Toǵyzqumalaqtan Nazarbaev zııatkerlik mektepteri arasyndaǵy jelilik spartakıadanyń jeńimpazdary anyqtaldy. Alǵash ret ejelgi oıynnyń jankúıerleri óz qarsylastarymen onlaın formatta, PlayOk platformasynda kezdesti, dep habarlaıdy Egemen.kz
– Árıne, biz qashyqtan uıymdastyrylǵan oıyn aldynda qobaljydyq, – deıdi Pavlodardaǵy NIS oqýshysy Sanjar Boztaı, – biraq jattyqtyrýshylarymyzdyń arqasynda daıyndyǵymyz joǵary deńgeıde boldy.
Oıyn aldynda qatysshýlardy "Nazarbaev zııatkerlik mektepteri" DBBU basqarma tóraıymy Kúlásh Shámshıdınova quttyqtap "Toǵyzqumalaq tórt myń jyldyq tarıhy bar biregeı ulttyq oıyn. Ol shyǵarmashylyq pen logıkany damytady, sol sebepti de bul oıyn oqýshylarymyzdyń arasynda keńinen tanymal. Oıynǵa qyzyǵýshylyq tanytý – óz halqynyń tarıhy mnn mádenıetine jaqyndaı túsý", dep atap ótti.
Bul oıynmen ekinshi synyptan bastap aınalysyp júrgen Semeı qalasyndaǵy Zııatkerlik mektep oqýshysy, Abaı aýdanynda dúnıege kelgen Aıym Ákimbergenovanyń aıtýynsha, ol bul sport túrimen jastaıynan aınalysqan. Al osyndaı aýqymdy ári áıgili jarysqa alǵash ret qatysýy.
Petropavldaǵy Zııatkerlik mektep oqýshysy Janbatyr Seriktiń alǵashqy jattyqtyrýshysy − ákesi, onyń toǵyzqumalaqqa degen qyzyǵýshylyǵy otbasynda bastalǵan, aldymen ata-anasymen oınaǵan, al búginde spartkıadada mektep namysyn qorǵaýda.
Shymkent qalasyndaǵy fızıka-matematıka baǵytyndaǵy Zııatkerlik mektep oqýshysy Arsen Asylbekke toǵyzqumalaqtyń qyr-syryn anasy úıretken, atasy da bul oıyndy jaqsy oınaǵan. Búgin sporttyq áýlettiń izin Arsen jalǵap keledi.
Nur-Sultan qalasyndaǵy fızıka-matematıka baǵytyndaǵy Zııatkerlik mektep oqýshysy Tólepbergen Dıas alǵash ret óz aǵasymen synǵa túsken.
Spartkıadanyń kóp oıynshylary Nazarbaev zııatkerlik mektepterindegi toǵyzqumalaq oıynyna elordadaǵy fızıka-matematıka baǵytyndaǵy mekteptiń oqýshysy Amıra Hıanova men Shymkent qalasyndaǵy fızıka-matematıka baǵytyndaǵy mekteptiń oqýshysy Nuraı Mahambet sekildi kelgen.
Kóptegen oıynshy ózderiniń óńirlik jáne respýblıkalyq jarystaǵy jeńisterin maqtan tutady. Oraldyq komandanyń namysyn qorǵaýǵa respýblıkalyq chempıonat jeńimpazy Bekarys Jotabaev, qalalyq jarystardyń júldegeri Sanıda Nýrsalım, NIS jelilik spartakıadasynyń jarqyn juldyzdary Nurbaqyt Jolaman men Abylaı Mametan óz úlesterin qosýda.
Qaraǵandydaǵy jetinshi synyp oqýshysy Marǵulan Sanat toǵyz jasynda oblys chempıony atanǵan. Al elordadaǵy fızıka-matematıka baǵytyndaǵy Zııatkerlik mektep oqýshysy Gúlnaz Hasanova bolsa júldeli oryndardyń kolleksııasyn jınap úlgergen.
Árbir qatysýshy oıynmen baılanysty óz oqıǵasyn aıtyp berdi. Nur-Sultan qalasyndaǵy Zııatkerlik mektep oqýshysy Janııa Muhtarhanova bir kezderi elordaǵa Pavlodar qalasynan toǵyzqumalaq jarysyna kelgen eken.
Bala kezinen ústel oıyndarymen shuǵyldanǵan, ásirese, logıkalyq jáne dýeldi túrlerine qyzyǵýshylyǵy joǵary bolǵan. Tarazdaǵy Zııatkerlik mektep oqýshysy Vadım Semenov "Men osylaı toǵyzqumalaq oıynyna keldim. Oıyn durys eseptep, kóp kombınasııalardyń ishinen oń nusqany tańdaýǵa negizdelgen, munymen qosa men sandardy jaqsy kóremin", dep atap ótti.
Nur-Sultan qalasyndaǵy Zııatkerlik mektep oqýshysy Tóleev Nurhan ómirdegi jarqyn sátteriniń biri dep oıyndaǵy eń tez jeńisi – jıyrma mınýt ishindegi jeńisin biledi.
– Bizdiń árqaısymyz úshin toǵyzqumalaq oıyn ǵana emes, halqymyzdyń tarıhy bolyp tabylady. Biz ata-babamyzdan mıras bolyp qalǵan dástúrlerdi saqtap, urpaqtan urpaqqa jetkizý qanshalyqty mańyzdy ekenin jaqsy túsinemiz, – deıdi Pavlodar qalasyndaǵy Zııatkerlik mektep oqýshysy Saıalym Dıýsekeeva.
– Toǵyzqumalaq – adamdy damytyp, tanymyn keńeıtetin zııatkerlik oıyn, – dep Nur-Sultan qalasyndaǵy fızıka-matematıka baǵytyndaǵy Zııatkerlik mektep oqýshysy Erjan Aman oı bólisti.
Nazarbaev zııatkerlik mektepteri damý departamenti dırektorynyń orynbasary Aıda Aǵadildiń aıtýynsha, balalardyń toǵyzqumalaqqa degen qyzyǵýshylyǵy jyl saıyn artyp keledi. Ulttyq mádenıetimiz ben dástúrimizdi qaıta jańǵyrtýǵa arnalǵan jobalar NIS áleýmettik jobalary qatarynda suranysqa ıe.
Úsh jastyq topta komandalyq esepte 2020 jyldyń chempıondary bolyp Taldyqorǵan jáne Qyzylorda qalalaryndaǵy Nazarbaev zııatkerlik mektepteriniń quramalary tanyldy. Bir erekesheligi Qyzylorda komandasy eki birdeı jastyq topta senimdi jeńiske qol jetkizdi. Jastyq toby boıynsha jeke esepte Anel Kaırat, Abylaıhan Tynyshtyqbaı (ekeýi de Taldyqorǵan - NZM), Juldyzaı Munaıtbasova (Qyzylorda NZM), Bekjan Ádiljappar (Semeı NZM), Juldyz Sadyqbek (Qyzylorda NZM), Bekarys Jortabaev (Oral NZM) jeńimpaz atandy.