Máskeýdiń jańbyry tas burshaq sııaqty. Áınekti aıaýsyz urǵylap jatyr. Terezege jaqyn kelip, tumshalaǵan qarańǵyǵa úńilip turǵan ol «terezemdi urmańdarshy, tamshylar» dep kúbirledi. Jan-júregin tebirente áldılegen saǵynyshtyń kúıi «Iýnost» meımanhanasyndaǵy jańbyrly túni án bolyp týǵan edi.
Arman oty jaǵylǵan janaryńda «sol bir aıaýly beınege qaıta bir jolyǵyp qalsam» degen úmit jańbyrly tún qoınaýynda mazdaı túsedi. Kóz jasyndaı syrǵyp bara jatqan áınektegi tamshy «saǵyndyń ba?» dep sybyrlaǵandaı. Súıgenin saǵynǵan ǵashyq júrek «terezemdi urmańdarshy, tamshylar» dep ántek ún qatady. Aqynnyń júregine tunǵan tańǵy shyqtaı móldir jyr júrekterge órnek saldy.
«Aldy-artyma qaramaı Máskeýge oqýǵa attandym. Bir jyl úırene almaı júrdim. Máskeýdiń jańbyry da, adamdary da, kósheleri de unamady. Kóshede ketip bara jatqan bireýden jón surasań, ursyp beredi. Áıteýir alǵashqy kezde qala sýyq bolyp kórindi. Onyń ústine súıgenimdi saǵyndym. Birde ony oılap turǵan edim, kenet jańbyr jaýa bastady. Sosyn bir óleńniń týyp kele jatqanyn baıqap, dereý qaǵaz-qalamymdy alyp jaza bastadym», deıdi О́tegen Kúmisbaev.
...Túnimenen, túnimenen terezemdi
tamshy urdy,
Túnimenen aıtyp jatty
jan syrdy, jan syrdy.
Túnimenen, túnimenen óziń jaıly
tús kórip,
Jumyr basqa mazasyz oı san kirdi,
san kirdi.
Terezemdi urmańdarshy,
tamshylar...
...Bir qyzyǵy, kóńilderdi saǵynyshqa kómkerip, sózimen úndese jarasqan ánniń sazy da jańbyrly túni týypty. Ásireleýsiz, shyndyǵynda solaı. Sazger Ahmadııar Esmuqanovtyń baspasózge bergen erterektegi suhbatynda «Bul – ińkár júrektiń úni edi» deıdi. «Tún ortasynda bireý esik qaqqandaı boldy. Dala tastaı qarańǵy, jańbyr jaýyp tur. Syrtqa júgirip shyqsam, eshkim joq. Sóıtsem, qyzdyń názik saýsaǵymen esik qaqqandaı bolǵan óz júregimniń dúrsili eken. Sol túni uıyqtaı almaı, dóńbekship shyqtym. Bir apta yńyldap júrip, án shyǵardym», dep eske alady sazger. Biraq kóńiliniń syrly aınasyndaı bolǵan áýenniń ajaryna oraılasar laıyq mátin taba almaı qınalady. Kúnderdiń bir kúni kitaphanada О́tegen Kúmisbaevtyń «Aq monshaq» atty jyr jınaǵy oıda joqta qolyna túsip qalyp, izdep júrgen joǵynyń ústinen túskendeı qatty qýanady.
Máskeýdegi jastyq shaǵynyń jalyndy jyldaryn artqa tastaǵan О́tegen Kúmisbaev aǵamyz jyryna arqaý bolǵan jan jaryn qasyna ertip, Almatyǵa oralady. Bul ýaqytta tyńdarman qaýymǵa áni men jyry ajyraǵysyz egizdeı bolyp ketken «Tamshylar» áni ABK tobynyń oryndaýynda halyq arasyna keń tarap ketken shaǵy edi. Arada jyldar ótkende án avtorlary Almatyda kezdesken de. Kezdesip rıza bolyp, aıryqsha iltıpat bildirgen.
– Mahabbat týraly shyǵarma eshqashan óshpeıdi ǵoı, bul týyndy kóp taralady dep oılamaǵanmyn. 1977 jyly men ándi shyǵaryp edim, qazir án meniń atymdy shyǵaryp júr. Shyǵarmashylyǵymdaǵy shoqtyǵy bıik dúnıelerdiń biregeıi osy án, – deıdi sazger Ahmadııar Esmuqanov.
Jan syry men qaltqysyz kóńildi, qarańǵyǵa sińip jatqan jeńil tynysty ón boıyna darytqan án mahabbattyń móldirine, káýsar tazalyǵyna eriksiz sendiredi. Názik án salǵan saksofon úni tez sýynatyn súıispenshilikke emes, shynaıy jan syryna elitedi. Tereńnen syr tarqatqan estelikterdegi eskirmeıtin áńgime júrek túkpirindegi tuńǵıyq, túpsiz máńgilikterge osylaı sálem joldaıdy. Janaryńyzdy, janyńyzdy kirbiń shalyp júrse, saǵynyshyńyzdy áldeqaıda umyt qaldyrǵan bolarsyz, bálkim?! Tereńde jatqan tunyq dúnıeńizge úńilip kórińiz, syrt álem qulaǵyńyzǵa «terezemdi urmańdarshy, tamshylar» dep sybyrlasyn. Al tyńdarmannyń júreginde jattalǵan jaqsy ándi búgin talaılar oryndap júr, áli de oryndala bermek.