Soltústik Qazaqstan oblysynda 6 myń turǵyny bar 79 eldi meken kóktemgi sý tasqynynan zardap shegýi múmkin, dep habarlaıdy Egemen.kz
SQO tótenshe jaǵdaılar departamenti brıfıngte kóktemgi sý tasqynyna daıyndyq jaıynda aıtty. Mamandardyń aıtýynsha, qaýip bar. Kúzgi ylǵal qory keı jerlerdi normadan 42% artyq, qardyń qalyńdyǵy qalypty bolǵanymen, topyraq qazirdiń ózinde 60-150 sm aralyǵynda qatqan.
«Naýryzdyń ekinshi jartysynda qar erı bastaıdy. Aqan-Burlyq, Jembaraq, Iman-Burlyq, Babyq-Burlyq» ózenderiniń sý deńgeıi artpaq. Kúnniń kúrt jylýynan qar da tez erip, kólderde sý deńgeıi kóteriledi. Qazirgi ýaqytta kóktemgi sý tasqynynan zardap shegýi múmkin 6 myń turǵyny bar 79 eldi meken anyqtaldy. Olardyń 30-yna sý ózenderden, 13-ine kólderden jáne qalǵany erigen qar sýy kirýi múmkin», deıdi SQO TJD bólim basshysy Sáken Aǵzamov.
Kóktemgi sý tasqynymen kúreske quqyq qorǵaý organdarynan 500-ge jýyq adam daıyn, 155 tehnıka, 8 júzý quraly jáne 80-nen astam motopompa ázirlendi. Ýshyqqan jaǵdaıda jergilikti atqarýshy organ qosymsha 1900 adamdy, 1,5 myńǵa jýyq tehnıkany shyǵarmaq. Budan basqa 190 tonna janarmaı, 32,4 myń tonna ınertti materıal jáne 27,8 myń qap daıyn tur.
«2021-2023 jyldardy qamtyǵan kóktemgi sý tasqynynyń aldyn alý jáne onyń saldaryn joıýǵa arnalǵan jol kartasy bar. Onyń aıasynda 23,6 mlrd teńgege 10 is-shara júzege asýy qajet. Iаǵnı sý ótetin avtojoldar, qorǵanysh dambalary, kópirler, sý ótkizý qubyrlary jóndeledi», deıdi Sáken Aǵzamov.