Parıj bıligi 6 qazannan bastap koronavırýstyń taralýyna qarsy sharalardy kúsheıtý týraly sheshim qabyldady, dep habarlaıdy Egemen.kz.
Jańa sharalar Parıjge jáne onyń soltústiginde, soltústik-shyǵysynda jáne batysynda ornalasqan Sena-Sen-Denıs, Val-de-Marn jáne O-de-Sen, ıaǵnı 7,5 mıllıonnan astam turǵyny bar aımaqtarǵa qatysty. "Seısenbiden bastap barlyq barlar jabylady. Meıramhanalar jańa sanıtarlyq erejelerdi qatań saqtaı otyryp jumysyn jalǵastyrady", - delingen qala ákimdiginiń habarlamasynda.
Parıjde 1 myńnan astam adamnyń qatysýymen is-sharalar ótkizýge tyıym salý jumysy jalǵasady. Bul rette jańa ereje engiziledi, oǵan sáıkes kósheler men alańdarda 10-nan astam adamnyń jınalýyna bolmaıdy. Sport klýbtary men fıtnes zaldary jabylady, basseınder tek mektep oqýshylary úshin jumys isteıdi. Stadıondar men oıyn alańdary ashyq aýada jumysyn jalǵastyrady, bul rette ashyq aspan astyndaǵy stadıondar úshin 1 myń kórermenge arnalǵan shekteýden basqa, 50% - dan astam orynǵa ornalastyrýǵa tyıym salynady.
Qalalarda keshki saǵat 22.00-den bastap alkogol satýǵa, sondaı-aq mýzykanyń daýysyn qatty shyǵarýǵa tyıym salynady. Qoǵamdyq oryndarda stýdenttik keshter men otbasylyq merekeler toqtatylady, úılený toılaryn ótkizýge ruqsat berilmeıdi. Sondaı-aq oıyn úıleriniń jumysy, jármeńkeler, kórme jáne saýda salondarynyń jumysy ýaqytsha toqtatylady.