Tálipter Aýǵanstannyń Balh provınsııasyndaǵy Kaldor ýezdi Ýkchýk shekara beketin basyp aldy. Úkimettik kúshterdiń 17 áskerı qyzmetkeri Tájikstan aýmaǵyna shegindi. Bul týraly Tájikstan Ulttyq qaýipsizdik memlekettik komıteti shekara áskerleriniń baspasóz ortalyǵy málim etti, dep habarlaıdy Egemen.kz.
«Jergilikti ýaqytpen 12.50-ge deıin (Nur-Sultan ýaqytymen 14:50) sozylǵan qaqtyǵys nátıjesinde úkimettik kúshterdiń 17 áskerı qyzmetshisi «Shahrıtýs» shekara otrıadynyń birinshi beketi arqyly ómiri men jeke quramdy qutqarý úshin Tájikstan aýmaǵyna sheginýge májbúr boldy», dedi agenttik derekkózi.
Onyń aıtýynsha, tájik shekarashylary gýmanızm men tatý kórshi qaǵıdalaryn eskerip, memlekettik shekarany buzyp ótken aýǵan áskerılerine óz eline erkin kirýge múmkindik berdi.
«Bul shekara aımaǵyndaǵy ahýal áli shıelenisip tur, «Talıban» qarýly toby men Aýǵanstan úkimet kúshteri arasyndaǵy shaıqas jalǵasyp jatyr», dedi ol.
23 maýsymda «Talıban» qozǵalysynyń sodyrlary (Qazaqstan, Reseı, Tájikstan jáne basqa da birneshe elde tyıym salynǵan radıkal uıym) AQSh pen NATO Aýǵanstannan óz áskerin shyǵara bastaǵannan keıin elge shabýyl jasap, ondaǵan ákimshilik aımaqty baqylaýǵa alǵan. Tájikstanmen shekaradaǵy negizgi aımaqtar sodyrlar qolyna ótken.
Sol kúni aýǵan áskeriniń bir bóligi Shortepa ýezdine jaqyn О́zbekstan aýmaǵyna sheginýge májbúr bolǵan.