Ońtústik Koreıada AstraZeneca vaksınasyn ektirgen eki adam qaıtys boldy. Qazir jergilikti bılik naqty osy preparattyń eki adamnyń ólimine sebepshi bolǵan-bolmaǵanyn tergeýde.
Ońtústik Koreıada AstraZeneca vaksınasyn ektirgennen keıin eki adam qaıtys boldy,dep habarlaıdy Inbusiness.kz portaly Renhap agenttigine silteme jasap. Resmı málimet boıynsha, olardyń ekeýinde de vaksına ekpesten buryn basqa syrqattary bolǵan.
Birinshi oqıǵa Koıan qalasyndaǵy qart adamdarǵa kútim jasaıtyn aýrýhanada tirkeldi. 26 aqpanda 50 jastan asqan adamǵa ekpe jasalǵan. Bastapqyda júrek jetkiliksizdiginiń belgileri baıqalyp, tynys alýy nasharlaǵandyqtan naýqas aýrýhanaǵa jatqyzyldy. Oǵan tıisti medısınalyq kómek kórsetilip, jaǵdaıy jaqsarǵan edi.
Alaıda bir kún ótken soń, onyń densaýlyǵy taǵy da nasharlap, ol kóz jumdy. Mamandardyń sózine sensek, naýqasta júrek aýrýy, qant dıabeti bolǵan jáne buǵan deıin ol ınsýlt alǵan kórinedi. Kengıdo provınsııasynyń Phenthek qalasynda qarttarǵa arnalǵan aýrýhanada taǵy bir naýqas qaıtys boldy.
63 jastaǵy er adam vaksına ektirgennen keıin tórt kún ótken soń kóz jumdy. Naýqastyń serebrovaskýlıarlyq syrqatpen aýyrǵany belgili. Preparat qabyldaǵannan keıin pnevmonııa jáne sepsıs belgileri tirkelgen. Qazir jergilikti bılik AstraZeneca preparatynyń osy eki adamnyń ólimine sebepshi bolǵan-bolmaǵanyn tergep jatyr.