Almatyda respýblıkalyq referendým qarsańynda Táýelsiz baıqaýshylar aqparattyq shtabynyń ekinshi brıfıngi ótti. Shtab daýys berý kezeńindegi jumysty úılestirý jáne qoǵamdy jedel aqparattandyrý maqsatynda qurylǵan.
Brıfıng barysynda qatysýshylar shtab jumysynyń belsendi kezeńi bastalǵanyn aıtty. Aqparattyq alań 14 naýryzdan bastap jumys istep, referendým ótetin kúni boıy jáne daýys berý qorytyndylary tolyq jarııalanǵanǵa deıin qyzmetin jalǵastyrady.
Uıymdastyrýshylardyń aıtýynsha, shtabtyń negizgi mindeti – azamattar men buqaralyq aqparat quraldaryn daýys berý barysy týraly jedel ári shynaıy aqparatpen qamtamasyz etý. Sonymen qatar jalǵan málimetter men feık aqparattardyń taralýynyń aldyn alý úshin aqparattyń dáıektiligin tekserýge erekshe nazar aýdarylmaq.
Shtab jumysynyń tikeleı translıasııalary Independ.kz YouTube arnasynda kórsetiledi. Al jedel jańalyqtar men anonstar Almaty qalasynyń Qoǵamdyq kommýnıkasııalar ortalyǵynyń resmı áleýmettik jelilerinde jarııalanyp otyrady.
Brıfıngte táýelsiz baqylaýshylar koalısııasynyń quramy da tanystyryldy. Onyń quramyna Almaty qalasynda 2,5 myńnan astam táýelsiz baqylaýshyny biriktiretin alty úkimettik emes uıym kirgen. Referendým kúni Astana, Almaty, Shymkent qalalarynan, sondaı-aq elimizdiń onnan astam óńirinen tikeleı qosylymdar uıymdastyrý josparlanyp otyr. Bul daýys berý barysy týraly jedel ári tolyq aqparat taratýǵa múmkindik beredi.
Brıfıngke qatysýshylar azamattardy referendým kezeńinde aqparatqa jaýapkershilikpen qaraýǵa, arandatýshylyqqa ermeýge jáne tek senimdi derekkózderge súıenýge shaqyrdy. Sondaı-aq azamattardyń daýys berýge qatysýy demokratııalyq úderisterdiń mańyzdy bóligi ekeni atap ótildi.
ALMATY