Túrkistan oblysynda «Memlekettik satyp alýdyń biryńǵaı terezesi» aqparattyq-taldaý júıesi arqyly satyp alý salasyna júrgizilgen monıtorıngtik jumystardyń nátıjesinde 5 aıda 372 mln teńgege jýyq bıýdjet qarajaty únemdeldi, - dep habarlaıdy Egemen.kz.
Bul jóninde Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı málimdedi. Júrgizilgen zerdeleý jumystarynyń nátıjesinde, memlekettik organdar men kvazımemlekettik sektor sýbektileri josparlaǵan memlekettik satyp alýda negizsiz baǵany ósirý faktileri kórinis tapqan.
Qabyldanǵan usynystardyń qorytyndysymen monıtorıng nátıjesinde bıýdjettiń 371 839 952 teńgesi únemdelip, birqatar mekemelerge josparlanǵan somany medıandyq baǵaǵa keltirip, qaıta engizý tapsyryldy. Al, Kentaý qalalyq turǵyn-úı kommýnaldyq sharýashylyq turǵyn úı ınspeksııasy bólimi men «Jasyl Kentaý» JShS-y arasynda saıabaqtardy, tálimbaqty jáne jasyl aımaqty kútip ustaý úshin 32 366 600,40 teńgege 9 sáýirde kelisimshart túzilgen. Alaıda, atalǵan mekemeler arasynda 3 kúnnen soń jalpy somasy 135 953 727,68 teńge bolatyn qosymsha kelisim shart jasalǵan. Dál osy qosymsha kelisimsharttyń negizdiligi boıynsha Departamentpen tıisti jumystar júrgizilip, nátıjesinde bıýdjet qarajatynyń 103 587 127 teńgesi únemdeldi.
Departamenttiń baspasóz qyzmeti habarlaǵandaı, Sybaılas jemqorlyqqa qarsy is-qımyl agenttigi «Atameken» Ulttyq kásipkerler palatasy birlesip, «Satyp alýdyń biryńǵaı terezesi» aqparattyq-taldaý júıesi arqyly taýarlar men qyzmetterdiń ortasha baǵasyn ózge lottyń jarııalanǵan baǵasymen nemese naryqtyq baǵamen salystyrýǵa múmkindik alyp otyr. Bul portaldyń tapsyrys berýshiler men bıýdjet ákimshileriniń negizsiz baǵany tómendetý nemese kóterip qoıý, jetkizý merzimin qysqartý, belgili bir ónim berýshige qoldaý bildirý tárizdi sybaılas jemqorlyq táýekelderi kórinisterin anyqtaý qabileti avtomattandyrylǵan.
Túrkistan oblysy