Úrjar aýdanynda mal urlaǵandar qamaýǵa alyndy. Jedel izdestirý sharalary barysynda Altynshoqy aýylynyń 33 jáne 43 jastaǵy turǵyndary ustaldy, dep habarlaıdy Egemen.kz.
Kúdiktilerdiń biri buryndary sottalǵan eken. Qazirgi ýaqytta ekeýiniń segiz ret urlyq istegeni anyqtaldy. Bıyl tamyzda olar Taskesken aýylynyń mańynan bes bas jylqyny aıdap alyp ketken. Olar negizinen jaz kezindegi túngi ýaqytta áreket etken. Keltirgen shyǵynnyń mólsheri shamamen 3 mıllıon teńge kóleminde.
– Urlaǵan maldardy Túrkistan qalasynyń turǵynyna satyp jibergen. Al odan túsken qarajatty óz qajettilikterine jumsaǵan. Sondaı-aq tintý kezinde 200 kılogrammǵa jýyq iri qara eti, eki qulyndy bıe jáne birneshe maldyń terisi tabyldy, - deıdi oblystyq Polısııa departamentiniń bastyǵy Saǵat Mádıev.
Atalǵan fakti negizinde qylmystyq kodekstiń 188-1-baby, 2-tarmaǵy, 1 - tarmaqshasy, ıaǵnı «Toptasqan mal urlyǵy» boıynsha sotqa deıingi tergeý amaldary júrgizilýde.
Shyǵys Qazaqstan oblysy