Koronavırýstyń taralýyna jol bermeý jónindegi vedomstvoaralyq komıssııa 31 tamyzda koronavırýstyq ınfeksııamen aýyrǵandarǵa qatysty aqparat taratty, - dep habarlaıdy Egemen.kz.
"Qazirgi ýaqytta koronavırýstyq ınfeksııadan 7 910 adam em qabyldaýdy jalǵastyrýda. Olardyń arasynda 32 óskinshek bala bar. Stasıonarlarda 3 755 naýqas jatyr. 4 155 adam ambýlatorııalyq jaǵdaıda emdelýde. Jalpy naýqastardyń arasynda 201 adamnyń ahýaly nashar. Sonyń ishinde 35 naýqastyń ahýaly asa qatty aýyr dep baǵalanýda. 42 naýqas ókpeni jasandy jeldetý apparatynda jatyr", - delingen habarlamada.
Sondaı-aq habarlamada 31 tamyzdaǵy jaǵdaı boıynsha COVID-19 belgileri bar pnevmonııamen syrqattanýshylar jónindegi derekter bar.
"О́tken táýlikte COVID-19 belgileri bar pnevmonııamen syrqattanýshylardyń 56 jaǵdaıy tirkeldi, 6 jaǵdaı ólimmen aıaqtaldy. Bir táýlik ishinde 26 adam jazylyp shyqqan", - delingen habarlamada.
Qazaqstanda 1-31 tamyz aralyǵynda naýqastar sany – 25 714-ke jetti, ólim jaǵdaılary - 290, barlyǵy 5 575 adam saýyǵyp shyqty.