Qazaq «Mal-jan aman ba?» dep amandasady. Aldymen maldy suraýynda mán bar. Yqylym zamannan beri Alash balasynyń tirshiligi tórt túligine baılanysty. Búgingi tańda da aýyl turǵyndarynyń deni azyn-aýlaq malymen kún kórip otyrǵandyǵy belgili. Al ony ońaı olja kórip urlaý – kúnániń eń úlkeni. Demek qazaqylyqpen keńshilik jasap, keshirmeý kerek. Sonda ǵana urynyń órisi tarylady.
Memleket basshysy Qasym-Jomart Toqaev: «Mal urlyǵyna baılanysty zańdy qataıtyp, qylmyskerlerdi sybaılastarymen qosyp, qatań jazalaý kerek. Qylmystyq kodekske tıisti ózgertýler engizý qajet. Parlament depýtattary osy bastamany qoldap, máseleniń oń sheshim tabýyna atsalysady dep senemin», dep atap ótken bolatyn. Sóıtip zań barynsha qataıtylǵan. Alaıda aýyl adamdarynyń áýpirimdep kúnin kórip otyrǵan tórt túligin ońaı olja kóretinder áli tyıylmaı otyr.
Oblysta ótken jyly mal urlyǵynyń 186 oqıǵasy tirkelgen. Onyń 80 paıyzǵa jýyǵy – jaıylymda bolǵan qylmys. Oblystyq Polısııa departamentiniń qyzmetkerleri mal urlyǵynyń aldyn alý barysynda turaqty jumys júrgizgenimen, ońaı oljaǵa qyzyǵatyndardyń qatary azaımaı tur.
Taıaýda oblystyq qylmystyq ister jónindegi sot alqasy mal urlyǵyna qatysty qylmystyq isti qarap, sýyq qoldy urynyń sazaıyn berdi. Bul isti Zerendi aýdandyq soty qaraǵan bolatyn. Kúdikti buryn eki márte sottalǵan jáne sottalǵan merzimi tolyq ótelmegen Marat Sátkenov Qylmystyq Kodekstiń 188-baby 1-tarmaǵynyń 3) tarmaqshasyna sáıkes bes jylǵa sottaldy. Sot jazasyn qylmystyq-atqarý júıesiniń tótenshe qaýipti qylmyskerlerge arnalǵan mekemesinde óteý týraly úkim shyǵardy. Qylmystyq kodekstiń 14-babynyń 2-tarmaǵy, 1) tarmaqshasyna sáıkes M.Sátkenov qaýipti qylmysker dep tanyldy. Jazasyn óteý qamaýǵa alynǵan 2020 jyldyń 19 qyrkúıeginen bastap eseptelinetin boldy.
Kúdiktiniń kinásin moıyndatatyn zattaı aıǵaqtyń barlyǵy bar. Másele bylaı bolǵanǵa uqsaıdy. О́zgeniń malyna kózin alartqan kúdikti 2020 jyldyń 28 qyrkúıek kúni keshki ýaqytta Zerendi aýdanyna qarasty Elikti aýylyndaǵy seriktestiktiń mal qorasynyń esigin buzyp ashyp, 11 jasar jylqyny urlap alyp ketken. Seriktestik basshylarynyń baǵalaýynsha, urlanǵan jylqynyń quny 350 myń teńge shamasynda.
Appelıasııalyq shaǵymynda kúdikti óziniń mal qorasynyń esigin buzbaǵanyn, atty jaıylymda jaıylyp júrgen jerinen ustap alǵandyǵyn, sondyqtan sot úkimimen kelispeıtinin aıtyp aqtalǵan. Onyń oıynsha, ózin tótenshe qaýipti qylmysker dep taný da artyq. Ári ol sotqa deıingi barlyq talapty oryndap, jábirlenýshige jylqynyń qunyn tólep bergendigin, qazir onyń eshqandaı talaby joq ekendigin jetkizip jantalasty. О́z pikirin aıta kele, sot úkimin jeńildetýdi surady. Advokat S.Kýzmın de kúdiktiniń keltirgen dálelderin durys dep esepteıtinin aıta kelip, barlyq materıaldy saraptap, jazanyń tym aýyr ekendigin alǵa tartty. Biraq Qylmystyq ister alqasy qylmystyq oqıǵanyń mán-jaıyn, alǵashqy sot barysynda jazylǵan aýdıo, beınejazbalardy zertteı kele, úkimniń zań aıasynda shyǵarylǵandyǵyn anyqtady.
Sottalýshy qylmystyq áreketin moıyndap otyr. Jábirlenýshi men kýágerlerdiń osy oqıǵa boıynsha túsiniktemeleri tolyq. Urlanǵan jylqynyń jaıylymnan emes, mal qorasynan áketilgendigi belgili boldy. Mal qora esigi kiltke jabylǵan.
Oblystyq sot aıyptalýshy Marat Sátkenovtiń is-áreketine baılanysty Zerendi aýdandyq sotynyń úkimin ózgerissiz qaldyrdy. Appelıasııalyq aryz qanaǵattandyrylǵan joq.
Bir jylqy úshin bes jylǵa jaza kesildi. Eger mal urlyǵyna baılanysty dál osyndaı qatań ári ádil jaza qoldanylatyn bolsa, urlyq ta sap tyıylar edi.
Aqmola oblysy