Turǵyn úı qurylys jınaq banki turǵyn úı jaǵdaıyn jaqsartý maqsatynda zeınetaqy jınaǵynyń bir bóligin alǵany úshin oryndalatyn operasııa komıssııasyn nólge teńestiretin boldy. Bul týraly banktiń baspasóz qyzmeti habarlady, dep jazady Egemen.kz.
Turǵyn úı qurylys jınaq banki basqarma tóraǵasy Lázzat Ibragımovanyń aıtýynsha, eger TÚQJB zeınetaqy jınaǵyn paıdalaný boıynsha biryńǵaı operator bolyp bekitilgen jaǵdaıda bank zeınetaqy tólemderin tirkeý jáne aýdarý boıynsha barlyq operasııalar komıssııasyn azamattardan almaýdy josparlap otyr.
«Táýelsizdik kúni qarsańynda biz barsha azamattardy qýantqymyz keledi. TÚQJB zeınetaqy jınaǵy salynatyn arnaıy shotty ashý jáne júrgizý boıynsha, zeınetaqy tólemderin maqsatty taǵaıyndaýǵa qatysty aýdarymdar boıynsha barlyq komıssııalardyń kúshin joıýdy josparlap otyr. Sondaı-aq bank BJZQ-dan birjolǵy zeınetaqy tólemderin alý jáne qabyldaý boıynsha kórsetiletin agenttik qyzmet úshin de komıssııa ustamaıdy», deıdi Ibragımova.
Baspasóz qyzmetiniń habarlaýynsha, 2021 jyldyń basynda jospar boıynsha ótinishterdi qabyldaıtyn onlaın-servıs qazaqstandyqtar úshin qoljetimdi bolady. Portalda azamattar ESQ kómegimen avtorızasııadan ótip, zeınetaqy jınaǵyndaǵy qarajatty paıdalaný múmkindigine ıe bolady.
Birinshi qyrkúıek kúni jasaǵan joldaýynda prezıdent Qasym-Jomart Toqaev 700 myń azamattyń BJZQ-daǵy zeınetaqy qarajatynyń bir bóligin alyp, ony emdelýge, baspana alýǵa jumsaıtyn múmkindikke ıe bolatynyn aıtqan edi.