Nur-Sultan qalasy sportshylaryna beriletin aı saıynǵy aqshalaı qamtý mólsheri ósti, dep habarlaıdy Egemen.kz elorda ákimdigine silteme jasap.
Sonymen qatar elimizdiń basqa aımaqtarymen salystyrǵanda, elordalyq sportshylardy aı saıyn aqshalaı qamtamasyz etý mólsheri eń tómengi kórsetkishti kórsetken.
Osyǵan oraı Dene shynyqtyrý jáne sport basqarmasy tarapynan qalalyq máslıhat pen qoǵamdyq keńeske usynys jasalyp, atalǵan máseleni qala ákimi Altaı Kólginov qarastyra kele, aı saıynǵy tólemderdi ulǵaıtýǵa qoldaý bildirdi.
"Aılyq tólemderdi kóbeıtý elorda sportshylarynyń materıaldyq qajettilikterin sheship, sportta joǵary nátıjelerge jetýine septigin tıgizedi. Ulǵaıtylǵan tólemder bıyl qazan aıynan bastap sportshylarǵa tólenetin bolady", dedi Nur-Sultan qalasynyń Dene shynyqtyrý jáne sport basqarmasy basshysynyń mindetin atqarýshy Erǵalıev Samat Serikqanuly.Aı saıyn tólenetin aqshalaı qamtamasyz etiletin sportshylar: sport túrleri boıynsha QR qurama komandalarynyń (ulttyq qurama komandaǵa kiretin) quramyna kiretin elordalyq sportshylar, olardyń jattyqtyrýshylaryna, sondaı-aq sporttyq oıyn túrleri boıynsha QR qurama komandalarynyń (ulttyq qurama komandalardyń) quramynda óner kórsetetin sportshylarǵa, olardyń jattyqtyrýshylary men klýbtyq komandalardyń jetekshilerine beriledi.
Eger jańa qaýlyǵa deıin olımpıadalyq sport túrleri boıynsha Olımpıada oıyndarynyń qorytyndysy boıynsha sport sheberleri 97 334 teńge alsa, qazir 250 AEK-ke nemese 694 500 teńgege deıin ósti.
Álem chempıonatynyń qorytyndysy boıynsha olımpıadalyq sport túrlerinen sport sheberleri 93 794 teńge alsa, qazir olardyń tólemderi 100 AEK-ke deıin, ıaǵnı 277 800 teńgege deıin artady .
Azııa Chempıonatynyń qorytyndysy boıynsha olımpıadalyq sport túrlerinen sport sheberleri buǵan deıin 83 176 teńge alǵan. Jańa qaýly boıynsha olardyń tólemderi 80 AEK-ke deıin, ıaǵnı 222 240 teńgege deıin ósti.
QR Chempıonatynyń qorytyndysy boıynsha olımpıadalyq sport túrlerinen sport sheberleri 79 637 teńge alsa, jańa qaýly boıynsha olardyń tólemderi 60 AEK-ke, ıaǵnı 166 680 teńgege deıin ósti.
"Elorda sporty tarıhyndaǵy eń qýantarlyq jańalyqtyń biri desek artyq aıtqanymyz emes. Bul qala sportshylaryna bir serpin bereri sózsiz", dedi bokstan Olımpıada oıyndarynyń kúmis júldegeri Vasılıı Levıt.
"Shynymen qýanyshtymyz. Biz sekildi sportta endi ósip kele jatqan jas býyn úshin úlken motvıasııa bolmaq. Sportshylar atynan qala ákimdigine, basqarmaǵa shynaıy úlken alǵysymyzdy bildiremiz", dedi bokstan jastar arasynda Olımpıada oıyndarynyń jeńimpazy Aıbek Oralbaı.
Aıta ketsek, buǵan deıin Nur-Sultan qalasynyń qurama komandasyna kiretin tek 84 sportshy aı saıynǵy tólem alyp kelse, endi olardyń sany 176-ǵa jetti.
Esterińizge sala keteıik, bıyl QIK-pen birge áleýmettik baspana alýshylar sanaty keńeıtildi, oǵan sport qaıratkerleri de kirdi. 1 myń áleýmettik páterge dárigerler men muǵalimderden basqa áleýmettik qyzmetkerler, polıseıler, mádenıet qaıratkerleri de úmitker bola alady.