Memlekettik hatshy Qyrymbek Kósherbaev jumys sapary barysynda Almaty qalasynyń ákimi Baqytjan Saǵyntaevpen birge Almatynyń ǵylymı jáne shyǵarmashylyq zııaly qaýym ókilderimen kezdesti. Kezdesýde Memleket basshysy Qasym-Jomart Toqaevtyń "Jańa jaǵdaıdaǵy Qazaqstan: is-qımyl kezeńi" Qazaqstan halqyna Joldaýyndaǵy basym mindetterge toqtaldy, - dep habarlaıdy Egemen.kz.
Kezdesýdi ashqan Memlekettik hatshy Memleket basshysynyń bıylǵy Joldaýy - bul pandemııa men jahandyq ekonomıkalyq daǵdarys jaǵdaıyndaǵy Qazaqstannyń jańa áleýmettik-ekonomıkalyq damý baǵyty ekenin atap ótti. Aldaǵy barlyq ózgerister memlekettiń jumys isteý tıimdiligin arttyrýǵa, ózekti áleýmettik-ekonomıkalyq problemalardy sheshýge baǵyttalǵan.
Qyrymbek Kósherbaev qazirgideı kúrdeli kezeńde zııaly qaýym daǵdarystyq jaǵdaılardyń aldyn alýda, halyqtyń jańa biregeıligin qalyptastyrýda ózindik ról atqarýy tıis ekenin atap ótti. Bul rette, jańa kezeńniń syn-qaterlerin eskere otyryp, birinshi kezekte, uly Abaıdyń baǵa jetpes murasyn qaıta zerdeleý, zııaly qaýymnyń ulttyń jańa rýhanı qasıetterin qalyptastyrýdaǵy mıssııasyn tereń túsiný qajet.
Tuńǵysh Prezıdent - Elbasy Nursultan Nazarbaev usynǵan "Rýhanı jańǵyrý" baǵdarlamasyn iske asyrýda onyń mazmunyn baıytyp, serpin berý kerek. Mysaly, halyq dástúrleri men ádet-ǵuryptaryn saqtaý jáne qorǵaý máselelerin quqyqtyq retteý boıynsha ǵalymdar men qoǵam qaıratkerlerinen turatyn jumys tobyn qurý qajet.
Daǵdarys dáýirinde jáne aldaǵy bolashaqta ulttyń damýynyń negizi eń aldymen otbasy men otbasylyq tárbıe bolýy kerek. Orta mektepterde otbasylyq qundylyqtarǵa baǵdarlanǵan arnaıy pánderdi engizýdi qarastyrýdyń, jastardy otbasylyq tárbıeleýdiń jalpyulttyq ádistemesin ázirleýdiń ýaqyty keldi.
"El Prezıdenti Joldaýda belgilegen keleli mindetter men basym baǵyttardy barshańyz tyńdadyńyzdar. Sonyń ishinde, búgin biz sizdermen "Ulttyń jańa bolmysy" baǵyty boıynsha jan-jaqty oı qozǵap, pikir almasýdy usynamyz.
Qasym-Jomart Kemeluly Joldaýda "Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý ekenin atap ótip, ultymyz jańa sapaǵa kóshýi úshin bizdiń kúndelikti ómirlik ustanymdarymyz da ózgerýi kerektigin, qazaq qoǵamynda jańa qaǵıdattar jáne jańa baǵdarlar saltanat qurýǵa tıis ekenin aıtty. Olar "Rýhanı jańǵyrý" baǵdarlamasyna jańa tynys, jańa ózgerister ákelýi kerek dep oılaımyz.
Memleket basshysy jıyrma birinshi ǵasyrdyń urpaǵy tereń bilimdi bolǵanyn, jas býyndy erinbeı eńbek etýge beıimdeý qajettigin, kez-kelgen isti kásibı daǵdy arqyly júzege asyrýdy, sondaı-aq temirdeı tártip jáne joǵary jaýapkershilik barshamyzdyń boıymyzda bolýy kerektigin alǵa mindet etip qoıdy. Sonymen qatar ádildikten aınymaýdy, ádildik – qoǵam damýynyń mańyzdy sharty, ásirese, el-jurttyń taǵdyryn sheshý úshin asa qajet qasıet ekenine toqtalyp, "bizge keregi – adaldyq, uqyptylyq, tııanaqtylyq. Bárimiz naǵyz qazaqty dál osyndaı keıipte kórgimiz keledi. Biz sonda ǵana básekege qabiletti memleket, zııatker ult qalyptastyra alamyz", dep atap ótti Q.Kósherbaev.