Eń qymbaty – el senimi

El senimin nyǵaıtýda Ádep jónindegi keńesterdiń róli zor. Atalǵan alqaly organdar quqyq buzýshylyqtardyń aldyn alý salasynda kóp is tyndyrýda. Ádep kodeksinde memlekettik qyzmetshilerdiń qyzmettik mindetterin oryndaýǵa, qyz­met­ten tys ýaqyttaǵy júris-tury­syna, kópshilik aldynda, onyń ishinde buqaralyq aqparat qural­dary aldynda sóıleýine baılanysty minez-qulyq standarttary aıqyndalǵan.

Osy standarttarǵa sáıkes, ba­ryn­sha mádenıetti bolýy, tár­tipti qatań saqtaýy tıis. О́ıt­keni memlekettik qyzmettegi adam­dar jeke basynyń úlgi-ónegesi arqyly el ishinde jaqsy­lyq mysaly bolýǵa tıis. Alaı­da memlekettik tártipti ny­ǵaı­tý jolynda atqarylyp jat­qan qanshama jumystarǵa qara­mas­tan, quqyq buzýshylyq faktileri kezdesip qalady. Sońǵy úsh jyl ishinde Ádep jónindegi keńestiń 30 otyrysy ótip, onda barlyǵy 220 másele qaraldy. Bulardyń 71 paıyzy – quqyq buzýshylyqtyń aldyn alýǵa baǵyttalǵan sharalar.

Tártiptik isterdi qaraý nátı­je­leri boıynsha Ádep jónindegi keńes laýa­zymdy tulǵalardy tártiptik jaýap­ker­shilikke tartý týraly ýákiletti organdarǵa 54 usynym engizgen. Atap aıtqanda, 54 tulǵanyń 27-si memlekettik qyz­mettiń bedeline nuqsan kelti­retin áreketter jasaǵany úshin, taǵy da 27-si Qazaqstan Respýb­lıkasy memlekettik qyzmet­shi­leriniń Ádep kodeksi normalaryn buzǵany úshin tártiptik jaýapkershilikke tartyldy.

Osy ýaqyt ishinde Ádep jó­nin­­degi keńes túrli deńgeı­ler­degi 15 ákim­niń, 3 qala men aý­­dan­ ákimderi oryn­basar­lary­­nyń, sonymen qatar birqa­­tar oblystyq jáne aýdan­dyq mem­le­kettik organdar bas­shy­lary­nyń jaýap­ker­shiligin qaras­tyrǵan. Tártiptik isterdi qaraý qorytyndysy boıynsha 11 qyz­met­ker laýazymdarynan bosaty­lyp, 32-si qyzmetine tolyq sáı­kes emestigi túrinde eskertý aldy.

Bul oraıda, memlekettik satyp alý, sáý­let, jer qaty­nas­tary sala­lar­ynda quqyq buzý­shy­lyqtarǵa jıi jol beriletinin atap kórsetýge tıis­timiz. Sondaı-aq basshylardyń óz qara­ma­ǵyndaǵy qyzmetkerlerimen ózara is-qımyly kezinde Ádep kodeksi norma­la­rynyń buzylýy jıi oryn alýy qyn­jyltady. Atalǵan tártip buzýshy­lyq­tardy eskere otyryp, olardy boldyr­maý maqsatynda, aldaǵy ýaqytta Ádep jó­nindegi keńestiń kóshpeli otyrystary ótkizilip, ony barysynda azamattar­dy jeke qabyldaý jáne túsindirý is-sha­ralary júrgiziledi. Aǵymdaǵy jyly karantın rejimin eskere otyryp, Mem­lekettik qyzmet týraly zańnamany túsindirý boıynsha, onyń ishinde qol astyndaǵylardyń sybaılas jemqorlyq quqyq buzýshylyqtar jasaǵany úshin basshylardyń derbes jaýapkershiligi jáne saıa­sı qyzmetshilerdiń otstavkasy ınstıtýtyn iske asyrý boıynsha birqatar onlaın semınarlar ótkizildi.

Ádep kodeksiniń buzylýyna jol bergen memlekettik qyzmetshi jem­qorlyq jasaýǵa beıim ekeni barshaǵa málim. Sol sebepti, ádep normalaryn qatań saqtaý óz laýazymyn jeke maqsattarda paıdalanýǵa jáne jem­qorlyqtyń týyndaýyna keri áser etetin bóget retinde qabyldanýy tıis. Árbir memlekettik qyzmetshi óz mindetterin kásibı turǵyda ári sapa­ly oryndap, tártipke qatań baǵy­na bilýi qajet. Sondyqtan óz ýáki­lettigi sheńberinde Ádep jónindegi keńes memlekettik organdardyń qyz­met­in­degi zańdylyq pen tártipti nyǵaıtýdy qatań baqylaýda ustaıtyn bolady.

Darhan HAIRÝLLIN,

Memlekettik qyzmet isteri agenttiginiń Aqmola oblysy boıynsha departamenti basshysynyń orynbasary