Bıyl san ǵasyr saryla kútken táýelsizdik tańynyń raýandaǵanyna – 30 jyl. Memleketimiz uly murat jolynda úshinshi onjyldyqqa qadam basyp, rýhty tasytar ómirsheń órkenıetke uly betburys jasady. Talaıy tarıhtyń betinde bederlengen qasiretti de qasterli oqıǵalar, násili asyl eldiń azap pen arpalysqa toly kezeńi, jetistigi men jeńisi bári – el jadynda. Al sol jolda Alash arystarynyń qoltańbasy qalyp, san qaıratker-qalamgerlerdi túletken, eldiń muńy men tarıhı jetistikterine kýáger bolǵan el gazeti «Egemenniń» ǵasyrlyq úni asqaq. Mańdaıyn kún súıgen memleketimiz orda buzar otyz jasqa tolǵanda qaranar halyqpen qatar jasaǵan ata basylym otyz myńynshy nómirin shyǵaryp otyr.
Qazaq baspasóziniń qasterli qarashańyraǵy, bas basylymnyń otyz myńynshy sanynyń táý eter táýelsizdigimizdiń 30 jyldyǵymen tuspa-tus kelýin sátti sáıkestik dep qabyldadyq. Árbir on myńynshy sanynda bir dáýir almasyp, totydaı túrlengen zamannyń túr-túsi ózgerdi. Aıtýǵa jeńil bolǵanymen, bul – ǵasyrdan da uzaq jol. Árıne, oqyrmannyń talǵamy men ýaqyttyń talaby údesinen úzdiksiz shyǵyp otyrý ońaı sharýa emes. Eldi eleńdetken tolǵaqty túıtkilder men ótkir, ózekti máselelerdi, salıqaly, salmaqty dúnıelerdi qasıetti qalam arqyly kóterip, máńgilik jazba etýge tyrysyp júrgen aqparattyń aqmyltyq maıtalmandarynyń mańdaı teri.
El basyna tóngen zar zamannyń da, sáýlesin shashyp, nuryn tókken araıly shaqtardyń da qaıtalanbas qaǵıdalaryn qalpyn buzbaı oqyrmanyna jetkizgen basylym betterinde zamannyń zańǵary atanǵan uly tulǵalardyń óshpes qoltańbalary, ýaqyt aǵymyndaǵy oryn alǵan oqıǵalar, izgilik pen iltıpattyń kórinisin kesteleıtin kórkem dúnıeler toǵysyp, jańǵyryǵy búgingi urpaqtyń qulaǵyna jetip, sanasyna ornyqty.
Ata basylymnyń alǵashqy sany Orynborda «Qazaq» gazetiniń baspahanasynda jaryq kórgende jattyń qabaǵyna jaýtańdaǵan jurttyń súıispenshiligi erekshe boldy. Odan keıin «Eńbekshi qazaq» atanyp turǵan tusta 1927 jyly myńynshy nómiri arab qarpimen shyǵypty. Qutty shańyraǵyna Alash arystaryn toptastyrǵan gazettiń ol kezeńi halyqqa qazaq ataýyn qaıtaryp berýmen máńgi este qaldy. Basshylary men qalam ustaǵan qyzmetkerleri qyzyl qyrǵynnyń, stalındik solaqaı saıasattyń qurbany bolǵan basylymnyń on myńynshy sany soǵystan keıingi jylymyq jyldarǵa, ulttyq ádebıet pen mádenıet qaıta gúldep, el rýhy bir tynys alǵan kezge týra kelipti. Osylaısha, 1956 jyly 13 mamyrda «Sosıalıstik Qazaqstan» jańa sanyn oqyrmanǵa usyndy.
Jıyrma myńynshy sany keshegi keńes ókimetiniń irgesi sógiler tusta, araıly azattyqtyń qarsańynda halyqqa jol tartty. Egemendik pen erkindikti elge súıinshilegen, «Azattyq, teńdik» uranymen shyǵa bastaǵan gazettiń ataýy da, mazmuny da ózgerdi. Bodandyq qamytyn sheship, bostandyqqa qadam jasady. Jaınaq týyndylarmen qýantyp, uly oqıǵalaryn, óz qoǵamynyń ashysy men tushysyn, syny men symbatyn, shyny men shyrǵalańyn taspalady. Eldikti eńseli etken eren eńbektiń jarshysyna aınaldy. Táýelsizdikti tuǵyrly etken táýekelmen Arqa tórine bet túzep, bostan eldiń basalqy sózine, bátýaly baılamyna, bas basylymyna balandy. Sondyqtan bolsa kerek, uly jeńister men jetistikterdi shejire etip qattap, aıryqsha bederlep kele jatqan basylymǵa qurmet azaıǵan emes. Elbasynyń: «Jańalyqty jurtshylyqqa jedel əri shynaıy túrde jetkizip, egemen elimizdiń memlekettik saıasatyn qalyń oqyrman arasynda baıypty nasıhattap, el shejiresin qaǵazǵa hattaǵan baıyrǵy basylymnyń bedeli ərdaıym bıik» dep jazyp, el Prezıdenti Qasym-Jomart Toqaevtyń: «Egemen Qazaqstan» əýel bastan ulttyq múddeni, eldik muratty jəne rýhanı qundylyqtarymyzdy dəriptep, qazaq baspasóziniń qarashańyraǵyna aınaldy» dep joǵary baǵasyn berýi – sonyń jarqyn aıǵaǵy.
Endi erkindiktiń samaly eskenine 30 jyl tolǵan shaqta 30000-ynshy nómirin oqyrmanǵa usynyp otyrǵan baıyrǵy basylym jalyndy jastarmen jańaryp, jańa júzjyldyqqa qadam basty. Sannyń sıqyryna sengen yrymshyl halyqpyz ǵoı, bul ordaly sannyń 21 jyldyń 21 nómirine sáıkes kelgenin de jaqsylyqqa balap otyrmyz. О́ıtkeni ǵasyr eńserip, elmen egiz jasaǵan «Egemen» bıyl irilenip, irgesi keńip, basqa basylymdardy baýyryna basyp, qanatynyń astyna almaq. Oqyrmany kóbeıip, aýqymy arta túsken basylym úshin bul da bir baǵynǵan beles bolary anyq.
Otyz demekshi, bıyl otyz úsh jyldan beri myzǵymaı turǵan kórsetkish jańaryp, bir jylda týǵan balalardyń sany jóninen rekord jańardy. Bul tarıhı oqıǵa. Bıylǵy sanaqta da halqymyzdyń sany ósip, sonyń ishinde qazaqtardyń qatary 80 paıyzǵa jetedi degen úkili úmit bar. Bul aldymen qazaq oqyrmany kóbeıedi degen sóz. Oıly oqyrmandary artqan saıyn áli talaı ordaly otyz myńdyqty artqa tastarymyz sózsiz.