Búgin Qazaqstan musylmandary dinı basqarmasy Mańǵystaý oblysy Munaıly aýdany Mańǵystaý aýylynda salynǵan sport keshenin óńir turǵyndarynyń ıgiligine berdi, dep habarlaıdy Egemen.kz
Sport kesheniniń ashylý saltanatyna Bas múftı Naýryzbaı qajy Taǵanuly, Mańǵystaý oblysynyń ákimi Serikbaı О́telgenuly qatysty.
Igi is-sharada sóz alǵan Bas múftı Naýryzbaı qajy Taǵanuly: «О́zderińiz jaqsy bilesizder, biz ótken jyly 30 jyldyq mereıtoıymyzdyń aıasynda shalǵaı aýyldarǵa qudyq, kópir, emhana, jol salýǵa úles qostyq. Osynaý izgi isimizdiń jalǵasy retinde búgin sport keshenin halyq ıgiligine berip otyrmyz. Meshit, medrese salýdyń saýaby qandaı úlken bolsa, el ıgiligi úshin berilgen kópir, jol, emhana qudyq, sport kesheni syndy ǵımarattardy turǵyzý sondaı qaıyrly istiń biri. Osy iske úles qosqan barsha azamattarǵa Alla razy bolsyn deımin. Biz memlekettiń buqaralyq sportty damytýǵa arnalǵan bastamalaryna úles qosýdy jalǵastyra beremiz. О́ıtkeni jastardyń jany men tán saýlyǵy - mańyzdy másele. Oǵan úles qosý – barshaǵa ortaq is. Ǵalymdarymyz: «Atqa miný, sadaq atý, kúres pen júgirý – sozylmaly aýrýlardyń birden-bir daýasy» degen. Dene shynyqtyrý adam balasynyń tánin ǵana damytyp qoımaı, rýhanı jaqtan da tárbıeleıdi. О́z nápsisin jeńýge, óz denesin ózine baǵyndyrýǵa járdemdesedi. О́ıtkeni, ol – qýat. Dene qýaty, oı ushqyrlyǵy, ıman qýaty – er jigittiń kórkemdigi», dedi.
Sport kesheniniń ashylý rásiminde Mańǵystaý oblysynyń ákimi Serikbaı О́telgenuly: «Qurmetti Bas múftı! Sizben osyndaı ıgi is-sharanyń kýási bolǵanyma qýanyshtymyn. О́zińiz bastaǵan ımamdar qaıyrymdylyq jumystarǵa belsendi túrde atsalysýda. Sizge jáne barsha din qyzmetkerlerine shynaıy alǵysymdy bildiremin. Osy keshennen myqty sportshylar shyǵýyna tilektespin», dedi.
Aıta ketsek, sport kesheniniń jalpy aýmaǵy – 1300 sharshy metr. Ǵımarat halyqaralyq talaptarǵa sáıkes salynǵan.