Ala jazdaı tabıǵat aıasynda, kól jaǵasynda demala bilgenimizben, sońymyzda qalǵan qoqysty jınastyrýdy umytyp ketip jatamyz. Umytqandyq pa, álde mádenıetsizdik pe? Tárbıeniń de joqtyǵy shyǵar. Al shashylǵan polıetılen bótelke, qapshyqtar júzdegen jyldar boıy shirimeıtinin biletin shyǵarsyz.
Tabıǵat anany aıaýsyz lastaǵanymyzben qoımaı, qoqystyń shashylyp jatqanyn aıtyp, basshylyq tarapty kinálaıtynymyz taǵy bar. Bir jaǵynan qoqys konteınerin qoımaǵandyqtan kináli de shyǵar, alaıda Japonııadaǵydaı árkim óz qoqysyn ózi alyp ketse eshqandaı másele týyndamaıtyn edi. Iá, barshamyzǵa aldymen joǵary deńgeıdegi mádenıet pen sana kerek.
Memleket basshysy Qasym-Jomart Toqaev Qazaqstan halyqyna Joldaýynda «Mektepter men joǵary oqý oryndarynda óskeleń urpaqqa ekologııalyq tárbıe berý isine jetkilikti nazar aýdarý qajet. Qoǵamda ekologııalyq qundylyqtardy ornyqtyrýǵa úndeıtin «Birge taza Qazaqstan» ekologııalyq aksııasyn júıeli túrde ótkizip turǵan jón» degen bolatyn.
Jýyqta ǵana ekologııalyq qaýipsizdik ortalyǵynyń ókilderi, oblystyq qoǵamdyq keńestiń saraptamalyq jumys toptary, eriktiler qozǵalysynyń músheleri Dubyǵaly kóliniń jaǵasyn qoqystan tazartty. Jazdaı shashylǵan qaldyqtardy qapqa qaptap, tıisti orynǵa jetkizdi. Eriktiler bir kúnde 200 qaptaı qoqys shyǵarǵan eken. Tazalanbaǵany qanshama?!
Tabıǵat janashyrlary qoldaý bildirgen aksııanyń basty maqsaty – tabıǵatqa degen adamzattyń mahabbatyn oıatý, qorshaǵan ortany, ózen-kólderdi lastamaýǵa úndeý edi. Ras, dóńgelengen dúnıe búginmen toqtap qalmaıdy. Kele jatqan keleshek urpaq bar. Búgin shashylǵan qoqystan erteń solar zııan shegip jatpasyna kim kepil?!
– Birinshiden, tabıǵatqa obal. Ekinshiden, adamdardyń sana-sezimine tańǵalamyn. Olar bıyl kelip demalsa, kelesi jyly taǵy keledi. Árqaısysynyń astynda bir-bir kólik. Sonda qaptaryn ala kelip, qoqystaryn salyp ala ketý qıyn ba?! Jaǵalaýdyń tap-taza bolyp turǵany ózderine jaqsy emes pe?! Al olar erteńin oılamaıdy, – deıdi aksııaǵa qatysýshy Dmıtrıı Koreshkov.
Sondaı-aq tazalyq aksııasyn uıymdastyrýshylardyń pikirinshe, zańdy túrde ár ujym, stýdentter men mektep oqýshylary jylyna bir ret belgilengen oryndardy tazalap otyrsa qorshaǵan orta munshalyqty lastanbas edi. Al olar óz qoldarymen tazalaǵan jerge ekinshi ret qoqys tastaı qoımaıdy. Sonymen qatar jaǵalaýdy lastaǵan azamattarǵa aıyppul mólsherin kóbeıtip, qadaǵalaýdy kúsheıtý kerek desedi.
Endi oılap qaraıyq, bir kúnde jaǵalaýdan 200 qaptaı qoqys shyǵaryldy. Al kól túbine qansha qaldyq ketkeni bizge belgisiz.
Shyǵys Qazaqstan oblysy