Memlekettik qyzmet isteri agenttiginiń Aqmola oblysy boıynsha departamenti oblystyń ortalyq memlekettik organdardyń aýmaqtyq bólimsheleriniń kadr qyzmeti ókilderiniń qatysýymen onlaın-semınar uıymdastyryp, onda personaldy basqarý boıynsha atqarylǵan jumystyń qorytyndylary qaraldy. Bul týraly Memlekettik qyzmet isteri agenttiginiń Aqmola oblysy boıynsha departamentiniń baspasóz qyzmeti habarlady.
Departament basshysynyń orynbasary Raıhan Brataeva óz sózinde konkýrstardy ótkizý Erejesine engizilgen negizgi ózgerister týraly habarlady. Konkýrstyq komıssııalardy qurý, konkýrstyq suraqtar tizimin qalyptastyrý talaptaryna erekshe nazar aýdaryldy. R. Brataeva konkýrstyq komıssııa jumysynyń ashyqtyǵy men aıqyndylyǵyn arttyrý maqsatynda Departament qyzmetkerleriniń konkýrstarǵa qatysqan úmitkerlermen keri baılanys ornatatynyn atap ótti.
Semınar barysynda Departamenttiń Memlekettik qyzmet basqarmasynyń basshysy Gúlmıra Evnıeva oblystyń memlekettik apparatynyń kadrlyq jaǵdaıy týraly aqparatpen bólisti. Qazirgi ýaqytta óńirdiń memlekettik organdarynda 5157 qyzmetker eńbek etýde. Bos oryndar sany 527 birlikti nemese 9,3% quraıdy. Qyzmetkerlerdiń 64% - yn áıelder, 20% - yn 29 jasqa deıingi jastar quraıdy. Memlekettik qyzmetshilerdiń ortasha jasy 39,8 jas. Jyl basynan beri oblysta 720 bos ákimshilik memlekettik laýazymdarǵa ornalasýǵa konkýrstar ótkizildi, onyń ishinde ishki konkýrstar - 283, jalpy konkýrstar – 429. Atalǵan konkýrstarǵa 563 adam qatysty. Laýazymdarǵa 340 tulǵa qabyldandy, bul 60,4% quraıdy.
Sondaı-aq, spıker óz sózinde merıtokratııa qaǵıdatyn ilgeriletý týraly habardar etti. Synaq merziminen ótý, tálimgerlerdi bekitý, memlekettik qyzmetshilerdiń taǵylymdamasyn uıymdastyrý boıynsha jumys qorytyndylary talqylandy. Personaldy basqarý qyzmetteriniń ókilderine óz qyzmetinde qoldanystaǵy zańnamany múltiksiz saqtaý, kadrlyq turaqtylyqty saqtaý máselelerine erekshe kóńil aýdarýǵa usynys berildi.