«Aq jol» partııasy Tekeli qalasynda kásipker, kópbalaly anaǵa 670 myń teńge kóleminde aıyppul salǵan monıtorıngtik toptardyń áreketin zańsyzdyq dep atady. Bul týraly Azat Perýashev búgin Májilistiń jalpy otyrysynda aıtylǵan depýtattyq saýalda málimdedi.
Buǵan deıin «Aq jol» fraksııasynyń depýtattary Úkimetke kásipkerlerge qatysty «monıtorıngtik toptardyń» qysym jasaýyna qatysty birneshe ret júgingen bolatyn.
- О́tken jyldyń 18 qarashasy men 2 jeltoqsanyndaǵy saýaldarda biz olardyń reıdterin zańǵa sáıkes kelmeıdi dep sanap, olardyń Kásipkerlik kodekske sáıkes jumys isteýlerin jáne shaǵyn jáne orta bıznestiń zańdy quqyqtaryn qorǵaýyn talap ettik. Sonymen qatar, epıdemıologııalyq baqylaý tek tolyq qamtylǵan kezde ǵana tıimdi. Al jeke nysandardy (tek ózderi biletin sebepter boıynsha) aınalyp ótý arqyly bul toptar keıde pandemııaǵa kedergi keltirýmen jumys isteýdiń ornyna, kóbine esep berý jáne bopsalaýmen aınalysady, - dedi Preýashev.
Sondaı-aq depýtat «Aq jolǵa» kómekke júgingen temirtaýlyq kásipkerdi shaǵyn dúkeniniń bir aıda 18 ret «monıtorshylardyń» tekserýinen ótkenin, mundaı mysaldar az emes ekenin alǵa tartty.
- Mundaı árekettermen monıtorıng toptary pandemııadan aman qalǵan kásipkerlerdi ǵana emes, qoǵamdaǵy tynyshtyqqa qaýip tóndiredi dep sanaımyz. «Monıtorshy» myrzalar, sizder ne oılap júrsizder? Bul bizdiń adamdar, biz olarǵa memleket retinde jaýap beremiz! «Aq jol» fraksııasynyń saýaldaryna óz jaýaptarymen zańsyzdyqqa sanksııa beretin memlekettik organdar ne týraly oılaıdy eken?, - dedi ol.