«Sary aımaqqa» da saqtyq kerek

О́tken bir aıdyń ishinde 3 578 nysanǵa monıtorıng júrgizilgen kezde karantın talaptaryn buzýdyń 59 faktisi anyqtalǵan. Neshe ret qulaqtandyryp, áldeneshe ret eskertý jasalsa da el áli kúnge deıin aıy­­lyn jııar emes. Bálkim «qyzyl aı­maq­tyń» qursaýynda tabandatqan eki aıdan astam ýaqyt bolýymyzdyń bir sebebi osynda jatqan-aq shyǵar. Bir­d­en aıta keteıik, bul – kózge túsip, anyq­talǵany ǵana. Al jasyryn ót­kizil­gen sharalardyń áldeqaıda kóp bolýy ábden múmkin.

Mamyr aıynda 3 578 nysanǵa monıtorıng júrgizilip, karantın talaptaryn buzýdyń baqandaı 59 faktisi anyqtalyp otyr. Tártip buzǵandarǵa 11 mln 921 530 teńge kóleminde aıyppul salynǵan. Sottyń qaraýyna bir materıal jiberilipti. Oblys orta­ly­ǵynyń ózinde mamyr aıynyń ishinde 756 nysanǵa monıtorıng júrgizilip, karantın talaptaryn buzýdyń 18 oqıǵasy oryn alǵany belgili boldy. Tártip buzýshylardyń deni qoǵamdyq tamaqtandyrý oryndary ekenin aıta ketelik. Áli kúnge deıin jalǵasyp kele jatqan qudalyq ta, as berý de – osy jerde. Jumys tártibin buzǵany úshin 5 mln teńgeden astam ákimshilik aıyppul salynǵan. Qazir dámhanalar qýlyqqa kóshken. Bylaıǵy jurt baıqamas úshin esik-terezesin tumshalap, el kózinen jasyryp qyzmet kórsetedi. Máselen, «Merýert» meıramhanasy kóp adam jınap as bergen. Tártip buzǵany úshin meıramhana ıesine 379 myń teńge kóleminde aıyppul salyndy.

Mundaı mysaldar aýdandarda da az emes. Máselen, Jarqaıyń aýda­nyndaǵy 367 nysanǵa monıtorıng júrgizilgen kezde 8 tártip buzý­shy­lyq belgili bolǵan. Onyń ishine «Lastochka», kókónis dúkenderi, «Ishım» qonaqúıi, avtobólshekter dúkeni maska taǵý rejimin saqta­maǵan. Aýdan boıynsha talap buz­ǵan­dardy tártipke shaqyryp, 350 myń teńgeden astam ákimshilik aıyp­pul salynǵan. Eskertýdi qula­ǵy­na qystyrmaı, kásibin dóń­ge­le­tip jatqandar Býrabaı aýdanynda jıi kezdesedi. Qonaqúıler men qoǵamdyq tamaqtandyrý oryn­da­rynyń jalpyǵa ortaq tártipti buzyp otyrǵanynan osyndaı oı túıýge bolady. Daýasyz derttiń órshýi­ne sebep bolyp, talapty oryn­daý qajettigin qaperine ile bermeıtinderge 1 mln 341 myń teńge aıyppul salynǵan. Bul jerde maska taǵý rejimin saqtamaýdyń kórinisi de jıi kezdesedi. Kelimdi-ke­timdi kisi kóp bolǵandyqtan, qa­ýip-qater de mol. Jergilikti jurt ta jaman tumaýdyń órship keterin eskere bermeı, toı toılap júr. Máselen, Shýchınsk qalasyndaǵy «Mereı», «Aqnur» dámhanalary kóp adamdardyń qatysýymen otbasylyq is-sharalar ótkizgen.

Mundaı mysal Selınograd aýdanynda oryn alyp otyr. Aýdannyń 32 nysanyn teksergen kezde úsh birdeı shetin oqıǵanyń oryn alǵa­ny anyqtalǵan. Bul jerde de kóp­shi­liktiń qatysýymen is-sharalar ótkizgen. Aıtalyq, Qosshy aýy­lyn­daǵy «Baıandy» meıramhanasyn­da asta-tók as berilse, «Chıstye prý­dy» demalys úıiniń dám­ha­na­syn­­da týǵan kún toıy ótki­zilgen. Makınsk qa­la­syn­daǵy «Anje­lıka» dám­ha­na­sy da otbasy­lyq is-sharaǵa ruqsat berip, aıypty bolyp otyr.

Mine, joǵarydaǵy mysaldardan aýrýǵa sebepshi bolyp otyrǵan ózimi­zdiń is-áreketimiz ekenin aıqyn ańǵarýǵa bolady. «Sary aımaq­tyń» sanatyndamyz desek te, qalyp­ta­syp otyrǵan jaǵdaıdy sanamen sal­maqtap, ózimizdiń de, ózgeniń de qaýip­sizdigimizdi oılasaq qanekeı!

Aqmola oblysy