Dúnıe júzindegi kórermen qaýym, onyń ishinde Brazılııa, Argentına, Bolıvııa, Venesýela, Kolýmbııa, Paragvaı, Perý, Ýrýgvaı, Chılı, Ekvador, sondaı-aq Reseı, Polsha, Belgııa, Sıngapýr, Shvesııa men Aýstralııada turatyn otandastarymyz Qazaqstan halqynyń birligi merekesi aıasynda «Astana Opera» teatrynyń eksklıýzıvti spektaklderin tamashalaı alady.
Opera jáne balet spektaklderiniń onlaın kórsetilimi teatrdyń YouTube platformasynda júzege asyrylady, sonymen qatar taratylymnyń ýaqyty men kúni týraly tolyq aqparatty álemniń 16 elindegi Qazaqstan elshiliginiń ókilderi taratatyn bolady.
– Mádenıettiń adam úshin, yntymaǵy úshin mańyzy zor. Sondyqtan biz Qazaqstan halqynyń birligi kúni álemniń ár buryshynda spektaklderimizdi onlaın kórsetý jóninde sheshim qabyldadyq. Oǵan 16 el qatysady, alǵashqylardyń biri bolyp Qazaqstan Respýblıkasynyń Reseı, Brazılııa, Polsha men Shvesııadaǵy elshilikteri kelisim bildirdi. Onlaın-afıshaǵa 5 spektakl endi 28 sáýir kúni ótetin A.Adannyń «Korsar» baleti, kelesi kúni jurtshylyq nazaryna P.I.Chaıkovskııdiń «Aqqý kóli» tanymal baleti usynylmaq, al opera ónerin súıer qaýym úshin 30 sáýirge Dj.Pýchchınıdiń «Týrandot» spektaklin ázirledik. 1 jáne 2 mamyr kúnderi halyqaralyq aýdıtorııamyzdy álemdik horeografııa jaýharlary – L.Mınkýstyń «Don Kıhot» jáne A.Adannyń «Korsar» baletterimen qýantpaqpyz, – dedi Qazaqstannyń eńbek sińirgen qaıratkeri, «Astana Opera» teatrynyń dırektory Ǵalym Ahmedıarov.
Barlyq onlaın kórsetilimder shyǵarylǵan kúni saǵat 00.00-den bastap kelesi kúni saǵat 9.00-ge deıin teatrdyń YouTube-arnasynda Qazaqstan elshilikteriniń resmı derekkózderindegi siltemeler boıynsha qoljetimdi bolady. Onlaın spektaklderden bólek, elorda turǵyndary men qonaqtaryna 1 mamyrda «Astana Operanyń» Kameralyq zaly sahnasynda ótetin «Mahabbat pen dostyq úni» merekelik konserti usynylady.
– Elimizdiń barlyq turǵyndaryn tamasha, jarqyn ári izgi mereke – Qazaqstan halqynyń birligi kúnimen shyn júrekten quttyqtaımyn. Osy kúni ár otbasyǵa myqty densaýlyq, amandyq, beıbitshilik tilegim keledi. El Táýelsizdiginiń 30 jyly ishinde qazaqstandyqtardyń beıbitshilik pen kelisimde turyp jatqandyǵy qýantady. Barshamyzdyń mýzykaǵa degen mahabbatymyz birligimizdi arttyra bersin, – dep sózin qorytyndylady teatr dırektory.
Merekelik konsertke opera solısteri men orkestr ártisteri qatysady. Baǵdarlamada qonaqjaı qazaq jerinde, bir shańyraq astynda tatý-tátti ómir súrip kele jatqan ulystardyń romanstary, halyq ánderi, aspaptyq mýzykasy qamtylǵan. Ulttyq mýzykalyq dástúrlerdiń sanalýandyǵy kórermenderge merekelik kóńil kúı syılaıtyny anyq.