múshesi Tamara Gverdsıtelı.
Eki kúnge ulasqan baıqaýdyń qorytyndysy boıynsha 178 upaıdy qanjyǵasyna baılaǵan Ádilhan ózge qatarlastarynan osylaısha oq boıy sýyrylyp alǵa shyqty. Festıvaldiń saltanatty jabylýyna oraı ótken gala-konsertte jas talantqa «Lıra» qurmet músini tabystaldy ári 20 myń AQSh dollary kóleminde qarjylaı syılyqqa ıe boldy.