Qazaqstandyq ata-analar jelide taraǵan habarlamaǵa alańdaýshylyq tanytyp otyr, dep habarlaıdy Egemen.kz Stopfake.kz saıtyna silteme jasap.
Vıdeoda birneshe áıel What’sApp-ta hat almasqan ekran kórsetilgen. Olar mektepke barǵan soń balalarǵa qatty jótel paıda bolǵanyn jazǵan. Beınerolık avtorynyń aıtýynsha, buǵan joǵarǵy tynys alý joldarynyń hımııalyq kúıik shalýy sebep bolǵan.
Birinshiden, Qazaqstanda mektepterdi, aýrýhanalardy, adamdar kóp jınalatyn oryndardy jáne ózge de oryndardy dezınfeksııalaý úshin ýytty jáne densaýlyqqa qaýipti zattar paıdalanylmaıdy. Bul týraly Taýarlar men kórsetiletin qyzmetterdiń sapasy men qaýipsizdigin baqylaý komıteti birneshe ret málimdedi.
Elimizde qoldanylatyn barlyq quraldar sertıfıkattalǵan, tizilimge engizilgen jáne sanıtarlyq óńdeýge arnalǵan eritindilerdi daıyndaý proporsııalary kórsetilgen naqty nusqaýlary bar.
Ekinshiden, tynys alý joldarynyń kúıip qalý belgileri qurǵaq jótelge qaraǵanda áldeqaıda aýyr. Joǵarǵy tynys alý joldarynyń hımııalyq kúıigi, ádette, obstrýksııaǵa ákeletin tez isinýmen qatar júredi. Bul rette zardap shekkender jedel keńirdek ıntýbasııasyna muqtaj bolady. Sondaı-aq erinniń kúlbireýi, muryn men bettegi túktiń kúıýi de tynys alý joldaryn hımııalyq kúıik shalýdyń belgileri bolýy múmkin. Tómengi tynys alý joldaryn kúıik shalsa, birden tynys alý jetkiliksizdigi, jótel jáne qanmen túkirý sııaqty belgiler paıda bolady bolady. Sonymen qatar, ıis tıip nemese basqa gazdan ýlanýdyń alǵashqy belgileri baıqalady.
Úshinshiden, vıdeoda áıelderdiń biri ulynda "hımııalyq kúıik" belgilerin jeńildetken "Zodak" preparatyn atap ótedi. Shyn máninde, bul preparat hımııalyq nemese termııalyq kúıikteri bar naýqastardyń aýyrsynýyn jeńildete almaıdy. Ol antıgıstamınder tobyna jatady jáne allergııalyq rınıt, konıýnktıvıt jáne ıdıopatııalyq esekjem belgilerin toqtatý úshin qoldanylady.