Almatyda turmystyq zorlyq-zombylyq qurbany bolǵan áıelderdi qoldaý maqsatynda erekshe art-ınstallıasııa qoıyldy. Báribaev kóshesindegi 36-shy úıdiń ortalyq kóshege qaraıtyn qabyrǵasyna tórt metrlik órilgen burym ilingen.
Bul buryn О́zbekstan elshiligi ǵımaraty bolǵan eńseli, aq shańqan úı. Eger Almatynyń kúzgi aýa raıy qolaıly bolyp jatsa, bilekteı burym kúzdiń sońǵy kúnderine deıin ilýli tura bermek. Shashbaý taǵylǵan burym áıelderdiń qatań turmys shyrmaýynda qalǵan sharasyzdyǵyn beıneleıdi. Art Prospect aıasynda iske asyrylǵan «Shash» jobasynyń avtory – almatylyq sýretshi Merýert Qýnaqova.
«Bul ıdeıa karantın kezinde oıǵa keldi. Ásirese osy búkil álem jappaı oqshaýlanǵan tusta turmystyq zorlyq-zombylyq oqıǵalary kóbeıdi. Eýropada tipti «maska-19» degen arnaıy kod oılap tapty. Iаǵnı dárihanaǵa kelgen áıelder osy arqyly ózine qaýip tónip turǵanyn jetkizip, áıelderge kómek kórsetilgen edi», deıdi sýretshi.
Ol áıelder men qyz balalardyń quqyqtaryn qorǵaýǵa jáne olardyń múmkindikteri aýqymyn keńeıtýge baǵyttalǵan aǵartý baǵytyndaǵy is-sharalar elimizde aýyq-aýyq kóterilgenimen, jalpy buqaralyq sıpatqa ıe emes ekenin aıtady. «Qazaqstanda, ókinishke qaraı, karantın kezinde turmystyq zorlyq-zombylyq jaǵdaıy kúrdeli boldy. Degenmen meniń oıymsha, bul taqyryp bizdiń elde asa bir ýshyǵa qoımaǵandaı kórindi. Pandemııa kezinde bizdiń bılik indet máselesine shuǵyl nazar aýdaryp, tipti osy taqyrypta qabyrǵa sýretteri de jasaldy», deıdi Merýert Qýnaqova.
Art Prospect – jyl saıyn ótetin qoǵamdyq óner festıvali. Osy ýaqytqa deıin festıvalǵa álemniń jıyrma shaqty elinen 250-den astam sýretshi qatysyp, shyǵarmashylyq qozǵalysty jańasha jandandyrdy. Mundaǵy maqsat – sýretshilerge jáne jergilikti turǵyndarǵa qalalyq ortany zertteýge, onyń estetıkalyq, tarıhı, mádenı jáne áleýmettik ólshemderin anyqtaýǵa jáne qaıta paıymdaýǵa múmkindik berý. «Meniń oıymsha, sýretshi úshin empatııa óte mańyzdy. О́zgelerdiń máselesine eshýaqytta beıjaı qaramańyz. «Shash» ıdeıasyn týdyrǵan da osyndaı kózqaras», deıdi Merýert.
Merýert kóterip otyrǵan áıel máselesin óner arqyly úndeý ıdeıasy qurmetteý, quqyq berý jáne qorǵaý sekildi tuǵyrly ustanymdardy negizge alady. Osy tusta Muhtar Áýezovtiń: «Adam balasynyń adamshylyq jolyndaǵy tappaq taraqııaty áıel haline jalǵasady. Sol sebepti, áıeldiń basyndaǵy tuman aıyqpaı, halyqqa adamshylyqtyń baqytty kúni kúlip qaramaıdy. Al qazaq meshel bolyp qalamyn demeseń, taǵylymyńdy, besigińdi túze! Ony túzeıim deseń, áıeldiń halin túze!» degen taǵylymdy sózi qoǵam talabyna aınalǵandaı. Endeshe, qazaq qyzynyń basynan bir tal shash túspesinshi!..