11 qazanda Soltústik Qazaqstan oblysynda jeke aýlalarda 22 qustyń ólimi tirkeldi. Bul týraly QR Prezıdenti janyndaǵy Ortalyq kommýnıkasııalar qyzmetinde ótken brıfıngte QR AShM Veterınarııalyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanov málimdedi
Onyń aıtýynsha, respýblıkanyń basqa aımaqtarynda qustyń qyrylýy tirkelmegen. Sońǵy 10 kúnde joǵarǵy potagendi qus tumaýynan ólim-jitimniń tirkelgen jaǵdaılarynyń statıstıkasyn eskere otyryp, Veterınarııalyq baqylaý jáne qadaǵalaý komıteti komıtetiniń mamandary Qazaqstanda qustardyń ólimi tolyq toqtaǵanyn atap ótti.
T.Qabdoldanov qyrkúıek aıynyń ortasynan bastap Qazaqstan Respýblıkanyń 7 oblysynyń 78 eldi mekeninde karantın engizilgenin eske saldy. Bul rette Aqtóbe jáne Túrkistan oblystarynda, Shymkentte, sondaı-aq Aqmola oblysynyń úsh aýdanynda, Jambyl oblysynyń eki aýdanynda, Qyzylorda oblysynyń bir aýdanynda jáne SQO-nyń eki aýdanynda qus tumaýy rastalmady.
"Qyrkúıek aıynyń ortasynan bastap jeke qosalqy sharýashylyqtarda joǵary patogendi qus tumaýyn juqtyrýdyń saldarynan 25 myńǵa jýyq qus ólimi tirkeldi. Sonymen qatar, ınfeksııa oshaqtarynan 20 177 bas qus tárkilendi. Osylaısha, qazirgi ýaqytta barlyǵy jeke qosalqy sharýashylyqtaǵy 45 110 bas qusqa, onyń ishinde 27 393 bas taýyq, 777 kúrketaýyq, 10 141 qaz, 6 799 bas úırek úshin ótemaqy beriledi", – dep naqtylady spıker.
Qazaqstanda joǵarǵy potagendi qus tumaýynyń odan ári taralýyna qarsy tıimdi sharalardyń biri - zardap shekken aımaqtarda jáne jabaıy qustardyń ushý baǵyty boıynsha qustardy jedel ári jappaı vaksınasııalaý boldy.
2020 jylǵa jospar boıynsha aqpan aıynda qus tumaýyna qarsy vaksınalaýǵa shamamen 3,4 mln doza bólindi. Qyrkúıek aıynda SQO-da qustardyń jappaı qyrylýy bastalǵan kezde indet tabylǵan oshaqtardy oqshaýlaý úshin qosymsha 2,3 mln doza, sodan keıin taǵy 2 mln doza bólingen bolatyn.
Osylaısha, májbúrli vaksınasııalaý aıasynda elimizdiń 3 261 eldi mekeninde 2,8 mln astam qus basy qus tumaýyna qarsy egildi. Búginde vaksınasııalaý Aqmola, Shyǵys Qazaqstan, Qyzylorda oblystarynda jáne Nur-Sultan qalasynda tolyǵymen aıaqtaldy.
Sondaı-aq, T.Qabdoldanov álemdegi qus tumaýy boıynsha epıdemıologııalyq jaǵdaı shıelenise túskenin aıtty. 2020 jyldyń qyrkúıeginde álemniń 26 elinde joǵary patogendi qus tumaýy anyqtaldy. Mysaly, kórshi Reseı Federasııasynda búginde jeke qosalqy sharýashylyqtarda jáne bir qus fabrıkasynda 1,5 mıllıonnan astam qustyń qyrylýy tirkelgen.