Eldigimizdiń eń basty nyshany sanalatyn Memlekettik rámizder kúnin laıyqty atap ótý el óńirlerinde júıeli túrde jalǵasyp keledi. Este bolsa 2019 jyldyń qazan aıynda Almatydaǵy Medeý shatqalynyń qaq tórinde elimizdegi eń úlken Tý tuǵyrǵa qonǵan bolatyn. Eni jeti al uzyndyǵy 14 metr bolatyn baıraq 40 metr bıiktiktiktegi temir tuǵyrdyń tóbesine ilingen. «Nur Otan» partııasy Tóraǵasynyń birinshi orynbasary Baýyrjan Baıbek tusaýyn kesken ıgi shara tutas el kóleminde jalǵasyn taýyp «Meniń Týym, meniń otanym!» aksııasyna ulasqan edi.
Álemdi ábigerge salǵan pandemııaǵa qaramastan osynaý ataýly mereke Almaty qalasynda bıyl da dástúr boıynsha atap ótildi. Karantındegi shekteý sharalaryna baılanysty onlaın rejiminde qanat qaqqan birqatar jobalardy jekeleı atap ótýge bolady. Sonyń biri «Jas Otan» Jastar qanatynyń uıytqy bolýymen júzege asqan aıryqsha baıqaý. Áleýmettik jeliniń áleýetin tıimdi paıdalanǵan jasotandyqtar jelidegi túrli paraqshalarda qala turǵyndaryn elimizdiń baıraǵymen túsken sýretterin jarııalaýǵa shaqyrdy. Baıqaýdyń basty sharty jarııalaǵan sýretińniń astyna «Meniń týym, meniń Otanym» heshtegin jazyp qaldyrý. Uıymdastyrýshylardyń sózinshe jobaǵa kez-kelgen jastaǵy Almatylyq qatysa alady. Jeńimpaz dep tanylǵan qatysýshyǵa Memlekettik Tý syılyq retinde tabystalmaq. Uıymdastyrýshylar baıqaýdyń basty maqsaty rámizderimizge qurmet kórsetip, jastar men barsha qoǵam ókilderin Otansúıgishtikke baýlý ekenin aıtady.
Sondaı-aq Almatydaǵy Qazaq ulttyq qyzdar pedagogıkalyq ýnıversıtetinde «Ultymyzdyń rámizderin qasterleıik» atty onlaın kezdesý ótti. Aýqymdy taqyrypty arqalaǵan beıne-konferensııaǵa belgili ǵalymdar men qoǵam qaıratkerleri, oqytýshylar men stýdent jastar qatysty.
«Týymyzdyń, basqa da rámizderimizdiń bıik turǵany halyq abyroıynyń sımvoly. Azattyqtyń altyn besigine balanatyn shaharymyzda bul kún erekshe saltanatpen atalyp ótilip kele jatyr. Nur Otan partııasynyń aýdandyq fılıaldarynda osy taqyrypty negizge alǵan onlaın júzdesýler ótti. Rámizderimizdi qurmetteý – qoǵamǵa ortaq borysh», – deıdi Nur Otan partııasy Almaty qalalyq fılıaly saıası jumys bóliminiń meńgerýshisi Qýanysh Tólepov.
ALMATY