Qorǵanys mınıstrliginde ótken apparat keńesinde armııanyń tynys-tirshiliginiń aǵymdaǵy negizgi máseleleri qaraldy.
Qarýly Kúshterde 2020 jyldyń 2 jeltoqsanynda jańa oqý jyly bastaldy. Bas qolbasshylar jaýyngerlik daıarlyq boıynsha ótkizgen keshendi taktıkalyq-saptyq sabaqtardyń nátıjeleri jóninde baıandady. Bul sabaqtarǵa barlyq quramalar men áskerı bólimder qatysty. Sanıtarlyq-epıdemıologııalyq shekteýlerdiń barlyǵyn saqtaı otyryp ótken sabaqtarda, jeke quram dabyl boıynsha kóterilip, áskerı tehnıkalar turaqtardan shyǵaryldy, sondaı-aq basqarý organdary men shtabtardyń jumystary men ózara is-qımyl máseleleri is júzinde pysyqtaldy.
Áskerler, 7 jeltoqsannan bastap, áskerı qyzmetshilerdi mamandyq boıynsha daıarlaý sheńberindegi josparly is-sharalarǵa kiristi. Bul shara aı sońynda baqylaý sabaqtar men atysty júrgizýmen aıaqtalady.
Kúntizbedegi jyldyń aıaqtalýyna baılanysty barlyq garnızondaǵy áskerı obektilerdiń merdigerleri qurylys jáne jóndeý jumystaryn ýaqtyly jáne sapaly oryndaýyn qatań baqylaýǵa alýyn tapsyrdy. Qurylys uıymdary merzimder men mindettemelerdi saqtamaǵan jaǵdaıda, zańda belgilengen tártippen talap etý jumystaryn uıymdastyrýdy tapsyrdy.
2020 jyly Qorǵanys mınıstrliginiń sybaılas jemqorlyqqa qarsy is-qımyl jóninde júrgizgen jumystaryna aldyn ala qorytyndy shyǵardy. Túsindirme, uıymdastyrý jáne tártiptik sıpattaǵy keshendi sharalardyń nátıjeleri Qarýly Kúshterdegi sybaılas jemqorlyqpen quqyqbuzýshylyqtyń ótken jylmen salystyrǵanda 16 paıyzǵa tómendegenin kórsetti, al sottalǵan áskerı qyzmetshiler sany shamamen 2 esege azaıdy. Bul rette, bıýdjet qarajatyn iri qymqyrýǵa jol bermedi. Oryn alǵan quqyqbuzýshylyqtar turmystyq sıpatqa ıe bolǵandyqtan, ony túbegeıli joıý maqsatynda, qazirdiń ózinde júıeli is-sharalar uıymdastyryldy.
Qorǵanys mınıstri ótken aptada erekshe kózge túsken áskerı qyzmetshilerdi atap ótti. Qarýly Kúshterdiń áýeaılaǵyndaǵy Mı-8 tikushaǵynyń ekıpajy Kaspıı teńiziniń jaǵasynan 11 shaqyrymda qalǵan jumysshylardy kóshirý kezinde tapsyrmany sátti oryndady. Aqkól qalasynda eki áskerı qyzmetshi kóshede kenetten es-tússiz jatqan toǵyz jasar balany qutqaryp, ýaqytynda alǵashqy medısınalyq kómek kórsetti jáne emdeý mekemesine der kezinde jetkizdi. Shtattan tys kezde batyldyq pen bastama kórsetken áskerı qyzmetshilerdi madaqtaýǵa nusqaý berdi.