Halyqaralyq aýyr atletıka federasııasy Tokıodaǵy Jazǵy Olımpıada oıyndaryna joldama alǵan sportshylar tizimin jarııalady, dep habarlaıdy Egemen.kz Olympic.kz saıtyna silteme jasap.
Qazaqstan quramasynan áıelder arasynda 55 kelige deıingi salmaq dárejesinde Zýlfııa Chınshanlo, al erler arasynda 61 kelige deıingi salmaqta Igor Son el namysyn osy jazdyń basty básekesinde qorǵaıdy.
Irikteý kezeńinde 3628,3941 upaı jınaǵan Zýlfııa Chınshanlo álemdik reıtıngtiń tórtinshi satysynda tur. Igor Son 3015.0319 upaımen toǵyzynshy orynǵa jaıǵasqan. Qazaqstandyq aýyr atlet Tokıo Olımpıadasyna qurlyqtyq kvota boıynsha joldama aldy.
Esterińizge sala keteıik, halyqaralyq federasııanyń sheshimi boıynsha 2008-2020 jyldar aralyǵynda dopıngke qarsy erejelerdi 20-dan astam buzǵan elder Tokıo Olımpıadasyna eki sportshydan ǵana (bir áıel jáne bir er) jibere alady. Búginde Qazaqstan qorjynynda Olımpıada oıyndaryna sporttyń 26 túrinen 69 lısenzııa bar.