Aqmola oblysynyń Taýarlar men qyzmetterdiń sapasy men qaýipsizdigin baqylaý departamenti óńirdegi 52 mobıldik top kópshilik jınalatyn oryndarda karantın talaptarynyń saqtalýyn qadaǵalaý boıynsha monıtorıng júrgizýde, dep habarlaıdy Egemen.kz
Bıylǵy jyldyń 19-shy qazany men 10-shy qarashasynda aralyǵynda 395 nysan tekserildi: 51 halyqqa qyzmet kórsetý ortalyǵy, 43 Qazposhta bólimshesi, 60 ekinshi deńgeıli bank bólimshesi, 15 qoǵamdyq kólik, 226 memlekettik mekeme. Onyń ishinde Arshaly, Birjansal, Ereımentaý, Esil, Jaqsy, Jarqaıyń, Qorǵaljyn, Shortandy aýdandary jáne Kókshetaý qalasyndaǵy 24 nysanda Aqmola oblysynyń memlekettik bas sanıtarııalyq dárigeriniń qaýlysynyń talaptary buzylǵandyǵy anyqtaldy.
"Osy aralyqta karantındik jáne epıdemııaǵa qarsy sharalardyń buzylýyna baılanysty 6 ákimshilik hattama toltyryldy. Arshaly aýdanynyń Qazposhta bólimshesine 41670 teńge, Esil aýdandyq HQKO men Aqmola elektr jelisin taratý kompanııasynyń basshylyǵyna 83340 myń teńge, Qorǵaljyn aýdanynyń memlekettik mekemelerine 83340 myń teńge, Stepnogordegi jeke tulǵalalarǵa 41670 teńge aıyppul salyndy. 23 ákimshilik materıaldar qaralyp jatyr", delingen vedomstvonyń málimetinde.
Osy rette, monıtorıngtik top aldynda Aqmola oblysynyń memlekettik bas sanıtarııalyq dárigeriniń qaýlysyndaǵy sanıtarlyq talaptardyń saqtalýyn baqylaýdy nyǵaıtý jáne ákimshilik sharany qoldaný arqyly yqpal etý mindeti tur. Buǵan Aqmola oblysy aýmaǵynda, onyń ishinde Kókshetaý qalasynda epıdemııalyq jaǵdaıdyń, ıaǵnı koronavırýs ınfeksııasyn juqtyrǵandardyń sany artyp otyrǵandyǵy sebep bolyp otyr.