Memleket basshysy Qyrǵyz Respýblıkasynyń jańadan saılanǵan Prezıdenti Sadyr Japarovpen telefon arqyly sóılesti, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev Sadyr Japarovty saılaýdaǵy jeńisimen quttyqtap, daýys berý nátıjesi ol usynǵan Qyrǵyzstannyń áleýmettik-ekonomıkalyq turaqty damýyn qamtamasyz etý jáne memlekettiligin odan ári nyǵaıtý baǵdarlamasy búkilhalyqtyq qoldaýǵa ıe bolǵanynyń kýási ekenin atap ótti.
Qazaqstan Prezıdenti baýyrlas Qyrǵyzstanmen aradaǵy yntymaqtastyqty eki el halqynyń múddesine sáıkes dostyq, tatý kórshilik jáne strategııalyq áriptestik rýhynda odan ári damyta berýge beıildi ekenin naqtylady.
Sadyr Japarov Qyrǵyz Respýblıkasynyń turaqty ári baıypty damýǵa baǵyttalǵan umtylysyn únemi qoldap kele jatqan Memleket basshysy men Qazaqstan halqyna alǵys aıtty.
Prezıdentter ekijaqty baılanystardyń kún tártibindegi barlyq máseleler boıynsha birlesip jumys isteýge daıyn ekenderin, sondaı-aq, halyqaralyq uıymdar sheńberindegi is-qımyldardy arttyrýǵa nıettiligin rastady.
Qasym-Jomart Toqaev Sadyr Japarovty Qazaqstanǵa resmı saparmen kelýge shaqyrdy. Qyrǵyz basshysy shaqyrýdy qabyl alyp, Prezıdent retindegi alǵashqy saparyn Qazaqstannan bastaıtynyn aıtty. Sonymen qatar ol Memleket basshysyn Parlament saılaýynyń sátti ótýimen quttyqtady.
Qasym-Jomart Toqaev Sadyr Japarovqa baýyrlas Qyrǵyzstan halqynyń ıgiligi jolyndaǵy jaýapty memlekettik qyzmetine tolaǵaı tabys tiledi.