Oblystyń birneshe eldi mekeninde júzdegen iri qara buǵan deıin kezikpegen mal aýrýymen jappaı aýyrýda. Basty belgisi – jemshóp jemeı, tilin tistep turýy. Mal dárigerleri sebebin tap basyp aıta almaıdy. Aıaqastynan paıda bolǵan indet kórinisteri Stepnogor qalasynyń tóńiregindegi eldi mekender men Aqkól aýdanynyń aýyldarynda oryn alǵan.
Beımálim indet áýeli Aqkól aýdanyna qarasty Azat aýylynda tirkelipti. Birli-jarym emes, 400-den asa iri qara túgel indetke shaldyqqan. On shaqtysy ólip te qalǵan. Aýyl turǵyndarynyń aıtýyna qaraǵanda, indetke shaldyqqan maldyń aýzy ýylyp, tili sabaqtap, demigip qalady eken. Mal dárigerleri ártúrli em qoldanǵanymen, qaıyr bolmaı tur.
«Sıyrymnyń aýzynan kóbik aralas sý aqty. Aıaǵyna jara shyǵyp, basa almaı qaldy», deıdi Azat aýylynyń turǵyny Tursynhan Ámirhanuly.
Al irgedegi Qarabulaq aýylynda 130-ǵa jýyq iri qara mal dál osyndaı indetke shaldyǵyp otyr. Mal súmesimen kún kórip otyrǵan aýyl adamdary úshin bul – úlken soqqy. Osy eldi meken turǵyndarynyń aıtýyna qaraǵanda, mal dárigerleri árqaısysy 2,5 myń teńge turatyn ekpe ekken. Nátıjesi kóńil kónshitpeıdi. Qan alǵanymen, anyqtaýy uzaqqa sozylyp ketti.
Mal indetke shaldyqqan soń onyń sútin paıdalanýdan el qaýiptenip otyr. Buryn-sońdy malsaq qaýymnyń nazaryna ilikpegen, tótennen kelgen indettiń juqpaly emes ekenine kim kepil?
«Bizdiń qoldan keler qaıran joq. Indet belgisi paıda bolǵaly abdyrap qaldyq. Dári-dármegi de tabylmaı tur», deıdi mal dárigeri Oljataı Fazylov.
Zerthanaǵa jiberilgen synamalardan naqty nátıje shyǵarylmaǵan. Mamannyń ýáji osyndaı. Al malsaq qaýym bes birdeı aýyldyń maly belgisiz indetke shaldyqqan soń alańdaýly.
Aqmola oblysy