Ulttyq olımpıada komıteti Tokıo Olımpıadasynda sportshylar mekendeıtin qalashyqqa sholý jasady, dep jazady Egemen.kz.
Olımpıada qalashyǵy bir jyl buryn salynǵan, biraq áli kúnge deıin bos tur. Oıyndar aıaqtalǵannan keıin aýyl Tokıodaǵy kádimgi turǵyn aýdanyna aınalady. Onyń barlyq úıinde 3880 bólme bar. Ár bólmede eki-segiz sportshy tura alady.
«COVID-19 pandemııasyna baılanysty qatań talaptar men erejelerdi qospaǵanda, japondyq olımpıada qalashyǵy burynǵy Olımpıada oıyndaryndaǵy sııaqty. Munda óte jaqsy jaǵdaı jasalǵan. Tamaqtaný pýnkti, demalys orny, fıtnes ortalyǵy jáne emhana bar. Sondaı-aq sport nysandarynda sportshylardyń jattyǵý kestesi jasaldy.
Qazirgi ýaqytta barlyq 95 sportshy men delegasııanyń basqa músheleri tirkelgen. Olar Olımpıada qalashyǵyna ornalsýǵa jáne Olımpıada oıyndaryna qatysýǵa quqyly. Biz olardy asyǵa kútemiz», dedi Tokıodan QR UOK Sport dıreksııasynyń dırektory Elsııar Qanaǵatov.
Japondyqtar ekologııalyq máselelerge erekshe nazar aýdarǵan. Olımpıada qalashyǵyndaǵy zattardyń kópshiligi qaıta óńdelgen materıaldardan jasalǵan nemese olardy qaıta óńdeýge bolady. Mysaly, kereýetter kartonnan jáne matrastar plastıkten jasalǵan.
Sportshylar Toyota kompanııasy qurastyrǵan e-Palette avtonomdy kólikterimen tasymaldanady. Ol qalashyq, jattyǵý jáne jarys alańdary arasynda ár 20 mınýt saıyn júrýi kerek. Bul sportshylardyń qaýipsizdigi úshin jasalǵan. Basqa el sportshylarymen mınımaldy baılanys qana bolsa, Tokıo turǵyndarymen múldem baılanys bolmaıdy.
Bastapqyda ashana 4300 adamdy qabyldaıdy dep boljanǵan, biraq keıin koronavırýs saldarynan 3000-ǵa deıin azaıdy. Jeldetý júıesi zaldaǵy aýany ár 15-20 mınýt saıyn tolyǵymen tazartady.
Kún saıyn mázirde sporttyq tamaqtaný normalaryna sáıkes keletin japon taǵamdary men ónimderi bolady.
Sportshylar trenajerlar arasynda móldir qalqalar ornatylǵan fıtnes ortalyǵyn qoldana alady.
Olımpıada qalashyǵynyń óz klınıkasy da bar. Onda sportshylar únemi PTR test ótkizip otyrady.
Oń nátıje kórsetken sportshylardy karantındik qonaq úıge aýystyrady. Emdeýdi qajet etse, aýrýhanaǵa jatqyzady. Ár sportshy kúndelikti test tapsyrýy qajet. Demek uıymdastyrýshylar kúnine 80 000 testi tekserýi kerek bolady.
Esterińizge sala keteıik, Qazaqstan Olımpıada delegasııasy Japonııaǵa 16 shildede ushady.