10 jyl buryn, 2011 jyldyń 16 shildesinde Baıqońyr ǵarysh aılaǵynan qazaqstandyq «Kazsat-2» baılanys jáne habar taratý jerserigi ushyryldy. Ekinshi ulttyq baılanys jerserigin sátti ushyrý jáne iske qosý Qazaqstan Respýblıkasynyń ózindik jerseriktik shoqjuldyzyn qurýdyń mańyzdy kezeńi boldy, dep habarlaıdy Egemen.kz.
Bul týraly Sıfrlyq damý, ınnovasııalar jáne aeroǵarysh ónerkásibi mınıstrligi málimdedi.
«Kazsat-2» ǵarysh apparatynyń qyzmet etý aımaǵy Qazaqstan Respýblıkasynyń búkil aýmaǵyn jáne Ortalyq Azııa elderin qamtıdy. Orbıtada 86,5° shyǵys boılyqta ornalasqan ǵarysh apparattarynyń belsendi ómir súrýi 12,5 jylǵa eseptelgen.
Tehnıkalyq resýrs 14,5 jyldy quraıdy. «Kazsat-2» iske qosylǵannan keıin baılanys operatorlaryna baılanys qyzmetterin usyný, aqparattyq qyzmet aıasyn keńeıtý, elektrondy úkimet, ınternet jáne uıaly baılanys jumysyn jaqsartý múmkindigi aıtarlyqtaı ósti. «KazSat-2» jerserigi paıdalanýdy bastaǵannan keıin 10 jyl ótken soń da shtattyq rejımde jumys isteıdi. 16.07.2021j. jaǵdaıyna ǵarysh kemesiniń júktemesi 70% quraıdy.
«KazSat-2» qyzmetterin 11 iri jerseriktik operatorlar paıdalanady, KazSat-2 ǵarysh apparaty arqyly jumys isteýge ruqsat etilgen jerseriktik jer stansııalarynyń sany Qazaqstan Respýblıkasynyń búkil aýmaǵynda 5 119 birlikti quraıdy. Statıstıkalyq málimetterge sáıkes, 2021 jyldyń 16 shildesine shaqqanda «Kazsat-2» 3654 táýlik boıy ushyp júr, osy ýaqyt aralyǵynda 13 myń jerseriktik basqarý seanstary ótkizildi, baılanys jáne habar taratý ǵarysh apparattaryn basqarýdy qamtamasyz etýge kem degende 40 ınjener qatysty.
Búginde eki apparattan («Kazsat-2», «Kazsat-3») jáne «Aqkól» (Aqmola oblysy) jáne «Kókterek» (Almaty oblysy) eki basqarý kesheninen turatyn «Kazsat» ǵaryshtyq baılanys jáne habar taratý júıesi strategııalyq jáne aqparattyq qaýipsizdikke kepildik bere otyryp, Qazaqstan Respýblıkasyn baılanys jáne habar taratý qyzmetterimen tolyqtaı qamtamasyz etedi.
KazSat baılanys jerserikteriniń qyzmetterin el aýmaǵynda 13 myńnan astam jer stansııalary bar qazaqstandyq 15 negizgi baılanys jáne habar taratý operatorlary paıdalanady. «KazSat» ǵaryshtyq baılanys júıesiniń jalpy júktemesi qazirgi ýaqytta shamamen 73% quraıdy.
«Kazsat-2» jerseriginiń ushyrylǵanyna 10 jyl tolatyn aıtýly kúni «RǴBO» AQ ujymynda Qazǵarysh basshylyǵy men seriktesteriniń qatysýymen onlaın rejımde saltanatty is-shara ótkiziledi.