IIM Almaty akademııasynda polısııa basshylaryn daıarlaý fakýlteti ashyldy, dep habarlaıdy Egemen.kz Polisia.kz saıtyna silteme jasap.
IIM M. Esbolatov atyndaǵy Almaty akademııasynda onlaın rejımde ishki ister organdarynyń basshy quramyn daıarlaý fakýltetiniń ashylýyn ótkizdi.Fakýltet tyńdaýshylaryn alǵashqy qabyldaý aldynda Ishki ister mınıstri Erlan Turǵymbaev quttyqtaý sóz sóıledi.
«IIM El Prezıdentiniń tapsyrmasyna sáıkes ishki ister organdaryn jańǵyrtý boıynsha júıeli jumys júrgizýde. Ol eń aldymen polısııanyń ashyqtyǵyn qamtamasyz etýge, azamattardyń senim deńgeıin arttyrýǵa jáne olardyń konstıtýsııalyq quqyqtaryn qorǵaýǵa baǵyttalǵan. Osyǵan baılanysty kadr jumysyna jáne tártip saqshylarynyń biliktiligin arttyrýǵa úlken mán beriledi», dedi mınıstr.
Polısııa vedomstvosynyń basshysy jańa fakýltettiń ashylýynyń aldynda úlken taldaý jumystary júrgizilgenin atap ótti.«Ishki ister mınıstrlikteriniń basshy quramyn daıarlaý boıynsha arnaıy oqý oryndarynyń álemdik praktıkasy zerdelendi. Ulybrıtanııa, Germanııa, Japonııa jáne Reseıdiń ozyq tájirıbesi negizge alyndy. Atalǵan elderde basshylyq quram basqarýshylyq, tehnıkalyq jáne kommýnıkatıvtik daǵdylardy, kóshbasshylyq qabiletterdi damytý boıynsha júıeli túrde oqytylady», dedi Erlan Turǵymbaev.
Oqý baǵdarlamasy úsh aıǵa eseptelgen. Fakýltet tyńdaýshylary aýqymdy baǵyttar boıynsha (geosaıasat, jobalyq basqarý, qyzmetkerlermen jumys, psıhologııalyq daıyndyq, IT-saýattylyq, qarjylyq saýattylyq) 12 modýldi oqıdy.
Kýrsty jaqsy aıaqtaý mansaptyq ósý, IIM ortalyq apparaty departamentteriniń basshylary men aýmaqtyq bólinisterdiń birinshi basshylary laýazymdaryna qyzmetke taǵaıyndaý kezinde óz septigin tıgizetin bolady.
«Kún saıyn damyp, ózgerip jatqan álemde polısııa burynǵy qalpynda qalyp qoımaýy kerek. Ishki ister organdarynyń qyzmetkerleri únemi izdeniste bolyp, jan-jaqty damýy qajet. Sondyqtan da birinshi basshylar jeke quram úshin árdaıym úlgi bolady», dep atap ótti IIM basshysy.